អាការៈស្រីៗពពោះតែងជួបញឹកញាប់នៅត្រីមាសទី២ និងវិធីដោះស្រាយ

កាលពីលើកមុន Hello គ្រូពេទ្យ បានបង្ហាញរួចមកហើយអំពីបញ្ហាមួយចំនួនដែលតែងកើតមានឡើងអំឡុង ៣ ខែ ដំបូងនៃការពពោះ ។ ដោយឡែកនៅថ្ងៃនេះ យើងមកដឹងទាំងអស់គ្នា អំពីផលរំខាន ឬបញ្ហាដែលស្រីៗពពោះតែងជួបប្រទះញឹកញាប់នៅក្នុងអំឡុងត្រីមាស ទី២។

នៅត្រីមាសទី ២ អាការៈចាញ់អាចថមថយ ឬបាត់ទៅវិញតែម្តង តែទោះជាបែបនេះក្តីម៉ាក់ៗអាចជួបនូវបញ្ហាផ្សេងៗទៀតដូចជា៖

១- ឡើងទម្ងន់

ម៉ាក់ៗបំប៉នអាហាររាល់ថ្ងៃ កូនកាន់តែធំ ម្ល៉ោះហើយទម្ងន់របស់ម៉ាក់ៗក៏ឡើងទៅតាមនោះដែរ។ អំឡុងត្រីមាសទី២នេះ ទោះជាម៉ាក់ៗឡើងទម្ងន់ខ្លាំងក៏មិនចោទជាបញ្ហាដែរ សំខាន់ឲ្យតែម៉ាក់ និងកូនមានសុខភាពល្អ។

២- មានបញ្ហាស្បែក

ចូលដល់ត្រីមាសទី ២ ស្រីៗគ្នាយើងអាចនឹងមានបញ្ហាស្បែក ឡើងកន្ទួលរមាស់នៅបរិវេណក្បាលពោះ កើតពីកម្រិតអ័រម៉ូនគ្មានតុល្យភាព ឬអាចមកពីការស្លៀកតឹងពេក។ ពេលកូនក្នុងពោះធំឡើងៗ ស្បែកពោះនឹងយាររីកទៅតាមនោះដែរ ហើយម្ដាយនឹងមានអារម្មណ៍រមាស់ៗជាប្រចាំ។ វិធីព្យាបាល ត្រូវងូតទឹកត្រជាក់ៗ និងប្រើសាប៊ូឲ្យត្រឹមត្រូវ ចៀសវាងសាប៊ូដែលមានក្លិនក្រអូបឆួលខ្លាំង ព្រោះវាអាចធ្វើឲ្យស្បែកពោះកាន់តែរមាស់។

៣- ហត់-ពិបាកដកដង្ហើម

ម៉ាក់ៗដែលធាត់ៗតែងជួបបញ្ហាពិបាកដកដង្ហើម និងពិបាកគេង ចាប់ពីត្រីមាសទី២ទៅ ព្រោះកូនកាន់តែធំ។ ម្យ៉ាងវិញទៀតការកើនឡើងនូវអ័រម៉ូនអឺស្ត្រូសែន អំឡុងពពោះ ធ្វើឲ្យហើមភ្នាសច្រមុះ បណ្តាលឲ្យកើនបរិមាណឈាម រីកសរសៃឈាមក្នុងភ្នាសច្រមុះ ពិបាកក្នុងការដកដង្ហើមដែរ។ ដោះស្រាយបញ្ហានេះ ម៉ាក់ៗត្រូវញ៉ាំតិចៗតែច្រើនដង គេងផ្អៀងទៅខាងឆ្វេង ញ៉ាំទឹកឲ្យបានច្រើន ឬញ៉ាំតែខ្ញី និងគេងដាក់ក្បាលឲ្យខ្ពស់។

អត្ថបទពាក់ព័ន្ធ៖ ពេលពពោះចេះតែថប់ដង្ហើមមែនទេ នេះវិធីបំបាត់!

ពពោះ

៤- រមួលក្រពើ

ស្រីៗអាចចាប់ផ្តើមប្រទះអាការៈរមួលក្រពើ នៅត្រីមាសទី ២ ហើយកាន់តែធ្ងន់ទៅៗ ពេលម៉ាក់ៗកាន់តែឡើងទម្ងន់ ឯកូនក្នុងក្នុងពោះកាន់តែធំ ធ្វើឲ្យសាច់ដុំជើងទ្រទម្ងន់ធ្ងន់ជាងមុន ឬក៏អាចមកពីការចាល់ជាតិទឹកនៅជើង បង្កឲ្យហើមជើង និងរមួលក្រពើនៅសាច់ដុំជើងនៅពេលយប់។ បើសិនជាជួបអាការៈរមួលក្រពើ ម៉ាក់ៗត្រូវសណ្តូកជើងភ្លាមៗ ដោយបត់កែងជើង និងបត់ម្រាមជើងបន្តិចម្តងៗទៅរកស្មងជើង ម៉ាស្សាកំភួនជើងថ្នមៗ ប្រើកន្សែង ឬដបទឹកក្តៅឧណ្ហៗស្អំ ឬលាបក្រែមបន្ថយការឈឺចាប់ ឬ ដើរតិចៗ ២-៣ នាទី ដើម្បីឲ្យចលនាឈាមដើរល្អវិញ។

អត្ថបទពាក់ព័ន្ធ៖ ឧស្សាហ៍រមួលក្រពើពេលពពោះ ទាំងនេះគឺវិធីដោះស្រាយ

៥- ហើមជើង

អាការៈហើមជើងបណ្ដាលមកពីទម្ងន់គភ៌ក្នុងស្បូនសង្កត់លើសរសៃឈាម និងជើង ទើបធ្វើឲ្យសរសៃឈាមរួមតូច ឈាមចាប់ផ្ដើមផ្ដុំនៅជើង ឬអាចមកពីម៉ាក់ៗមានលើសជាតិប្រូតេអ៊ីនក្នុងទឹកនោម។ ដើម្បីកាត់បន្ថយអាការៈហើមជើង ម៉ាក់ៗត្រូវគេងផ្អៀងទៅឆ្វេង ដាក់ខ្នើយកល់ក្រោមជើងពេលគេង ឬដាក់កូនកៅអីទ្រជើងពេលអង្គុយធ្វើការ គួរពាក់ស្បែកជើងទន់ និងយឺតតាមទម្រង់ជើង កុំពាក់ស្បែកជើងរឹតជើង ចៀសវាងការឈរ ឬអង្គុយយូរពេក គួរដើរឲ្យបានញឹកញាប់ និងញ៉ាំទឹកឲ្យបានច្រើន។

អត្ថបទពាក់ព័ន្ធ៖ អ្វីជាមូលហេតុនាំឲ្យហើមជើងពេលពពោះ ត្រូវដោះស្រាយម៉េច?

៦- ចុករួយចង្កេះ-ខ្នង

អាការៈចុករួយចង្កេះ ខ្នង និងត្រគាកពេលពពោះ កើតមានញឹកញាប់ណាស់ ចាប់ពីត្រីមាសទី២ រហូតដល់ពេលសម្រាល នេះក៏ដោយសារតែទម្ងន់ក្នុងផ្ទៃកាន់តែធំ ពេលខ្លះរើផង ធាក់ផង។ ដូច្នេះម៉ាក់ៗត្រូវអង្គុយឲ្យត្រង់ខ្លួន ត្រូវមានខ្នើយទប់ ឬកល់ មិនត្រូវពាក់ស្បែកជើងកែងខ្ពស់ ឯការធ្វើដំណើរផ្លូវឆ្ងាយខ្លាំងគួរតែចៀសវាង។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

ត្រួតពិនិត្យដោយ

វេជ្ជ. ចាន់ ស៊ីណេត

ឯកទេសសម្ភព និងរោគស្ត្រី · មន្ទីរពេទ្យបង្អែកមិត្តភាពកម្ពុជា-ចិន សែនសុខ

អត្ថបទដោយ ដេត ធន្នី · កែ 13/07/2020