នៅប្រទេសកំពុងអភិវឌ្ឍ ក្មេងស្រីអាយុពី១៥ទៅ១៩ឆ្នាំប្រឈមនឹងការមានផ្ទៃពោះទាំងវ័យក្មេងដោយសារការខ្វះចំណេះដឹង បញ្ហាគ្រួសារ ឱកាសការងារ និងចំណេះដឹងពីការពន្យារកំណើតនៅមានកម្រិត ដែលនេះបានផ្តល់ផលប៉ះពាល់ជាច្រើនដល់ម្តាយ និងទារក។
របាយការណ៍ឆ្នាំ២០២០របស់អង្គការសុខភាពពិភពលោក (WHO) បញ្ជាក់ថាជារៀងរាល់ឆ្នាំមានក្មេងស្រីប្រហែលជា២១លាននាក់អាយុចន្លោះពី១៥ទៅ១៩ឆ្នាំនៅប្រទេសកំពុងអភិវឌ្ឍមានផ្ទៃពោះ ហើយមាន១២លាននាក់ក្នុងចំណោមនោះបានសម្រាលកូន។ ចំពោះក្មេងស្រីក្រោម១៥ឆ្នាំនៅប្រទេសកំពុងអភិវឌ្ឍបានសម្រាលកូនយ៉ាងតិចណាស់ ៧៧៧ ០០០នាក់ក្នុងមួយឆ្នាំ។ ការមានផ្ទៃពោះក្មេងពេកកើតមានទាំងនៅប្រទេសប្រាក់ចំណូលខ្ពស់ មធ្យម និងទាប។ ប៉ុន្តែភាគច្រើនកើតមាននៅប្រទេសក្រីក្រដែលមានប្រព័ន្ធអប់រំខ្សោយ និងឱកាសការងារទាប។
នៅក្នុងប្រទេស ឬសង្គមមួយចំនួន ក្មេងស្រីត្រូវចាប់ឲ្យរៀបការក្នុងវ័យក្មេង។ បន្ថែមពីនេះទៀត ក្មេងស្រីមិនទទួលបានចំណេះដឹងទាក់ទងទៅនឹងការពន្យារកំណើត អាចមកពីច្បាប់នៃប្រទេសដែលពួកអ្នកទាំងនោះរស់នៅ និងគោលការណ៍ក្នុងការផ្តល់ថ្នាំពន្យារកំណើតដោយផ្អែកទៅលើអាយុ ស្ថានភាពគ្រួសារ ភាពលម្អៀងរបស់បុគ្គលិកសុខាភិបាល ការមិនយកចិត្តទុកដាក់លើសុខភាពបន្តពូជរបស់ក្មេងស្រីជាដើម។ ក្រៅពីនេះនៅមានផលវិបាកផ្សេងៗទៀតដូចជាបញ្ហាចំណេះដឹង មធ្យោបាយធ្វើដំណើរ និងបញ្ហាហិរញ្ញវត្ថុ ជាហេតុនាំឲ្យក្មេងស្រីមិនបានទទួលព័ត៌មានត្រឹមត្រូវទាក់ទងនឹងសុខភាពបន្តពូជ។ ក្រៅពីកត្តាខាងលើ ហិង្សាផ្លូវភេទក៏ជាមូលហេតុបង្កមួយដែរធ្វ់ឲ្យប៉ះពាល់ដល់សុខភាពស្រ្តីវ័យក្មេងទាំងណោះ។
ផលប៉ះពាល់នៃការមានផ្ទៃពោះក្មេងពេកលើម្តាយ
ការមានផ្ទៃពោះនៅវ័យក្មេងពេកមានហានិភ័យខ្ពស់នឹងជំងឺបម្រុងក្រឡាភ្លើង (Pre-Eclampsia) និងមានផលវិបាកច្រើនផ្សេងទៀត។ ជំងឺបម្រុងក្រឡាភ្លើងអាចប៉ះពាល់តម្រងនោម និងគ្រោះថ្នាក់ដល់អាយុជីវិតទាំងម្តាយ និងកូន។
លើសពីនេះទៀត ការមានផ្ទៃពោះក្មេងពេកក៏មានឱកាសខ្ពស់ក្នុងការប្រឈមនឹងជំងឺកង្វះគ្រាប់ឈាមដែលធ្វើឲ្យរាងកាយចុះខ្សោយ និងអាចប៉ះពាល់ដល់ការលូតលាស់របស់ទារក។
ក្មេងស្រីមានផ្ទៃពោះទាំងវ័យក្មេងច្រើនបោះបង់ចោលការសិក្សា ជាហេតុនាំឲ្យក្មេងស្រីរស់នៅក្នុងភាពក្រីក្រ។ ម៉្យាងទៀត ក្មេងស្រីទាំងនោះក៏មានឱកាសខ្ពស់ក្នុងការមានកូនច្រើនផងដែរ។
ក្រៅពីនេះ ការមានផ្ទៃពោះទាំងវ័យក្មេងពេកក៏អាចប៉ះពាល់ដល់សុខភាពផ្លូវចិត្តរបស់ម្តាយផងដែរ។ ម្តាយអាចមានអារម្មណ៍ថាឯកាព្រោះមិនដឹងថាគួរពិភាក្សាជាមួយនរណាម្នាក់ និងអាចកើតជំងឺបាក់ទឹកចិត្តក្រោយសម្រាល (Postpartum Depression)។
អត្ថបទពាក់ព័ន្ធ៖
- លម្អិតពីជំងឺក្រឡាភ្លើង កើតលើស្រីៗមានផ្ទៃពោះ គ្រោះថ្នាក់ទាំងម្តាយទាំងកូន
- អាការៈបាក់ចិត្តក្រោយសម្រាលកូន ស្រីៗជួបប្រទះញឹកញាប់ មានអីខ្លះ?
ផលប៉ះពាល់នៃការមានផ្ទៃពោះក្មេងពេកលើទារក
ក្មេងជំទង់មានផ្ទៃពោះភាគច្រើនមានបញ្ហាក្នុងការសម្រាលកូនមិនគ្រប់ខែ និងទារកមិនគ្រប់គីឡូ។ ពេលខ្លះរាងកាយ និងខួរក្បាលទារកមានការលូតលាស់មិនពេញលេញដែលអាចប៉ះពាល់ដល់សុខភាពរបស់ទារក។ ទារកកើតមិនគ្រប់ខែច្រើនតែមានទម្ងន់មិនគ្រប់។ ករណីនេះអាចមានបញ្ហាដល់ការដកដង្ហើម និងការបំបៅដោះដល់ទារកក្រោយពេលសម្រាល និងពេញវ័យទារកអាចប្រឈមនឹងជំងឺទឹកនោមផ្អែម និងជំងឺបេះដូង។ ម៉្យាងទៀត ទារកកើតមិនគ្រប់គីឡូអាចប៉ះពាល់ដល់ការលូតលាស់នៃខួរក្បាល និងមានផលលំបាកក្នុងការរៀនសូត្រ។ បន្ថែមពីនេះទៀត ទារកកើតមកមានទម្ងន់មិនគ្រប់គីឡូកើតពីម្ដាយវ័យជំទង់អាចស្លាប់ផងដែរ។
ទោះបីជាក្មេងស្រីវ័យជំទង់អាចសម្រាលកូនបានដោយសុវត្ថិភាព ប៉ុន្តែក៏អាចបញ្ហាសុខភាពផ្សេងទៀតទៅលើទាំងម្តាយ និងកូន។ ដូច្នេះយល់ល្អគួរពិគ្រោះជាមួយគ្រូពេទ្យ។ ការមានផ្ទៃពោះនៅវ័យក្មេងក៏អាចបង្ការតាមរយៈមធ្យោបាយពន្យារកំណើតមានដូចជា ស្រោមអនាម័យ ថ្នាំលេប និងថ្នាំចាក់ជាដើម។
អត្ថបទពាក់ព័ន្ធ៖
- អស់បារម្ភរឿងកូនមិនគ្រប់ខែ ទាំងនេះជារបៀបបង្ការ
- គួរប្រយ័ត្ន! អាអូនកើតអត់គ្រប់ខែ មានជំងឺគំរាមកំហែងច្រើនណាស់
- ពេលពពោះ ម៉ាក់ៗធ្វើបានប៉ុន្មានចំណុចនេះ កូនកើតមកនឹងឆ្លាតវាងវៃ
- ចង់ឲ្យកូនឆ្លាត ខួរក្បាលលូតលាស់ល្អ ម៉ាក់ប៉ាចាំបាច់ធ្វើរឿងទាំងនេះ
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-pregnancy-weight-gain]
