អ្នកជំនាញផ្នែកវេជ្ជសាស្រ្តលើកឡើងថាអ្នកមានឈាមប្រភេទ Aងាយរងគ្រោះដោយវីរុស COVID-19 ជាងអ្នកមានប្រភេទឈាមផ្សេងទៀត ខណៈការសិក្សាមួយទៀតថាអ្នកជំងឺដោយវីរុសនេះធ្ងន់ធ្ងរ ពេលជាសះស្បើយនៅប្រឈមបញ្ហាសួតមួយទៀត។
ការសិក្សា៖ អ្នកមានឈាមប្រភេទ A ងាយរងគ្រោះដោយវីរុស COVID-19 ជាងអ្នកផ្សេង
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
អ្នកស្រាវជ្រាវចិនបាននិយាយថាអ្នកមានឈាមប្រភេទA ងាយនឹងរកគ្រោះដោយវីរុសCOVID-19 ខណៈអ្នកមានឈាមប្រភេទ O មិនងាយរងគ្រោះនោះទេ។ ការសិក្សានេះធ្វើលើអ្នកឆ្លងវីរុស COVID-19 ចំនួន២ ០០០នាក់ បានរកឃើញថាអ្នកមានឈាមប្រភេទ A មានអត្រាឆ្លងខ្ពស់ ហើយអាចវិវត្តទៅធ្ងន់ធ្ងរទៀតផង។
បើនិយាយពីចំនួនអ្នកស្លាប់វិញ ការសិក្សាបានកត់សម្គាល់លើអ្នកស្លាប់ចំនួន២០៦នាក់ អ្នកស្លាប់មានឈាមប្រភេទA ចំនួន៨៥នាក់ ខណៈឈាមប្រភេទ O ស្លាប់មានត្រឹម៥២នាក់។
ដោយឡែកអ្នកជំនាញផ្នែកសង្គ្រោះបន្ទាន់នៅប្រទេសអង់គ្លេសបានលើកឡើងថា មនុស្សមួយចំនួនដែលបានជាសះស្បើយពីវីរុស COVID-19 ករណីធ្ងន់ធ្ងរអាចនឹងមានការខូចខាតសួតដែលត្រូវការរយៈពេល១៥ឆ្នាំក្នុងការជាសះស្បើយឡើងវិញ។
មហាវិទ្យាល័យ Faculty of Intensive Care Medicine (FICM) ប្រទេសអង់គ្លេសបានឲ្យដឹងថាអ្នកជំងឺវីរុស COVID-19 ដែលបានបញ្ជូនទៅផ្នែកសង្គ្រោះបន្ទាន់អាចនឹងមាន Acute Respiratory Distress Syndrome (ARDS) ដែលជាបណ្ដុំរោគសញ្ញាផ្លូវដង្ហើមដូចជាក្អក ពិបាកដកដង្ហើម ជាដើម។
ការសិក្សាចេញផ្សាយនៅក្នុងមជ្ឈមណ្ឌលជាតិព័ត៌មានជីវបច្ចេកវិទ្យាបានរកឃើញថា ១៧%នៃអ្នកជំងឺ៩៩នាក់នៅទីក្រុងអ៊ូហាន ប្រទេសចិន ដែលត្រូវបានពិនិត្យចន្លោះពីថ្ងៃទី១ដល់ថ្ងៃទី២០ ខែមករាមានកើតនូវអាការៈ ARDS នេះ។ ការសិក្សាមួយទៀតចេញផ្សាយនៅក្នុង The Lancet កាលពីថ្ងៃទី៥ ខែកុម្ភៈក៏បានរកឃើញដែរថា ២៩%នៃអ្នកជំងឺ៤១នាក់ដែលត្រូវបានពិនិត្យចន្លោះពាក់កណ្ដាលខែធ្នូនិងដើមខែមករានៅទីក្រុងអ៊ូហានក៏មានរោគសញ្ញា ARDS នេះដែរ។
រោគសញ្ញា ARDS នេះធ្វើឲ្យសួតបញ្ជូនអុកស៊ីសែនទៅកាន់សរីរាង្គផ្សេងទៀតមិនគ្រប់គ្រាន់។ នៅពេលវីរុស COVID-19ចូលទៅក្នុងសួត ភ្នាសកោសិកាផលិតស្លេស្មមានការរលាក។ សេវាកម្មសុខភាពជាតិប្រទេសអង់គ្លេស (NHS)បានប្រាប់ថា ការរលាកនេះអាចបង្កឲ្យមានARDS នៅពេលដែលសារធាតុរាវចេញពីសរសៃឈាមជ្រាបចូលទៅក្នុងថង់ខ្យល់ក្នុងសួតដែលធ្វើឲ្យពិបាកក្នុងការដកដង្ហើម។
តាមការលើកឡើងរបស់ FICM ប្រទេសអង់គ្លេសទៅកាន់សារព័ត៌មាន The Sunday Timesថា សួតរបស់អ្នកជាពីវីរុស COVID-19នេះនឹងត្រលប់មកកាន់សភាពធម្មតាវិញនៅរយៈពេល៦ខែក្រោយជាមួយនឹងបញ្ហាតិចតួចដូចជា ការពិបាកក្នុងធ្វើលំហាត់ប្រាណ និងសម្រាប់អ្នកមានរោគសញ្ញា ARDS អាចត្រូវការពេល១៥ឆ្នាំដើម្បីឲ្យសួតត្រលប់មកសភាពធម្មតាវិញ។
លោកMichael Matthay អ្នកជំនាញទៅលើARDS ក៏បានបន្ថែមថា ARDS នេះមានអត្រាស្លាប់ពី៣០–៤០% និងមិនទាន់មានការព្យាបាលជាក់លាក់ទេលើកលែងតែការព្យាបាលដោយឲ្យអ្នកគេងឲ្យបានគ្រប់គ្រាន់ និងបំពាក់អុកស៊ីសែនបន្ថែមឲ្យអ្នកជំងឺដើម្បីឲ្យពួកគាត់ជាសះស្បើយ។
ការសិក្សាចេញផ្សាយកាលពីថ្ងៃទី១៣ ខែមីនា ក្នុង The Journal of the American Medical Association រកឃើញថាភាគច្រើនអ្នកជំងឺវ័យចំណាស់អាចមានអាការៈARDS ដោយសារការឆ្លើយតបប្រព័ន្ធភាពស៊ាំរបស់ពួកគេមិនរឹងមាំ។
FCIM ក៏បានព្រមានថាមិនត្រឹមតែសួតទេដែលមានផលប៉ះពាល់ក្រោយពីជាសះស្បើយ។ សម្រាប់ករណីធ្ងន់ធ្ងរ បេះដូងក៏អាចរងផលប៉ះពាល់ដែរដូចជា ការរលាកសាច់ដុំបេះដូង ឬអាចឈានទៅការខ្សោយបេះដូង។
បន្ថែមពីនេះ កាលពីដើមខែមីនានេះ អាជ្ញាធរមន្ទីរពេទ្យទីក្រុងហុងកុងក៏បានរកឃើញថាមនុស្សពីរទៅបីនាក់ក្នុងចំណោមអ្នកជាពីវីរុស COVID-19 ១២នាក់មានការធ្លាក់ចុះនៃដំណើរការរបស់សួតពី២០–៣០% ប៉ុន្តែពួកគេអាចធ្វើលំហាត់ប្រាណប្រភេទ cardiovascular ដើម្បីបង្កើនសមត្ថភាពសួតឡើងវិញបាន។
អត្ថបទពាក់ព័ន្ធ៖
- បារាំងឲ្យពលរដ្ឋនៅក្នុងផ្ទះ១៥ថ្ងៃ ក្រោយផ្ទុះ COVID-19 ខ្លាំង
- មានផ្ទៃពោះគួរថែខ្លួនបែបណា ដើម្បីគេចផុតពីវីរុសកូរ៉ូណាថ្មី?
- រោគសញ្ញាអ្នកឆ្លងវីរុសកូរ៉ូណាថ្មី និងវិធីការពារខ្លួនកុំឲ្យឆ្លង
- COVID-19 កំពុងរាតត្បាត! គ្រឿងផ្សំក្នុងអាហារទាំង៥នេះ ជួយពង្រឹងប្រព័ន្ធភាពស៊ាំ
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម