ក្មេងៗនៅខ្មែរយើង កើតជំងឺអូទីស្សឹមច្រើនឡើងៗ ធ្វើឲ្យម៉ាក់ប៉ាកំពុងបារម្ភ គួរធ្វើម៉េចអាចការពារបាន ហើយបើពេលដឹងកូនកើតជំងឺនេះ គួរជួយអូនៗបែបណាដើម្បីក្លាយជាក្មេងប្រក្រតីនឹងគេវិញ។ ការពិត អាហារក៏អាចជួយកាត់បន្ថយរោគសញ្ញាជំងឺអូទីស្សឹមលើអូនៗបានដែរ។

១- សាកល្បងអាហារថ្មីៗ

ក្មេងៗមានជំងឺអូទីស្សឹម អាចឆាប់ធុំអាហារណាស់ មិនថារសជាតិ ក្លិន ពណ៌ ឬរូបរាងអាហារនោះទេ។ អូនៗអាចមិនញ៉ាំអាហារណាមួយ ដោយសារតែមិនចូលចិត្តពណ៌ ឬក្លិនអាហារនោះ។ ហេតុនេះពេលឲ្យអាហារថ្មីទៅអូនៗ ត្រូវលួងបន្តិចម្តងៗ មិនត្រូវបង្ខំឡើយ។

ម៉ាក់ប៉ាអាចសាកល្បងនាំអូនៗទៅផ្សារជាមួយគ្នា ឲ្យគេរើសអាហារអូនៗចង់ញ៉ាំដោយខ្លួនឯង ហើយពេលមកផ្ទះវិញ រៀបចំចម្អិនឲ្យកូនញ៉ាំភ្លាម។ ពេលខ្លះ អូនៗអាចនៅតែមិនចង់ញ៉ាំ តែមិនអីទេ យូរៗទៅនឹងស៊ាំ ព្រមញ៉ាំដោយខ្លួនឯង។

២- រៀបចំរបស់ញ៉ាំតម្រូវចិត្តកូន

ក្មេងៗមានជំងឺអូទីស្សឹម ពិបាករឿងញ៉ាំអាហារ ដោយសារមានអារម្មណ៍តានតឹងក្នុងចិត្ត និងរឿងជាច្រើនជុំវិញខ្លួន រាប់ទាំងអំពូលភ្លើង តុកៅអី ឬសូម្បីតែរបស់តូចតាចក្នុងផ្ទះបាយ។

ឲ្យអូនញ៉ាំទៀងពេល អាចជួយកូនមិនសូវតានតឹងចិត្ត ហើយគួរកែតម្រូវចំណុចតូចតាចទាំងឡាយ ដូចជា ដាក់អំពូលភ្លឺតិចៗ ឬអុជទៀន ជាដើម និងប្រើចាន សម ស្លាបព្រាដែលអូនៗចូលចិត្ត បែបនេះ អូនៗអាចមានអារម្មណ៍ល្អ ហើយចង់ញ៉ាំអាហារជាងមុន។

៣- របបអាហារពិសេស

របបអាហារពិសេស អាចជួយឲ្យរោគសញ្ញាជំងឺអូទីស្សឹម បានធូរស្រាល ហើយអាហារមួយចំនួនទៀត អាចធ្វើឲ្យអាការៈអូនៗកាន់តែធ្ងន់ធ្ងរទៅវិញ ខណៈអាហារទាំងនោះ មាន សណ្តែកសៀង អាហារមានសារធាតុ Gluten ឬប្រូតេអ៊ីន Casein (សម្បូរក្នុងផលិតផលទឹកដោះគោ)។ ចៀសវាងអាហារទាំងនេះ អាចនឹងជួយកាត់បន្ថយរោគសញ្ញាជំងឺអូទីស្សឹមឲ្យអូនៗបាន។

អត្ថបទពាក់ព័ន្ធ៖

កំពុងពពោះ? ត្រូវចេះប្រយ័ត្នប្រយែង តិចអូនៗកើតអូទីស៊ឹម
បើកូនកើតអូទីស្សឹម គួរយកទៅព្យាបាលនៅពេទ្យណា?

៤- ពិនិត្យមើលស្លាកផលិតផលអាហារ

ស្លាកនៅនឹងសម្បក ឬកំប៉ុងអាហារ អាចប្រាប់ម៉ាក់ប៉ាពីសារធាតុផ្សំ បរិមាណអាហារូបត្ថម្ភ ឬសារធាតុផ្សេងៗបាន។ ដូចនេះ យើងអាចដឹងថាអាហារនោះសម្បូរសារធាតុចិញ្ចឹម វីតាមីន សារធាតុរ៉ែ ប្រូតេអ៊ីន ខ្លាញ់ ឬសារធាតុសរសៃប៉ុនណា ហើយយើងអាចរក្សាលំនឹងអាហារអូនៗញ៉ាំបានល្អ និងចៀសវាងអាហារមិនល្អប៉ះពាល់ជំងឺអូនៗផងដែរ (មាន សណ្តែកសៀង អាហារមានសារធាតុ Gluten ឬប្រតេអ៊ីន Casein)។

៥- សួរយោបល់ពីអ្នកជំនាញ

អាចសុំយោបល់ពីគ្រូពេទ្យ ឬអ្នកជំនាញខាងអាហារូបត្ថម្ភ ដើម្បីយល់ច្បាស់ពីអាហារូបត្ថម្ភល្អៗ អាចជួយស្ថានភាពជំងឺអូនៗកាន់តែធូរស្រាល។ អ្នកជំនាញអាចមានមធ្យោយបាយជួយឲ្យអូនស្រួលញ៉ាំអាហារ និងញ៉ាំបានច្រើន ដោយសារពេទ្យដឹងច្បាស់ពីឫសគល់បញ្ហា។

អាហារូបត្ថម្ភ មាននាទីយ៉ាងសំខាន់ក្នុងការលូតលាស់កូនតូចៗ ពិសេសអូនៗមានជំងឺដូចជាជំងឺអូទីស៊ឹមជាដើម។ ជាមួយគន្លឹះទាំងនេះ “Hello គ្រូពេទ្យ’ សង្ឃឹមថា អូនៗអាចញ៉ាំអាហារបានត្រឹមត្រូវ និងគ្រប់គ្រាន់ ជួយអាការៈកាន់តែធូរស្រាល។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

តិចនិក​សាមញ្ញ​ អាចជួយ​ក្មេងៗរើ​បម្រះ​ពី​ជំងឺ​អូទីស្សឹម​បាន

តិចនិកសាមញ្ញ អាចជួយក្មេងៗរើបម្រះពីជំងឺអូទីស្សឹមបាន