បន្លែ ផ្លែឈើ ញ៉ាំមិនឡើងគីឡូមានប្រយោជន៍ដល់សុខភាព

ដោយ មាន រតនា កែសម្រួលចុងក្រោយ 27/08/2021

ត្រួតពិនិត្យដោយ វេជ្ជ. ចាន់ ស៊ីណេត

បន្លែ ផ្លែឈើ ញ៉ាំមិនឡើងគីឡូមានប្រយោជន៍ដល់សុខភាព

នៅក្នុងពីរ៉ាមីតអាហារ បន្លែ និងផ្លែឈើ ជាប្រភេទអាហារការពារ ពោលគឺវាជួយការពារដល់ប្រព័ន្ធរាងកាយ ប្រឆាំងនឹងជំងឺផ្សេងៗ។ ជាមួយគ្នានេះ អ្នកឯកទេសផ្នែកអាហារូបត្ថម្ភ លោកស្រីវេជ្ជបណ្ឌិត Lisa Young មកពីសាកលវិទ្យាល័យ New York សហរដ្ឋអាមេរិក បានបង្ហាញពីប្រភេទបន្លែ និងផ្លែឈើមួយចំនួនដែលល្អទាំងសម្រាប់សុខភាព ងាយស្រួលរកទិញ និងមិនធ្វើឱ្យអ្នកញ៉ាំឡើងទម្ងន់ទៀតផង។ បន្លែទាំងនោះមានដូចជា៖

១. ត្រសក់

ផ្លែត្រសក់សម្បូរដោយជាតិទឹក នឹងមានត្រឹមតែ១៦កាល់ឡូរី សម្រាប់ប្រើក្នុងអាហារ១ពេល។ គ្រាប់ និងសំបករបស់វា មានសារធាតុចិញ្ចឹមល្អៗ ដោយរួមមានជាតិសរសៃ (Fiber) និងវីតាមីន A ប្រភេទ Beta-Caroteneដែលល្អប្រសើរសម្រាប់សុខភាពភ្នែក។

២. ប៉េងប៉ោះ

ប៉េងប៉ោះផ្ទុកសារធាតុ Lycopene ជាសមាសធាតុពណ៌ទឹកក្រូចដែលជួយរាងកាយប្រឆាំងនឹងជំងឺរ៉ាំរ៉ៃ។ ក្រៅពី Lycopene ប៉េងប៉ោះក៏សំបូរដោយវីតាមីន A វីតាមីនC និងB2 ប៉ូតាស្យូម និងកាកសរសៃល្អសម្រាប់សុខភាពរាងកាយ។ កាល់ឡូរីក្នុងប៉េងប៉ោះមានត្រឹមតែ២៥ធាតុកាល់ឡូរីប៉ុណ្ណោះក្នុងអាហារមួយពេល។

៣. ក្រូចថ្លុង

ការសិក្សាបានបង្ហាញថា ការបន្ថែមក្នុងក្រូចថ្លុងក្នុងរបបអាហារ អាចជួយសម្រកទម្ងន់បាន។ ក្រូចថ្លុងមានជាតិសរសៃ (Fiber) ខ្ពស់ ជួយឱ្យអ្នកឆាប់ឆ្អែត។ ក្រៅពីនេះវាក៏មានវីតាមីន C ដែលប្រឆាំងនឹងជំងឺមហារីក និងជំងឺបេះដូងផងដែរ។ កាល់ឡូរីក្នុងក្រូចថ្លុងមានប្រមាណ ៥០កាល់ឡូរី ក្នុងក្រូចថ្លុង១ផ្លែតូច។

៤. ផ្កាខាត់ណា

ផ្កាខាត់ណាពណ៌ស សំបូរដោយសារធាតុប្រឆាំងអុកស៊ីដកម្ម ព្រមទាំងវីតាមីន C និងវីតាមីនK ដែលប្រឆាំងនឹងជំងឺរ៉ាំរ៉ៃមួយចំនួន។ កាល់ឡូរីក្នុងខាត់ណានៃអាហារមួយពេលនោះគឺមានប្រមាណ ២៥កាល់ឡូរី។

អត្ថបទពាក់ព័ន្ធ៖

៥. ផ្លែស្ត្រប៊ឺររី

ផ្លែស្រ្តប៊ឺររីសំម្បូដោយជាតិប៉ូតាស្យូម វីតាមីន C និងប្រភេទសារធាតុប្រឆាំងអុកស៊ីដកម្ម Polyphenols ដែលល្អសម្រាប់សុខភាពបេះដូង។ បន្ថែមពីនោះ ផ្លែស្រ្តប៊ឺររី សំបូរដោយជាតិកាកសរសៃ (Fiber) ផងដែរ។ ផ្លែនេះមានកាល់ឡូរីប្រមាណ៥០កាល់ឡូរី ក្នុង១ចាន៕