មិនត្រូវប្រហែស ជំងឺបេះដូងប្រភេទនេះសម្លាប់មនុស្សច្រើនជាងគេ

    មិនត្រូវប្រហែស ជំងឺបេះដូងប្រភេទនេះសម្លាប់មនុស្សច្រើនជាងគេ

    តាម​តួលេខ​របស់​អង្គការ សុខភាព​ពិភពលោក (WHO) នៅ​កម្ពុជា ក្នុង​ចំណោម​មនុស្ស ១០០.០០០ នាក់ មាន ១២៨ នាក់​ស្លាប់​ដោយសារ​ជំងឺ ស្ទះសរសៃឈាមបេះដូង (គាំង​បេះដូង) ដែល​តួលេខ​នេះ​ខ្ពស់​ជាង​គេ​នៅ​តំបន់​អាស៊ីអាគ្នេយ៍។

    ចំពោះ​សន្ទុះ​នៃ​ការ​កើន​ឡើង​ជំងឺ​ស្ទះ​សរសៃ​ឈាម​បេះដូង​នេះ ប្រធាន​ដេប៉ាតឺម៉ង់​ជំងឺ​បេះដូង នៃ​មន្ទីរពេទ្យ កាល់ម៉ែត លោក​វេជ្ជបណ្ឌិត សុខ ជួរ បញ្ជាក់​ថា បណ្តាល​​មក​ពី​ការ​ផ្លាស់ប្តូរ​ទម្លាប់​រស់នៅ​របស់​ប្រជាពលរដ្ឋ។

    “ពី​មុន​​ធ្លាប់​​ធ្វើ​​ពលកម្ម ឥឡូវ​​មក​​ស្រណុក ធ្លាប់​​តែ​ដើរ ឥឡូវ​​ជិះ​​ឡាន​​ម៉ូតូ អត់​​បញ្ចេញ​​ពលកម្ម ធ្លាប់​​តែ​​ញ៉ាំ​​បន្លែ ផ្លែឈើ អាហារ​​ខ្មែរ​​ដែល​​ល្អ មក​​ញ៉ាំ Fast Food អាហារ​​អស់​​ហ្នឹង​​នាំ​​ឲ្យ​​ឡើង​ទម្ងន់ ឡើង​​ជាតិ​​ខ្លាញ់ ទៅ​​ជា​​កើត​​ជំងឺ​​បេះដូង”។ លោក​​វេជ្ជបណ្ឌិត រៀបរាប់។

    ១- អ្វី​ទៅ​ជា​ជំងឺ​ស្ទះ​សរសៃ​ឈាម​បេះដូង

    ជំងឺ​ស្ទះ​សរសៃ​ឈាម​បេះដូង ដែល​យើង​ចំណាំ​ហៅ​ថា ជំងឺ​គាំង​បេះដូង ជា​ជំងឺ​​ធ្ងន់​ធ្ងរ កើត​​ឡើង​​ដោយសារ​​សរសៃ​​ឈាម​​មួយ ឬ​​ច្រើន ដែល​​មាន​​តួនាទី​​ទៅ​​ចិញ្ចឹម​​បេះដូង ត្រូវ​​ស្ទះ​ខ្លាញ់ និង​​កំណក​​ដំុឈាម។

    ២- រោគ​សញ្ញា​ជំងឺ​ស្ទះ​សរសៃ​ឈាម​បេះដូង

    – តឹង ចុក ណែន ឈឺ​ចាប់​ក្នុង​ទ្រូង ឬ​ដៃ ហើយ​រាលដាល​ទៅ​ក ថ្គាម និង​ខ្នង
    – ចង្អោរ ក្រហាយ​ទ្រូង ឬ​ឈឺ​ពោះ
    – ហត់
    – បែកញើស​ខ្លាំង ដោយ​មិន​ដឹង​មូលហេតុ
    – ហត់
    – អស់​កម្លាំង
    – ធេងធោង ឬ​វិល​មុខ។

    អត្ថបទពាក់ព័ន្ធ៖

    វេជ្ជបណ្ឌិត សុខ ជួរ
    វេជ្ជបណ្ឌិត សុខ ជួរ ប្រធានដេប៉ាតឺម៉ង់ជំងឺបេះដូង មន្ទីរពេទ្យកាល់ម៉ែត

    ៣- មូលហេតុ​នាំ​ឲ្យ​កើត​ជំងឺ​ស្ទះ​សរសៃ​ឈាម​បេះដូង

    – កត្តា​អាយុ
    – ជក់បារី
    – មាន​ជំងឺ​លើស​ឈាម
    – មាន​ជំងឺ​ទឹកនោម​ផ្អែម
    – ធាត់​ពេក
    – មាន​លើសជាតិ​ខ្លាញ់​ច្រើន
    – មិន​ហាត់​ប្រាណ
    – ស្ត្រេស
    – គ្រួសារ​មាន​ប្រវត្តិ​​មាន​ជំងឺ​​​បេះដូង ឬស្ទះ​សរសៃ​ឈាម​បេះដូង។

    ៤- វិធី​បង្ការ​ជំងឺ​ស្ទះ​សរសៃ​ឈាម​បេះដូង

    – កុំ​ជក់​បារី
    – ​លំហាត់​ប្រាណ
    – រក្សា​ទម្ងន់
    – គ្រប់​គ្រង​ជាតិ​ស្ករ
    – គ្រប់​គ្រង​អារម្មណ៍​ធុញ​ថប់
    – កម្រិត​ការ​ផឹក​ជាតិ​អាល់​កុល
    – ពិនិត្យ​សុខភាព​ឲ្យ​បាន​ទៀង​ទាត់
    – ញ៉ាំ​អាហារ​ល្អ​សម្រាប់​សុខភាព​បេះដូង
    – ត្រួត​ពិនិត្យ​សម្ពាធ​ឈាម និង​កូលេស្តេរូល(កម្រិត​ជាតិ​ខ្លាញ់​ក្នុង​ចរន្ត​ឈាម)។

    ជំងឺ​បេះដូង​ជា​មូលហេតុ​ទី១ ដែល​សម្លាប់​មនុស្ស ដែល​ជា​រៀងរាល់​ឆ្នាំ​មាន​មនុស្ស​ជាង ១៧ លាន​នាក់​ស្លាប់​ដោយសារ​ជំងឺ​បេះដូង​នៅ​លើ​ពិភពលោក។

    ក្នុង​ករណី​មាន​សំណួរ ឬ​មន្ទិលសង្ស័យ​ជុំវិញ​សុខភាព​អ្នក ជម្រើស​ល្អ​បំផុត សូម​ពិគ្រោះ និង​ប្រឹក្សា​យោបល់​ផ្ទាល់​ជាមួយ​ពេទ្យ​ជំនាញ។ Hello Health Group មិន​ចេញ​វេជ្ជបញ្ជា មិន​ធ្វើ​រោគវិនិច្ឆ័យ ឬ​ព្យាបាល​ជូន​ទេ៕

    Hello Health Group និង “Hello គ្រូពេទ្យ” មិន​ចេញ​វេជ្ជបញ្ជា មិន​ធ្វើ​រោគវិនិច្ឆ័យ ឬ​ព្យាបាល​ជូន​ទេ៕

    រូបថត​របស់​អ្នក​និពន្ធbadge
    ដោយ ដេត ធន្នី កែសម្រួល​ចុងក្រោយ 29/09/2020
    ត្រួតពិនិត្យដោយ វេជ្ជ. ចាន់ ស៊ីណេត