៥សំណួរ ប្រុសៗឧស្សាហ៍សួរបំផុត ពាក់ព័ន្ធនឹងរឿងផ្លូវភេទ

បញ្ហាផ្លូវភេទ ជាដែលរឿងយើងគ្រប់គ្នាគិតថា អៀនខ្មាស ហើយក៏ជារឿងដែលយើងចង់ដឹងបំផុតដែរ។ តែតាមពិតទៅផ្លូវភេទ មិនមែនជារឿងត្រូវអៀនខ្មាសនោះទេ កាលណាយើងយល់ដឹងបានកាន់តែច្រើន អាចបង្ការបញ្ហាបានកាន់តែខ្ពស់ អ៊ីចឹងហើយ ថ្ងៃនេះ Hello គ្រូពេទ្យនឹងយកចម្ងល់ដែលប្រុសឧស្សាហ៍សួរបំផុត ពាក់ព័ន្ធនឹងរឿងផ្លូវភេទ។

១- រួមភេទ ឆាប់ចេញទឹកកាមពេកបណ្តាលមកពីអី?

ចម្លើយ៖ បញ្ហាឆាប់ចេញទឹកកាម ជារឿងអាម៉ាស់ និងកង្វល់របស់ប្រុសៗ ហើយមកដល់បច្ចុប្បន្ន នៅមិនទាន់ដឹងពីមូលហេតុច្បាស់លាស់នៅឡើយ ប៉ុន្តែអាស្រ័យទៅតាមបទពិសោធ និងអាយុ។ បញ្ហាឆាប់ចេញទឹកកាម អាចមានសម្រាប់ដៃគូថ្មីថ្មោង អាចដោយសារស្ថានការណ៍រួមភេទពិសេសណាមួយ របៀបនៃការរួមភេទ ឬអាចដោយសារខកខានបញ្ចេញយូរពេកក៏មាន។ យ៉ាងណា កត្តាផ្លូវចិត្តមួយចំនួន ដូចជា ថប់បារម្ភ បន្ទោសខ្លួនឯង ឬបាក់ទឹកចិត្ត ក៏អាចធ្វើឲ្យបញ្ហានេះកើតមានដូចគ្នា។ ករណីខ្លះមកពីសុខភាពផ្លូវភេទមានបញ្ហា ដូចជាបម្រែបម្រួលអ័រម៉ូន មានរបួស ឬផលរំខានដោយថ្នាំណាមួយ ក៏អាចបង្កបញ្ហានេះដែរ។

អត្ថបទពាក់ព័ន្ធ៖ មានបញ្ហាឆាប់ចេញទឹកកាម ត្រូវព្យាបាលម៉េច?

២- បញ្ចេញទឹកកាមញឹកញាប់ពេកប៉ះពាល់មេជីវិតអត់?

ចម្លើយ៖ មេជីវិតត្រូវការពេលវេលាសមស្របមួយដើម្បីបង្កើនចំនួន និងគុណភាពឲ្យបានល្អ ក្នុងករណីដែលប្រុសៗបង្ខំឲ្យចេញទឹកកាមរាល់ថ្ងៃ ពេលខ្លះអត់មានមេជីវិតគ្រប់គ្រាន់ទេ ឬក៏មានមេជីវិតដែរ តែមេជីវិតទាំងនោះនៅខ្ចី មិនអាចទៅបង្កកំណើតបាន។ ការបញ្ចេញទឹកកាម ២-៣ ដង/អាទិត្យ គឺជារឿងធម្មតា មិនប៉ះពាល់ដល់គុណភាពមេជីវិត ឬផែនការយកកូននោះទេ ព្រោះរយៈពេលនេះរាងកាយយើងមានពេលវេលាគ្រប់គ្រាន់ ដើម្បីផលិតមេជីវិតឲ្យបានច្រើន ថែមទាំងមានគុណភាពទៀត។

៣- ចាក់ទឹកក្រៅពាង អាចបង្ការការមានផ្ទៃពោះ១០០% អត់?

ចម្លើយ៖ ការពន្យារកំណើតបែបធម្មជាតិ (ចាក់ទឹកក្រៅពាង) ដែលតម្រូវឲ្យភាគីខាងបុរសត្រូវដកលិង្គចេញមុនបញ្ចប់ការរួមភេទ ឬឈានដល់ចំណុចកំពូល រួចបញ្ចេញទឹកកាមក្រៅប្រដាប់ភេទខាងស្រី មានប្រសិទ្ធភាពតិចតួចបំផុតក្នុងការការពារមានផ្ទៃពោះ។ អារម្មណ៍កំពុងតែពុះកញ្ជ្រោរោលអំឡុងពេលបើកប្រតិបត្តិការ ស្រាប់តែត្រូវដកចេញភ្លាមនេះ ច្បាស់ណាស់ភាគីខាងបុរសពិតជាពិបាកទប់អារម្មណ៍ខ្លួនឯងបាន ងាយនឹងភ្លាត់ស្នៀតបំផុត។ កាលណាបុរសដកលិង្គមិនទាន់ពេលនោះនឹងបញ្ចេញទឹកកាមចូលប្រដាប់ភេទស្ត្រី ច្បាស់មានផ្ទៃពោះហើយ។

៤- នៅសុខៗម៉េចបានចំណង់ផ្លូវភេទធ្លាក់ចុះ?

ចម្លើយ៖ មិនមែននៅសុខៗចំណង់ផ្លូវភេទធ្លាក់ចុះនោះទេ ច្បាស់ជាមានបញ្ហាអ្វីមួយមិនខាន។ ចំណង់ផ្លូវភេទធ្លាក់ចុះអាចមកពីកត្តារួមផ្សំជាច្រើន ក្នុងនោះមានទាំងកត្តាជីវសាស្ត្រ របៀបរបបរស់នៅ និងអាយុ។ ពេលចាស់ទៅអ័រម៉ូនភេទថយចុះ ឬបើយើងបាក់ទឹកចិត្ត ប្រើគ្រឿងញៀន គ្រឿងស្រវឹង ជក់បារី ស្ត្រេស គេងមិនគ្រប់ មានជំងឺរ៉ាំរ៉ៃប្រចាំកាយ ត្រូវប្រើថ្នាំមួយចំនួនទៀតនោះ រឹតតែធ្វើឲ្យចំណង់ផ្លូវភេទធ្លាក់ចុះ។

អត្ថបទពាក់ព័ន្ធ៖ ប្រុសៗ! រឿងចំណង់ផ្លូវភេទថយចុះ ទាំងនេះជាមូលហេតុ

៥- អាយុកាន់តែច្រើន លិង្គកាន់តែតូច ហើយខ្លីជាងមុន?

ចម្លើយ៖ ពិតណាស់ កាលណាអាយុកាន់តែច្រើនរាងកាយយើងក៏ប្រែប្រួល ស្បែកក៏លែងតឹងណែន ទៅជាយារធ្លាក់ ឬរួញស្វិត។ ឯទំហំលិង្គនឹងកាន់តូច ហើយខ្លីជាងមុន ដោយសារតែមានជាតិខ្លាញ់ទៅប្រមូលផ្ដុំក្នុងសរសៃឈាមអាកទែក្នុងលិង្គ ហើយមានការកើតឡើងសម្បកកូលេជែនក្រិនបន្តិចម្ដងៗ ស្រោបជុំវិញតំបន់លិង្គឡើងរឹង។ ឯឡើងទម្ងន់ជាមួយកត្តារួមចំណែកដែរ ដោយជាតិខ្លាញ់ដែលប្រមូលផ្ដុំនៅផ្នែកពោះខាងក្រោម អាចបណ្ដាលឲ្យប្រវែងលិង្គមើលទៅខ្លីជាងមុន។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

ត្រួតពិនិត្យដោយ

វេជ្ជ. ចាន់ ស៊ីណេត

ឯកទេសសម្ភព និងរោគស្ត្រី · មន្ទីរពេទ្យបង្អែកមិត្តភាពកម្ពុជា-ចិន សែនសុខ

អត្ថបទដោយ ដេត ធន្នី · កែ 29/11/2019

៥សំណួរ ប្រុសៗឧស្សាហ៍សួរបំផុត ពាក់ព័ន្ធនឹងរឿងផ្លូវភេទ

១- រួមភេទ ឆាប់​ចេញ​ទឹកកាម​ពេក​បណ្តាល​មក​ពី​អី?

២- បញ្ចេញ​ទឹក​កាម​ញឹក​ញាប់​ពេក​ប៉ះពាល់​មេជីវិត​អត់?

៣- ចាក់​ទឹក​ក្រៅ​ពាង អាច​បង្ការ​ការ​មាន​ផ្ទៃពោះ១០០% អត់?

៤- នៅ​សុខៗ​ម៉េច​បាន​ចំណង់​ផ្លូវ​ភេទ​ធ្លាក់​ចុះ?

៥- អាយុ​កាន់​តែ​ច្រើន លិង្គ​កាន់​តែ​តូច ហើយ​ខ្លី​ជាង​មុន?

១- រួមភេទ ឆាប់ចេញទឹកកាមពេកបណ្តាលមកពីអី?

២- បញ្ចេញទឹកកាមញឹកញាប់ពេកប៉ះពាល់មេជីវិតអត់?

៣- ចាក់ទឹកក្រៅពាង អាចបង្ការការមានផ្ទៃពោះ១០០% អត់?

៤- នៅសុខៗម៉េចបានចំណង់ផ្លូវភេទធ្លាក់ចុះ?

៥- អាយុកាន់តែច្រើន លិង្គកាន់តែតូច ហើយខ្លីជាងមុន?