រួមភេទមិនប្រយ័ត្ន តិចឆ្លងរលាកថ្លើម

រលាកថ្លើម មានមូលហេតុបង្កច្រើនយើងនឹកស្មានមិនដល់ ហើយមួយក្នុងករណីឆ្លងជំងឺថ្លើម គឺការរួមភេទតែម្តង។ ហេតុនេះ គ្នាយើងមិនថាប្រុសមិនថាស្រី គួរចេះការពារខ្លួនផង ព្រោះសូម្បីតែប្រើស្រោម ក៏អាចឆ្លងដែរ។

១- រលាកថ្លើមឆ្លងតាមការរួមភេទ

គ្រប់ប្រភេទនៃជំងឺរលាកថ្លើម មិនថា A B ឬ C សុទ្ធតែឆ្លងតាមការរួមភេទ ដោយគ្រាន់តែផ្អែកលើកត្តាផ្សេងៗគ្នាប៉ុណ្ណោះ ដូចជា៖

– រលាកថ្លើមប្រភេទ A៖ ឆ្លងតាមការប៉ះពាល់លាមកចូលមាត់ ឆ្លងផ្ទាល់មកយើងតាមរយៈលាមកជាប់នឹងរន្ធគូទ ពេលមានការប៉ះពាល់ចូលដល់ក្នុងមាត់យើង។ ករណីនេះ បើយើងរួមភេទ ដោយប្រើមាត់ ឬរួមភេទតាមរន្ធគូទ អាចមានហានិភ័យឆ្លងមេរោគពីដៃគូយើងតែម្តង។

– រលាកថ្លើមប្រភេទ B៖ រលាកថ្លើមប្រភេទនេះ ងាយឆ្លងបំផុតតាមការរួមភេទ ដូចជា ទឹករំអិលចេញពីប្រដាប់ភេទស្រី្ត ទឹកមាត់ និងទឹកកាម។ រួមភេទតាមមាត់ និងរុន្ធគូទ ប្រឈមហានិភ័យឆ្លងខ្ពស់បំផុត។

យ៉ាងណា រលាកថ្លើមប្រភេទ B មិនឆ្លងតាមការកាន់ដៃ ឬអោបថើបធម្មតានោះទេ។ នៅមិនទាន់ច្បាស់ថា តើវីរុសអាចឆ្លងតាមរយៈការប៉ះពាល់ទឹកមាត់អ្នកជំងឺ ឬក៏អត់នោះដែរ ប៉ុន្តែក្នុងទឹកមាត់គ្នាយើងកើតរលាកថ្លើមប្រភេទ B គឺមានមេរោគ ដូចនេះអាចប្រឈមឆ្លងជំងឺដោយការថើបលក្ខណៈស៊ីជម្រៅ។

– រលាកថ្លើមប្រភេទ C៖ ឆ្លងតាមការប៉ះពាល់ឈាម ដំបៅនៅប្រដាប់ភេទ ឬឈាមរដូវ។ រលាកថ្លើមប្រភេទ C មានអត្រាឆ្លងខ្ពស់ចំពោះគ្នាយើងធ្លាប់មានប្រវត្តិឆ្លងជំងឺកាមរោគតាមការរួមភេទ រួមភេទជាមួយស្រីរកស៊ីផ្លូវភេទ ឬជាមួយអ្នកមានដៃគូរួមភេទច្រើន។

២- ប្រុសៗ និងស្រីៗ អ្នកណាប្រឈមការឆ្លងរលាកថ្លើមខ្ពស់ជាងគេ?

ការប្រឈមឆ្លងជំងឺរលាកថ្លើម មិនអាស្រ័យលើភេទនោះទេ តែអាស្រ័យលើឥរិយាបទរស់នៅរបស់យើង។ ការសិក្សាមួយលើកឡើងថា ប្រុសៗទំនងជាអាចចម្លងជំងឺរលាកថ្លើមប្រភេទ C ទៅកាន់ស្រីៗច្រើនជាង ឬក៏ផ្ទុយពីនេះក៏ថាបាន។ ប្រុសៗចូលចិត្តរួមភេទជាមួយដៃគូភេទដូចគ្នា ទំនងឆ្លងជំងឺរលាកថ្លើមប្រភេទ Bខ្ពស់ជាងគេ អាចចន្លោះពី ១០-១៥ ដងឯណោះ ។

អត្ថបទពាក់ព័ន្ធ៖

វិធីសាស្ត្រការពារកុំឲ្យកើតរលាកថ្លើម B និង C
នុ៎ះ! កុំចេះតែមិនអី អត់ការពារពេលអីៗជាមួយសង្សារ ប្រយ័ត្នឆ្លងជំងឺសាហាវនេះ

រួមភេទមិនប្រយ័ត្ន តិចឆ្លងរលាកថ្លើម Hello គ្រូពេទ្យ

៣-ធ្វើម៉េចដឹងថាដៃគូគ្មានជំងឺរលាកថ្លើម?

រឿងនេះ យើងពិបាកដឹងបន្តិច ព្រោះភាគច្រើនគ្នាយើងមានជំងឺរលាកថ្លើម មើលទៅនៅហាក់មានសុខភាពល្អ មិនមានរោគសញ្ញាអ្វីជាដុំកំភួនទេ ទោះបីស្ថិតក្នុងដំណាក់កាលធ្ងន់បន្តិចក៏ដោយ។ ហេតុនេះ ដើម្បីបង្កបញ្ហា យើងគួរនិយាយបើកចំហជាមួយដៃគូពីហានិភ័យគ្រោះថ្នាក់ជំងឺរលាកថ្លើម និងជំងឺកាមរោគផ្សេងៗ។ យ៉ាងណា បើដៃគូយើងមានស្បែកលឿង ឬខាន់លឿង យើងត្រូវគិតឲ្យបានម៉ត់ចត់មុនពេលសម្រេចចិត្តរួមភេទជាមួយគ្នា។ មានសញ្ញាសម្គាល់ផ្សេងទៀត អាចឲ្យយើងសង្ស័យដៃគូមានផ្ទុកមេរោគថ្លើម ដូចជា គ្រុនក្ដៅ អស់កម្លាំង មិនឃ្លានអាហារ ក្អួតចង្អោរ ឈឺសន្លាក់ និងឈឺចាប់ក្នុងពោះជាដើម។

៤- ប្រើឧបករណ៍សិច ឬម៉ាស៊ីនម៉ាស្សាអាចឆ្លងរលាកថ្លើមដែរទេ?

កត្តានេះ ក៏គួរតែប្រុងប្រយ័ត្នបន្តិច របស់ប្រើទាំងពីរមុខនេះ ក៏អាចចម្លងរលាកថ្លើមប្រភេទ B បាន ព្រោះ មេរោគអាចមានជីវិតបានយូរជាងមួយសប្ដាហ៍។ ហេតុនេះ មុននឹងប្រើឧបករណ៍ ឬតុក្កតាសិច សូមលាងសម្អាតជាមួយទឹកក្ដៅជាមុន ដើម្បីកាត់បន្ថយហានិភ័យឆ្លង។ យ៉ាងណា គួរនៅឆ្ងាយពីដៃគូ រហូតដល់ខ្លួនឯងប្រាកដថា ដៃគូយើងគ្មានផ្ទុករលាកថ្លើមប្រភេទ B ទេ ប្រសើរបំផុត ត្រូវនាំគ្នាចាក់វ៉ាក់សាំងការពារ។

៥- ស្រោមអនាម័យអាចការពារឆ្លងរលាកថ្លើមដែរទេ?

មានការជឿជាក់ថាស្រោមអនាម័យផលិតពីជ័រកៅស៊ូមានប្រសិទ្ធិភាព ៩៩% ការពារប្រឆាំងនឹងជំងឺរលាកថ្លើម។ បើដៃគូគ្នាយើង មិនថាប្រុស មិនថាស្រី មានដៃគូរួមភេទខាងក្រៅផ្សេងទៀត យើងគួរប្រើស្រោមអនាម័យការពារ។ អ្នកជំនាញជឿជាក់ថា ស្រោមអនាម័យធម្មតាជាជម្រើសដ៏ល្អបំផុតហើយ ខណៈស្រោមអនាម័យមានក្លិនក្រអូប មិនអាចចាត់ទុកថាស្រោមមានប្រសិទ្ធិភាពទេ ហើយចៀសវាងការប្រើទឹករំអិលមានជាតិប្រេង ព្រោះអាចធ្វើឲ្យស្រោមសឹក ដាច់រហែកបានបាន។

ក្នុងករណីមានសំណួរ ឬមន្ទិលសង្ស័យជុំវិញបញ្ហាសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Groupមិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

ត្រួតពិនិត្យដោយ

វេជ្ជ. ចាន់ ស៊ីណេត

ឯកទេសសម្ភព និងរោគស្ត្រី · មន្ទីរពេទ្យបង្អែកមិត្តភាពកម្ពុជា-ចិន សែនសុខ

អត្ថបទដោយ CHIN Ven · កែ 29/03/2019

រួមភេទ​មិនប្រយ័ត្ន តិចឆ្លង​រលាក​ថ្លើម

រួមភេទមិនប្រយ័ត្ន តិចឆ្លងរលាកថ្លើម