របៀបរបបនៃការរស់នៅ បានរួមជាចំណែកយ៉ាងសំខាន់ ក្នុងការបង្កើនប្រសិទ្ធភាពនៃការបង្កកំណើត ទាំងនៅលើមនុស្សប្រុស និងមនុស្សស្រី។ ចំណុចមួយក្នុងរបៀបនៃការរស់នៅ ដែលមានសារៈសំខាន់បំផុតសម្រាប់ទ្រទ្រង់គុណភាពនៃមេជិវិត នោះគឺម្ហូបអាហារដែលយើងញ៉ាំរាល់ថ្ងៃនេះឯង។ វាមិនត្រឹមតែជួយឲ្យមានការរៀបចំ DNA ល្អសម្រាប់ផលិតបានមេជីវិតមានសុខភាពល្អតែមួយមុខនោះទេ របបអាហារក៏ចូលរួមចំណែកយ៉ាងសំខាន់ក្នុងការទ្រទ្រង់ចំណង់ផ្លូវភេទ ដើម្បីសម្រួលដល់ដៃគូទាំងពីរអ្នកអាចបង្កើតបុត្រដែលមានសុខភាពល្អ។ ក្នុងអត្ថបទខាងក្រោមនេះ យើងនឹងលើកយកសារធាតុចិញ្ចឹមច្បាស់ជាក់លាក់សម្រាប់ជួយឲ្យបុរសៗ អាចបង្កកំណើតបានល្អ យកមកប្រាប់អ្នកទាំងអស់គ្នា។
ប្រុសៗចង់បានមេជីវិតមានសុខភាពល្អ កុំរំលងអាហារទាំងនេះ
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
១- ជាតិស័ង្កសី
ស័ង្កសីគឺជាសារធាតុសំខាន់ វាមិនត្រឹមតែជួយក្នុងការទ្រទ្រង់គុណភាពមេជីវិតតែមួយមុខនោះទេ វាក៏ជួយដល់ប្រព័ន្ធការពាររបស់យើងដែរ។ កង្វះជាតិស័ង្កសី វាជាបញ្ហាកង្វះសារធាតុដែលកើតញឺកញាប់ជាងគេនៅលើមនុស្សប្រុស ដែលវានឹងអាចបណ្ដាលឲ្យកម្រិតអ័រម៉ូនតេស្តូតេរ៉ូនថយចុះ។ សម្រាប់មនុស្សប្រុសដែលជួបបញ្ហាអ័រម៉ូនតេស្តូតេរ៉ូនថយចុះ ជាតិស័ង្កសីត្រូវបានគេយល់ស្របថា វាអាចជួយបង្កើនកម្រិតអ័រម៉ូនតេស្តូតេរ៉ូន និងជួយដល់ការបង្កកំណើតរបស់មនុស្សប្រុសបានផងដែរ។ មានអាហារមួយចំនួនដែលមានផ្ទុកជាតិស័ង្កសីខ្ពស់ មានដូចជាត្រី ជាពិសេសអយស្ទ័រ ប្រភេទខ្ចៅខ្ចង បង្គារ សាច់សត្វក្រហម ដូចជាសាច់គោ ឬសាច់ចៀម និងមានបន្លែមួយចំនួនផ្សេងទៀតមានដូចជា គ្រាប់ល្ង គ្រាប់ល្ពៅស្រស់ ឬគ្រាប់សណ្ដែកខៀវជាដើម។ ប៉ុន្តែដើម្បីរក្សាសុខភាពឲ្យនៅល្អ គេណែនាំឲ្យយើងញ៉ាំត្រីឲ្យ បន្លែបន្ថែម និងញ៉ាំសាច់ក្រហមក្នុងកម្រិតល្មមបានហើយ។
២- Fructose
Fructose គឺជាសារធាតុចិញ្ចឹមមួយប្រភេទ ដែលមាននៅក្នុងទឹកកាមរបស់មនុស្សប្រុស។ វាជាសារធាតុចាំបាច់សម្រាប់ផ្ដល់ថាមពល អាចឲ្យមេជីវិតហែលបាន។ អាហារដែលមានផ្ទុកជាតិ fructose ច្រើន ដូចជាបន្លែ និងផ្លែឈើ អាចជួយឲ្យមនុស្សប្រុសដោះស្រាយបញ្ហាមួយចំនួនបាន ដូចជាចំនួនមេជីវិតតិចពេក ឬស្ពែមមិនសូវមានចលនា និងស្ពែមងាប់ច្រើនពេក។ មានការសិក្សាជាច្រើនបានលើកឡើងអំពីផលវិជ្ជមានបានមកពីការទទួលទានបន្លែ និងផ្លែឈើប្រចាំថ្ងៃថា វាពិតជាជួយដល់សុខភាពរបស់មេជីវិតបានមែន។ មនុស្សប្រុសគួរញ៉ាំអាហារដែលមានបន្លែច្រើន ឲ្យបានយ៉ាងតិចពីរពេលក្នុងមួយថ្ងៃ សាឡាដគឺជាជម្រើសល្អទាំងសម្រាប់អាហារថ្ងៃត្រង់ និងអាហារពេលល្ងាច។
៣- អាស៊ីតហ្វូលិក
អាស៊ីតហ្វូលិកត្រូវបានគេសិក្សារកឃើញថា អាចជួយបង្កើនគុណភាពរបស់មេជីវិតបានពិតមែន។ មនុស្សប្រុសដែលមានបញ្ហាកង្វះអាស៊ីតហ្វូលិក គឺប្រឈមជាមួយបញ្ហាកម្រិតក្រូម៉ូសូមតិចក្នុងស្ពែមរបស់ពួកគាត់។ វាពិតជាមានគ្រោះថ្នាក់ខ្លាំងណាស់ ដោយសារតែស្ពែមខ្សោយទៅបង្កកំណើតជាមួយស៊ុត អាចបណ្ដាលឲ្យគភ៌កើតមកមិនគ្រប់លក្ខណៈ ឬអាចប្រឈមនឹងបញ្ហារលូតកូនខ្ពស់។ អាហារដែលមានផ្ទុកអាស៊ីតហ្វូលិកមានដូចជា សណ្ដែកឡង់ទីល (lentil bean) សណ្ដែកពីនតូ (pinto bean)សណ្ដែកខ្មៅ សណ្ដែករាងតម្រងនោម (kidney beans) កូនស្ពៃ និងញាំបន្លែជាដើម។
៤- វីតាមីនសេ (Vitamin C)
វីតាមីនC គឺអាចជួយទប់ស្កាត់អុកស៊ីតកម្មទៅបំផ្លាញស្ពែមបាន។ សារធាតុចិញ្ចឹមមួយប្រភេទនេះ គឺជួយបង្កើនគុណភាពស្ពែម សម្រាប់អ្នកដែលជក់បារី និងចង់បានស្ពែមមានសុខភាពល្អ។ វីតាមីនC គឺងាយស្រួលនឹងបាត់បង់គុណភាពពេលយើងចម្អិន និងធ្វើម្ហូបុ។ ដូចនេះអាហារដែលមានផ្ទុកវីតាមីនC យើងអាចញ៉ាំវាឆៅបាន។ ល្ហុង ប្រូខូលី ម្ទេសប្លោកលឿង ស្តរប៊ែរី ក្រូច ផ្លែគីវី ផ្កាខាត់ណា ស្ពៃកាល់ (kale) គឺសុទ្ធជាប្រភេទអាហារដែលសម្បូរជាតិវីតាមីនC។ សម្រាប់ការផឹកទឹកផ្លែឈើកំប៉ុង គឺមិនសូវមានប្រសិទ្ធភាពទេ ដោយសារតែ បរិមាណរបស់វីតាមីនC ត្រូវបានគេបំបែក និងDNA សម្រាប់ការពារមុខងាររបស់វាបានខូចខាតអស់ហើយ។
សារធាតុចិញ្ចឹមទាំងអស់ដែលបានរៀបរាប់នៅខាងលើ គឺសុទ្ធតែអាចជួយបង្កើនអត្រាបង្កកំណើតរបស់បុរសៗបាន។ ដើម្បីបង្កើនប្រព័ន្ធផលិតកម្មលើមនុស្សប្រុស គាត់មិនត្រូវពឹងផ្អែកតែលើចំណីអាហារតែមួយមុខនោះទេ គាត់ក៏ត្រូវផឹកទឹកឲ្យបានគ្រប់គ្រាន់ និងធ្វើលំហាត់ប្រាណឲ្យបានទៀងទាត់ដូចគ្នា។
អត្ថបទពាក់ព័ន្ធ៖ ផ្លែប៉េងប៉ោះ ជួយឲ្យមេជីវិតឈ្មោលខ្លាំង
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយគ្រូពេទ្យជំនាញ។ Hello Health Group មិនចេញវេជ្ជបញ្ជា ធ្វើរោគវិនិច្ឆ័យ ឬព្យាបាលជូនទេ៕
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម