ទោះបីជាខួរក្បាលកូននឹងលូតលាស់ពេញលេញ នៅពេលពួកគេមានអាយុ ២៥ ឆ្នាំក៏ដោយ ដំណាក់កាលសំខាន់នៃការលូតលាស់ខួរក្បាល គឺចាប់ពីពេលកូនកើតរហូតដល់អាយុ ៧ឆ្នាំ ព្រោះនៅអាយុ ៧ឆ្នាំ ខួរក្បាលពួកគេអភិវឌ្ឍបាន ៩០% ហើយ។ នៅចន្លោះពេលនេះ ប៉ាម៉ាក់គួរធ្វើអ្វីខ្លះដើម្បីជួយដល់ការអភិវឌ្ឍខួរក្បាលរបស់កូន?
ប៉ាម៉ាក់ចង់ឲ្យខួរក្បាលកូនលូតលាស់ល្អ កុំរំលងតិចនិកទាំងនេះ
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
កុមារអភិវឌ្ឍខួរក្បាលតាមរយៈការសង្កេត និងការធ្វើសកម្មភាព ដូច្នេះប៉ាម៉ាក់អាចជួយអភិវឌ្ឍខួរក្បាលអូនតូចតាមរយៈសកម្មភាពប្រចាំថ្ងៃដូចជា៖
១. ឆ្លើយតបនិងការយំរបស់អាអូន
ការលួងលោមរបស់ប៉ាម៉ាក់ធ្វើឱ្យទារកមានអារម្មណ៍សុវត្ថិភាព។ ទារកអាចអភិវឌ្ឍខួរក្បាលបានល្អ នៅពេលទារកមានអារម្មណ៍សុវត្ថិភាព មានការយកចិត្តទុកដាក់ និងស្រឡាញ់ពីប៉ាម៉ាក់។
ការយំ គឺជាវិធីតែមួយគត់ដែលអាអូនអាចប្រាស្រ័យទាក់ទងជាមួយប៉ាម៉ាក់ ប្រសិនបើអាអូនមិនទាន់ចេះនិយាយ។ ដូច្នេះពេលកូនយំ ប៉ាម៉ាក់គួរលើកកូនពភ្លាមដែរ ហើយមើលថាមានអ្វីខុសប្រក្រតីឬអត់ និងលួងឱ្យអាអូនបាត់យំ។
ចង់ដឹងអត្ថន័យពណ៌ និងរូបរាងលាមកទារក ចុចទីនេះ!
២. បង្កើនភាពស្និទ្ធស្នាលជាមួយកូន
ការបង្កើនភាពស្និទ្ធស្នាល ធ្វើឱ្យកូនមានអារម្មណ៍សុវត្ថិភាព មានភាពជឿជាក់ និងមានភាពកក់ក្តៅដែលជាកត្តាជួយឱ្យដល់ការអភិវឌ្ឍខួរក្បាល។
ម៉ាក់ៗអាចបង្កើនភាពស្និទ្ធស្នាលជាមួយកូនតាមរយៈការបំបៅដោះ ការឱប ការព ការថើប ឬការកាន់ដៃជាដើម។
៣. មើលភ្នែកកូន
ពេលប៉ាម៉ាក់មើលភ្នែកកូន មានន័យថាប៉ាម៉ាក់កំពុងសន្ទនាជាមួយកូន។ ម្យ៉ាងទៀត កូនរៀនតាមរយៈការមើល។ នៅពេលមើលប៉ាម៉ាក់ អាអូនក៏កំពុងរៀនពីរបៀបដែលប៉ាម៉ាក់ប្រើកាយវិការដើម្បីទំនាក់ទំនងដែរ។
៤. និយាយជាមួយកូន
ការនិយាយជាមួយកូនអាចជួយដល់ការរៀនពាក្យថ្មីៗ ទោះជាអាអូនមិនទាន់ចេះនិយាយក៏ដោយ ដូច្នេះប៉ាម៉ាក់ត្រូវឧស្សាហ៍និយាយជាមួយកូនតាមដែលអាចធ្វើទៅបាន តាមកម្រិតអាយុរបស់កូន។ ពេលអាអូនបញ្ចេញសំឡេងអ្វីមួយ ប៉ាម៉ាក់ត្រូវឆ្លើយតប និងនិយាយតបទៅវិញដើម្បីជំរុញការនិយាយរបស់កូន។
៥. សួរសំណួរ
នៅពេលអាអូនធំបន្តិច ប៉ាម៉ាក់អាចសួរសំណួរដើម្បីឱ្យកូនរៀនគិត។ ប៉ាម៉ាក់អាចចាប់ផ្តើមដោយសួរសំណួរខ្លីៗដែលទាក់ទងនឹងទម្លាប់ប្រចាំថ្ងៃដូចជា អូនឃ្លានឬនៅ? អូនងូតទឹកហើយនៅ? អូនចូលចិត្តញុំាអ្វី? អូនចូលចិត្តពណ៌អ្វី? អូនចង់ទៅណា? ជាដើម។
៦. ឱ្យកូនលេង
ប៉ាម៉ាក់អាចឱ្យកូនលេងជាមួយប្រដាប់ប្រដាក្មេងលេងដែលមានរូបរាង ទំហំ ពណ៌ និងសំឡេងខុសៗគ្នា ឬលេងជាមួយវត្ថុផ្សេងៗដែលមាននៅក្នុង និងជុំវិញផ្ទះ ហើយមានសុវត្ថិភាពសម្រាប់ក្មេង។ អាអូននឹងរៀនរបស់ថ្មីៗតាមរយៈការប៉ះពាល់វត្ថុលេងទាំងនេះ។ ប្រដាប់ប្រដាក្មេងលេងមួយចំនួនដូចជា បាល់ ឈើផ្គុំរូប ជាដើមអាចជួយអាអូនរៀនប្រើដៃ ឬជើង និងជំរុញឱ្យអាអូនមានចលនា។ យ៉ាងណា របស់លេងទាំងនោះត្រូវប្រាកដថាសមស្របទៅតាមអាយុរបស់កូនដែរ បើកូនតូចពេកឲ្យលេងរបស់មានទំហំតូចៗ កូនអាចលេបនាំឲ្យស្លាក់ជាដើម។
៧. អានឱ្យកូនស្តាប់
ការអានឱ្យអូនតូចស្តាប់អាចជួយកូនឲ្យរៀនពាក្យថ្មីៗ និងជំរុញឱ្យមានការគិត និងបង្កើនការស្រមើលស្រមៃ និងគំនិតច្នៃប្រឌិត។
ប៉ាម៉ាក់អាចជ្រើសរើសសៀវភៅដែលសមស្របតាមអាយុកូន មានពណ៌ចម្រុះ អានឱ្យកូនស្តាប់។ ពេលអាន ប៉ាម៉ាក់អាចចង្អុលរូប និងធ្វើសំឡេងត្រាប់តាមតួអង្គក្នុងសៀវភៅ។
៨. ច្រៀងឱ្យកូនស្តាប់
វិធីមួយទៀតដែលប៉ាម៉ាក់អាចជួយអភិវឌ្ឍផ្នែកភាសារបស់អូនតូចគឺតាមរយៈការការច្រៀងចំរៀងកុមារឱ្យអាអូនស្តាប់។ ការច្រៀងអាចជួយ និងជំរុញអាអូនរៀនពាក្យថ្មីៗតាមរយៈការស្តាប់ និងច្រៀងតាម។
៩. លើកសរសើរកូន
កុមារត្រូវការការលើកទឹកចិត្ត ដើម្បីជំរុញការរៀនរបស់ពួកគេ ដូច្នេះពេលអូនតូចចេះ ឬអាចធ្វើអ្វីមួយបាន ប៉ាម៉ាក់ត្រូវសរសើរ ថា កូនពូកែណាស់! ឬល្អណាស់! ជាដើមដើម្បីជំរុញកូនឲ្យខំរៀន ឬធ្វើអ្វីថ្មីៗ។
១០. ឱ្យកូនគេងឱ្យបានគ្រប់គ្រាន់
ការគេងគ្រប់គ្រាន់តាមអាយុអាចជួយឱ្យខួរក្បាលកូនដំណើរការបានល្អ ជួយដល់ការចង់ចាំ និងកាត់បន្ថយភាពតានតឹង។
១១. ឱ្យកូនលេងកីឡា ឬបញ្ចេញសកម្មភាពរាងកាយ
ការលេងកីឡាដូចជា ហែលទឹក លេងបាល់ ឬរត់លេងជាដើម សុទ្ធតែជួយបង្កើនកម្រិតអុកស៊ីសែនក្នុងឈាម ជួយជំរុញចលនាឈាមរត់ទៅខួរក្បាល និងធ្វើឱ្យខួរក្បាលកុមារឆ្លាតវៃ។
ខួរក្បាលកុមារក៏អភិវឌ្ឍលឿនដែរ ប្រសិនបើបានញុំាចំណីអាហារដែលមានសារធាតុចិញ្ចឹមល្អៗដូចជា ត្រី ស៊ុត ផ្លែប័រ បន្លែពណ៌បៃតង និងសណ្តែកដី ជាដើម។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម