ដោយសារភាពមមាញឹកនឹងការងារ ប៉ាម៉ាក់មិនសូវមានពេលញុំាបាយជុំគ្រួសារជាមួយកូនៗទេ។ តើការញុំាបាយជុំគ្រួសារមានសារសំខាន់យ៉ាងណាចំពោះការលូតលាស់របស់អូនតូច?
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
ដោយសារភាពមមាញឹកនឹងការងារ ប៉ាម៉ាក់មិនសូវមានពេលញុំាបាយជុំគ្រួសារជាមួយកូនៗទេ។ តើការញុំាបាយជុំគ្រួសារមានសារសំខាន់យ៉ាងណាចំពោះការលូតលាស់របស់អូនតូច?
តាមការសិក្សាបានឱ្យដឹងថា ការញុំាបាយជុំគ្រួសារជួយដល់អូនតូចដូចជា៖
ក្មេងៗចូលចិត្តមើល ឬលេងទូរស័ព្ទ ពេលពួកគេញ៉ាំអាហារតែឯង និងអាចធ្វើឱ្យពួកគេចំណាយពេលយូរក្នុងការញុំាបាយ ព្រោះជក់មើល ឬលេងទូរស័ព្ទ។ ការមើល ឬលេងទូរស័ព្ទក្នុងរយៈពេលយូរអាចធ្វើឱ្យប៉ះពាល់ភ្នែក និងសុខភាពអូនតូច។ ពេលញុំាបាយជុំគ្នា ប៉ាម៉ាក់អាចហាមអូនតូចមិនឱ្យមើលទូរស័ព្ទបាន។
ភាគច្រើនយើងចូលចិត្តនិយាយជាមួយសមាជិកគ្រួសារនៅពេលញុំាអាហារ។ អូនតូចអាចនិយាយប្រាប់ប៉ាម៉ាក់ពីបញ្ហាដែលពួកគេកំពុងប្រឈម។ ប៉ាម៉ាក់អាចណែនាំ និងជួយដោះស្រាយបញ្ហា ឬកង្វល់របស់កូនៗ។ ប៉ាម៉ាក់ក៏អាចចែករំលែកកង្វល់ជាមួយគ្រួសារ និងកូនៗដែរ។
ការញុំាបាយជុំគ្រួសារក៏ជួយកាត់បន្ថយភាពតានតឹងរបស់កូនតូចដែរ ព្រោះរាងកាយយើងនឹងបញ្ចេញអ័រម៉ូន oxytocin ដែលធ្វើឱ្យយើងមានអារម្មណ៍ល្អ នៅពេលយើងញុំាអាហារជាមួយមនុស្សជាទីស្រឡាញ់។ ការមានភាពតានតឹងអាចជះឥទ្ធិពលដល់ផ្លូវចិត្តអូនតូច។
តាមការសិក្សាបានឱ្យដឹងថា កុមារដែលញ៉ាំអាហារពី ៦ ទៅ ៧ ដងក្នុងមួយសប្តាហ៍ជាមួយគ្រួសាររៀនពូកែជាងកុមារដែលមិនសូវញ៉ាំអាហារញឹកញាប់ជាមួយគ្រួសារ។
ការញ៉ាំបាយជុំគ្រួសារធ្វើឱ្យទំនាក់ទំនងប៉ាម៉ាក់ និងកូនៗមានភាពស្អិតរមួតជាងមុន និងផ្តល់ឱ្យអូនតូចនូវអារម្មណ៍កក់ក្តៅ សុវត្ថិភាព និងពោរពេញទៅដោយក្តីស្រឡាញ់។ អូនតូចនឹងយល់ថាខ្លួនជាចំណែកមួយរបស់គ្រួសារ។
ពេលញ៉ាំអាហារជុំគ្នា អូនតូចនឹងសង្កេតឃើញប៉ាម៉ាក់ញ៉ាំអាហារខុសៗគ្នាដូចជា សាច់ ត្រី បន្លែ ឬសម្លជាដើម។ យូរៗទៅ អូនតូចក៏អាចចាប់ផ្តើមសាកល្បងញ៉ាំអាហារទាំងនោះ ឬអាចញុំាតាមពេលពួកគេធំឡើង។ ស្របពេលនេះ ប៉ាម៉ាក់ក៏អាចបង្រៀនអូនតូចពីសុជីវធម៌ក្នុងការញុំាអាហារដែរ។
តាមការសិក្សានៅប្រទេសកាណាដាបានឱ្យដឹងថា កុមារដែលញុំាអាហារជាមួយប៉ាម៉ាក់ញឹកញាប់ពូកែខាងទំនាក់ទំនង ព្រោះពេលញុំាអាហារជាមួយប៉ាម៉ាក់ អូនតូចមានការសន្ទនា ស្តាប់ រៀបរាប់ សួរ និងឆ្លើយសំណួរ ជាច្រើនជាមួយប៉ាម៉ាក់។
យោងតាមអ្នកជំនាញនៅ Stanford Children’s Health ដែលជាប្រព័ន្ធថែទាំសុខភាពកុមារ និងមានកិច្ចសហការជាមួយ Stanford Medicine និងសាកលវិទ្យាល័យ Stanford បានឱ្យដឹងថា តាមរយៈការលើកទឹកចិត្តអូនតូចឱ្យនិយាយអំពីរឿងប្រចាំថ្ងៃរបស់អូនតូច និងឆ្លើយតបជាមួយអូនតូចដោយយកចិត្តទុកដាក់ ពេលញុំាអាហារជុំគ្នា ប៉ាម៉ាក់កំពុងឱ្យតម្លៃ និងយកចិត្តទុកដាក់លើកូន។
ម៉្យាងទៀត ប៉ាម៉ាក់គួរឱ្យអូនតូចជ្រើសរើសកន្លែងអង្គុយដោយខ្លួនឯង និងជួយរៀបចំអាហារ ឬជូតតុ។
ការញុំាបាយជុំគ្នាវជាពេលវេលាដ៏ល្អក្នុងការចែករំលែករឿងផ្ទាល់ខ្លួន និងសន្ទនាជាមួយគ្រួសារ។ មិនថាប៉ាម៉ាក់រវល់យ៉ាងណាទេ គួរឆ្លៀតពេលញុំាបាយ ឬអាហារជុំគ្រួសារយ៉ាងហោចណាពីរបីដងក្នុងមួយសប្តាហ៍ មិនថាអាហារពេលព្រឹក ថ្ងៃត្រង់ ឬល្ងាចទេ។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕