ពន្យល់លម្អិត រឿងចាស់ៗ និងពេទ្យឲ្យយកកូនទើបកើតហាលថ្ងៃ

ស្បែករបស់ទារកទើបកើតងាយរងគ្រោះណាស់ ដែលទាមទារការការពារពីផលប៉ះពាល់ដ៏គ្រោះថ្នាក់នៃពន្លឺព្រះអាទិត្យ រួមទាំងកម្ដៅ និងសំណើមផងដែរ។ ការដាក់អាអូនជាទីស្រលាញ់នៅឲ្យឆ្ងាយមិនឲ្យត្រូវផ្ទាល់នឹងពន្លឺព្រះអាទិត្យ គឺជាទង្វើដ៏ត្រឹមត្រូវ ប៉ុន្តែម៉ាក់ៗក៏អាចដាក់កូនហាលថ្ងៃនៅពេលមានពន្លឺស្រាលៗ ជាពិសេស នៅពេលព្រឹកព្រលឹម ដើម្បីឲ្យកូនទទួលបានអត្ថប្រយោជន៍ជាច្រើនពីពន្លឺព្រះអាទិត្យ។

ពិតណាស់ កាំរស្មីយូវី មានអត្ថប្រយោជន៍ដ៏អស្ចារ្យដល់សុខភាពរបស់ក្មេង ប្រសិនបើយើងចេះប្រើប្រាស់វាបានត្រឹមត្រូវ ដូចដែលយើងធ្លាប់ដឹងហើយថាចាស់ៗ និងគ្រូពេទ្យតែងណែនាំឲ្យម៉ាក់ៗយកកូនហាលថ្ងៃនោះ។

១. វីតាមីនD

រាងកាយរបស់មនុស្សយើងរាល់គ្នា ត្រូវការវីតាមីនD ហើយដើម្បីបង្កើតវីតាមីនប្រភេទនេះបាន ទារកត្រូវការកាំរស្មីយូវីយ៉ាងតិច១៥នាទីរៀងរាល់ថ្ងៃ ដោយអាស្រ័យលើសម្បុរស្បែករបស់ទារក ហើយចំពោះស្បែកដែលស្រគាំខ្លាំងត្រូវចំណាយពេលនៅក្រោមពន្លឺព្រះអាទិត្យកាន់តែយូរ ប៉ុន្តែមិនត្រូវឲ្យលើសពី៣០នាទីឡើយ។ វីតាមីនD ជួយសម្រួលដល់ការស្រូបយកជាតិកាល់ស្យូមដែលធ្វើឲ្យឆ្អឹង និងធ្មេញរឹងមាំ។លើសពីនេះ វាក៏ធ្វើឲ្យប្រព័ន្ធភាពស៊ាំរបស់ទារកមានដំណើរការប្រសើរ និងអាចការពារកូនជាទីស្រលាញ់របស់ម៉ាក់ៗឲ្យចៀសឆ្ងាយពីជំងឺផ្សេងៗផងដែរ។

២. បង្កើនកម្រិតអ័រម៉ូនសេរ៉ូតូនីន

ពន្លឺព្រះអាទិត្យ ជួយបង្កើនការផលិតអ័រម៉ូនសេរ៉ូតូនីន នៅពេលដែលទារកទទួលបានពន្លឺព្រះអាទិត្យនៅក្នុងបរិមាណត្រឹមត្រូវ។ អ័រម៉ូននេះ គឺជាអ័រម៉ូនរីករាយ ដែលជួយបង្កើនអារម្មណ៍សុភមង្គល និងសុវត្ថិភាពដល់ក្មេង។ បន្ថែមពីនេះ អ័រម៉ូនសេរ៉ូតូនីនក៏ជួយជំរុញដល់ការគេង និងការរំលាយអាហាររបស់ទារកឲ្យកាន់តែប្រសើរឡើងថែមទៀតផង។

៣. បង្កើតកម្រិតអាំងស៊ុយលីន

ជាមួយគ្នានេះដែរ ការទទួលពន្លឺព្រះអាទិត្យតាំងពីក្មេង អាចជួយការពារកូនៗរបស់យើងពីជំងឺទឹកនោមផ្អែមបានមួយកម្រិតដែរ ដោយសារតែពន្លឺព្រះអាទិត្យផ្ដល់វីតាមីនD ទៅក្នុងរាងកាយទារក ដែលអាចជួយគ្រប់គ្រងអាំងស៊ុយលីនកាន់តែប្រសើរឡើង។

កូនហាលថ្ងៃ

៤. ចៀសវាងការកើតជំងឺខាន់លឿង

បន្ថែមពីនេះ ពន្លឺព្រះអាទិត្យអាចជួយបំបែកពពួកបីលីរុយប៊ីន ជាសារជាតិលឿង ដែលកើតឡើងពីធម្មជាតិសម្រាប់បំផ្លាញសារជាតិបំប៉នក្នុងរាងកាយរបស់ទារក។ នៅពេលដែលក្មេងទទួលពន្លឺព្រះអាទិត្យបានគ្រប់គ្រាន់ វានឹងជួយធ្វើឲ្យថ្លើមទារកមានដំណើរការកាន់តែប្រសើរជាងមុន។ ការលូតលាស់នៃបីលីរុយប៊ីនដែលមិនបានត្រួតពិនិត្យ អាចបណ្ដាលឲ្យកើតមានជាតិលឿងនៅលើស្បែកកូនជាទីស្រលាញ់របស់ម៉ាក់ៗ។ ការដាក់អាអូនទើបកើតឲ្យនៅក្រោមពន្លឺព្រះអាទិត្យពេលព្រឹកព្រលឹម រយៈពេលចាប់ពី១៥ ទៅ២០នាទីជារៀងរាល់ថ្ងៃ ដោយគ្មានសំលៀកបំពាក់ អាចបញ្ចៀសកូនៗពីជំងឺខាន់លឿងប្រភេទស្រាលបានយ៉ាងមានប្រសិទ្ធភាព។

៥. កម្រិតថាមពលខ្ពស់ជាមុន

នៅពេលដែលទារកទើបកើត បានប៉ះពាល់នឹងពន្លឺព្រះអាទិត្យ វាអាចជួយគ្រប់គ្រងការផលិតអ័រម៉ូនមេឡាតូនីន ដែលអ័រម៉ូនប្រភេទនេះ អាចជះឥទ្ធិពលដល់ការគេងរបស់ក្មេង។ ពន្លឺព្រះអាទិត្យអាចជួយកាត់បន្ថយនូវអ័រម៉ូនមេឡាតូនីន និងបង្កើនអ័រម៉ូនសេរ៉ូតូនីន ដែលធ្វើឲ្យកម្រិតថាមពលរបស់អាអូនកាន់តែប្រសើរជាងមុនថែមទៀតផង។

បន្ថែមពីនេះ ពេលវេលាដ៏ល្អបំផុត ដែលយើងគួរដាក់កូននៅក្រោមពន្លឺព្រះអាទិត្យ គឺនៅចន្លោះពីម៉ោង៧ដល់ម៉ោង១០ព្រឹក។មួយវិញទៀត ម៉ាក់ៗក៏អាចបិទបាំងភ្នែកអាអូន ដើម្បីកុំឲ្យមានផលប៉ះពាល់ដល់ភ្នែកផងដែរ និងមិនចាំបាច់ដាក់អាអូនហាលថ្ងៃនៅទីធ្លាលំហពេកទេ គឺគ្រាន់តែបើកបង្អួចឲ្យមានពន្លឺព្រះអាទិត្យចេញចូលក៏គ្រប់គ្រាន់ទៅហើយ។

ត្រួតពិនិត្យដោយ គ្រូពេទ្យឯកទេស.វេជ្ជ. ចាន់ ស៊ីណេតឯកទេសសម្ភព និងរោគស្ត្រី · មន្ទីរពេទ្យបង្អែកមិត្តភាពកម្ពុជា-ចិន សែនសុខ

អត្ថបទដោយ នូ សោភ័ណ្ឌ · កែ 08/01/2021

ពន្យល់​លម្អិត រឿងចាស់ៗ និងពេទ្យឲ្យ​យកកូនទើបកើតហាលថ្ងៃ

១. វីតាមីន​D

២. បង្កើន​​កម្រិត​អ័រម៉ូន​សេរ៉ូ​តូនីន​ ​

៣. បង្កើត​កម្រិត​អាំងស៊ុយលីន​

៤. ចៀសវាង​ការ​កើត​ជំងឺ​ខាន់​​លឿង

៥. កម្រិត​ថាមពល​ខ្ពស់​ជា​មុន​