អាយុ ៨ សប្តាហ៍៖ អាអូនលេងសើចមិនបានយូរ ច្រើនតែនៅស្ងៀម ភ្លឹកៗ ធ្វើម៉េចល្អ?
ការលូតលាស់ និងអាកប្បកិរិយា
ភ្លេចៗខ្លួនអាអូនអាយុបាន ២ ខែបាត់ ខួរក្បាលក៏រីកធំ និងធ្វើការច្រើនជាងមុន។ ម៉ាក់ប៉ាមានសង្កេតអត់ អាអូនច្រើនតែនៅស្ងៀម លេងសើចមិនបានយូរនោះទេ ព្រោះរវល់តែភ្លឹកមួយភ្លែតមើលបរិយាកាសជុំវិញខ្លួន។ នេះជាពេលល្អបំផុតក្នុងទាក់ទងជាមួយកូនតូច ដូច្នេះយើងគួរនិយាយ ច្រៀងឬធ្វើកាយវិការពន្យល់អ្វីដែលចង់បង្ហាញប្រាប់កូន។ អាអូនអាចមិនទាន់យល់ច្បាស់អំពីអ្វីយើងកំពុងធ្វើ ប៉ុន្តែគេនឹងអាចរៀនសូត្របានច្រើនពីអ្វីសកម្មភាពអស់ទាំងនេះ។
បេប៊ីអាយុប៉ុណ្ណេះគេអាចនឹង៖
– ងើបមុខបាន ៩០ ដឺក្រេ ពេលគេងលើពោះ
– លើកដៃទាំង២បាន
– ស្ងៀមស្ងាត់ ដើម្បីសង្កេតមើលរបស់ជុំវិញខ្លួន។
១- បង្រៀនកូនពីអី?
នេះជាពេលដែលបេប៊ីរៀនសូត្រពីអ្វីគ្រប់យ៉ាង ដូច្នេះយើងគួរយកពេលនេះនិយាយ ឬលេងជាមួយកូនឲ្យបានច្រើន ដូចជានិយាយ ច្រៀង ឬយករូបភាពផ្សេងៗមកពន្យល់។ ឆ្លៀតពេលបានកាន់តែច្រើនរឹតតែល្អ មិនថាពេលបំបៅដោះ ឬប្តូរខោទឹកនោមនោះទេ។ ការធ្វើបែបនេះអាចជួយបានច្រើនដល់ការលូតលាស់បញ្ញាស្មារតី ការស្តាប់ និងមើលឃើញរបស់អូនតូច។
សុខភាព និងសុវត្ថិភាព
២- ពិភាក្សាជាមួយពេទ្យរឿងអីខ្លះ?
មកដល់ពេលនេះ “Hello គ្រូពេទ្យ’ ជឿថា ម៉ាក់ប៉ាប្រហែលបានយកអាអូនទៅជួបគ្រូពេទ្យច្រើនដងរួចទៅហើយ។ ប៉ុន្តែសប្តាហ៍នេះគ្រូពេទ្យនឹងពិនិត្យទៅលើបញ្ហាមួយចំនួនរួមមាន៖
– ស្តាប់ និងមើលចង្វាក់បេះដូង
– ពិនិត្យដុំក្នុងពោះ ឬក្រលៀន មានភ្លាត់ឆ្អឹងឬអត់?
– ពិនិត្យការលូតលាស់ និងការបញ្ជារបស់ដៃជើង
– ពិនិត្យខ្នង ឆ្អឹងកងខ្នងរកមើលបញ្ហាមិនប្រក្រតី
– មើលប្រស្រីភ្នែក និងរន្ធទឹកភ្នែក
– ពិនិត្យត្រចៀករកមើលពណ៌ ឬមានទឹក
– ពិនិត្យរន្ធច្រមុះរកមើលបញ្ហាក្នុងច្រមុះ
– ពិនិត្យមាត់ និងបំពង់ករកមើលពណ៌ ឬដុំប៉ោង
– មើលកម្រឹតងាក ក
– ពិនិត្យក្រពេញទីរ៉ូអ៊ីត រកមើលកូនកណ្តុរជុំវិញក
– មើលកូនកណ្តុរក្រោមក្លៀក
– ពិនិត្យបង្ហើយលើក្បាល
– ពិនិត្យប្រព័ន្ធដង្ហើម
– ពិនិត្យប្រដាប់ភេទ មើលបញ្ហាមិនប្រក្រតី
– ពិនិត្យការជាសះលើផ្ចិត។
៣- ត្រូវដឹងពីអីខ្លះ?
ពីមួយថ្ងៃទៅមួយថ្ងៃបេប៊ីចេះតែវិវត្តទៅមុខឥតឈប់ឈរ ដូច្នេះហើយមានបញ្ហាជាច្រើនដែលម៉ាក់ប៉ាត្រូវដឹងតាមអាយុរបស់កូន។ នៅសប្តាហ៍នេះយើងនឹងស្វែងយល់ពីបញ្ហាថ្មីៗមួយចំនួនទៀត។
កាត់ស្បែកគ្របលើក្បាលលិង្គ(កាត់ចុង)៖ ក្មេងប្រុសអាយុប៉ុណ្ណេះអាចកាត់ចុងបានហើយ។ បងប្អូនជនជាតិអ៊ីស្លាមដែលមានបំណងកាត់ចុងលិង្គឲ្យកូនអាចកាត់បាន ដោយមានការឈឺចាប់ និងហូរឈាមតិចតួច តែមិនចាំបាច់បារម្ភពេកទេ។ ពេលវះកាត់រួចយើងគួរស្លៀកខោទឹកនោមឲ្យអាអូន ២ ជាន់ដើម្បីការពារការកកិតជាមួយភ្លៅ និងត្រូវសម្អាតលិង្គឲ្យស្អាត ស្ងួត មិនត្រូវឲ្យប៉ះជាមួយទឹករហូតមុខរបួសជាសះស្បើយ។
ត្អើក៖ អ្នកជំនាញពន្យល់ថា ត្អើកគឺជាការឆ្លើយតបរបស់បេប៊ីទៅនឹងបញ្ហាអ្វីមួយ ឬដោយសារការលេបខ្យល់ចូលក្នុងពោះច្រើនពេលបៅ។ ទោះយ៉ាងណាម៉ាក់ប៉ាមិនបាច់បារម្ភពីបញ្ហានេះទេ។
កណ្តាស់៖ បេប៊ីដែលមានបញ្ហាទឹកភ្លោះ និងជាតិរម្អិលនៅក្នុងផ្លូវដង្ហើមក្រោយពេលកើត ឧស្សាហ៍កណ្តាស់។ ដូចនេះមានតែការកណ្តាស់ទេទើបអាចយកសារធាតុរាវទាំងអស់នោះចេញពីផ្លូវដង្ហើមបាន។ ទារកកណ្តាស់ច្រើនពេលមានកម្ទេចកំទីតូចល្អិតចូលក្នុងច្រមុះ ដូចមនុស្សធំដែរ។ ឯពេលខ្លះអាអូនឃើញពន្លឺចាំង ជាពិសេសគឺពន្លឺព្រះអាទិត្យក៏អាចធ្វើឲ្យកណ្ដាស់ដូចគ្នា។
ភ្នែក៖ ម៉ាក់ប៉ាកាលបើសង្កេតឃើញថាភ្នែកកូនសំឡឹងមិនត្រង់ ច្រើនតែបារម្ភខ្លាចកូនស្រលៀងភ្នែក។ មិនមានបញ្ហានោះទេ ភាគច្រើនវាបណ្តាលមកពីកូនង៉ែតមានត្របកភ្នែកក្រាស់ទៅគ្របលើភ្នែកទើបធ្វើឲ្យភ្នែករបស់គេមិនត្រង់គ្នា។ ស្បែកនោះនឹងបាត់ទៅវិញពេលកូនយើងធំ។
ការព្រួយបារម្ភ
៤- អ្វីខ្លះត្រូវបារម្ភ?
ក្មេងៗពិបាកផ្តាច់ដោះខ្លាំងណាស់ ដូច្នេះម៉ាក់ប៉ាសម្រេចចិត្តឲ្យម៉ឹមក្បាលដោះសិប្បនិម្មិត នេះជាជារឿងត្រូវបារម្ភ។ បើឲ្យកូនបៀម តើគួរបៀមពេលណា និងរយៈពេលយូរប៉ុនណា។ យើងអាចប្រើវាដើម្បីលួងអាអូនពេលញ៉ាំ ពេលច្រៀងបំពេរ ឬដាក់បេប៊ីក្នុងរទេះបានរហូតដល់រាប់ម៉ោង។
ប៉ុន្តែក្បាលដោះអាចក្លាយជាសុបិនអាក្រក់របស់ម៉ាក់ប៉ាគ្រប់រូបនៅពេលដែលកូនយើងមិនអាចខ្វះវាបាន។ ក្បាលដោះអាចធ្វើឲ្យប៉ះពាល់ដល់ការរៀនគេងរបស់ទារក អាចឲ្យអូនតូចភ្ញាក់កណ្តាលយប់ដើម្បីរកក្បាលដោះ មិនគេងលុះត្រាតែបានបៀមក្បាលដោះនេះវិញ។ ម្យ៉ាងវិញទៀតពេលយើងឲ្យកូនប្រើក្បាលដោះយូរពេកវានឹងក្លាយជាទម្លាប់អាក្រក់ អាចធ្វើឲ្យអាអូនក្លាយជាមនុស្សឆេវឆាវបាន។
អរគុណចំពោះការតាមដានអត្ថបទនេះ យើងនឹងជួបគ្នានៅសប្តាហ៍ក្រោយទៀត អំពីការវិវិត្តរបស់ទារកក្នុងសប្តាហ៍ទី ៩។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
Murkoff, Heidi. What to Expect, The First Year. New York: Workman Publishing Company, 2009. Print version. Page 194-196.
កំណែប្រែបច្ចុប្បន្ន
27/11/2019
អត្ថបទដោយ ណៃ ទូច
ត្រួតពិនិត្យដោយ គឹម កាណែល
បច្ចុប្បន្នភាពដោយ៖ ជីព ចិត្ត
ត្រួតពិនិត្យដោយ
គឹម កាណែល
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម