ផ្លែឈើ ១១មុខ ល្អបំផុតសម្រាប់ពេលចាប់ផ្តើមផ្តល់អាហារដំបូងឲ្យកូន

ទារកសម្រាលភ្លាម ទឹកដោះម៉ាក់ៗ គឺល្អបំផុតសម្រាប់ការលូតលាស់ និងសុខភាពកូន “Hello គ្រូពេទ្យ’ លើកទឹកចិត្តឲ្យម៉ាក់ៗទាំងបំបៅដោះកូនយូរបំផុតតាមអាចធ្វើទៅបាន។ ពេលអូនតូចដល់អាយុពី ៦ខែ ឡើងទៅ ម៉ាក់ៗអាចឲ្យអាហារបន្ថែមទៅកូនបាន ហើយអាហារល្អបំផុត គឺផ្លែឈើ យកមកកិនឲ្យម៉ត់ មុនបញ្ចុកទៅកូន ខណៈអត្ថបទនេះ នឹងប្រាប់គ្នាយើងពីផ្លែឈើ ១១មុខ សម្បូរវីតាមីល្អបំផុតសម្រាប់សុខភាពកូន។

១- ផ្លែប៉ោម

ផ្លែប៉ោមកិនម៉ត់ ងាយរំលាយ ហេតុនេះ ត្រូវចាត់ទុកជាអាហារល្អសម្រាប់ទារកតូចៗ មិនទាន់មានធ្មេញ។ របបអាហារ BRAT មានដូចជា ចេក បាយ ប៉ោម និងនំប៉័ងអាំង ត្រូវបានណែនាំដោយគ្រូពេទ្យឯកទេសជំងឺកុមារ ឲ្យផ្តល់ជាចំណីបន្ថែមសម្រាប់ទារកអាយុចាប់ពី ៦ខែ ដើម្បីបន្ថយអាការៈរាករូស។ Pectin ជាសារធាតុសរសៃ មានក្នុងផ្លែប៉ោម ក៏អាចជួយដោះស្រាយបញ្ហាក្តៀនលាមកបានផងដែរ។

២- ផ្លែប៊ឺរ

ប៊ឺរ ជាផ្លែឈើល្អសម្រាប់សុខភាព ហើយរឹតតែពិសេសសម្រាប់ទារកតូចៗ។

៣- ផ្លែល្ហុង

ផ្លែល្ហុងមានសាច់ទន់ ងាយក្នុងលេប ហើយក៏អាចយកធ្វើជាអាហារពេលផ្តាច់ទឹកដោះបានដែរ។ ល្ហុងសំបូរទៅដោយវីតាមីន C និងបេតាការ៉ូទែន។ ល្ហុងទម្ងន់ត្រឹមតែ ៣អោន ឬ ៨៥ក្រាម ជួយផ្តល់វីតាមីន C គ្រប់គ្រាន់សម្រាប់តម្រូវការប្រចាំថ្ងៃរបស់ក្មេងទៅហើយ។ ផ្លែល្ហុង មានសារធាតុសរសៃខ្ពស់ ចាំបាច់សម្រាប់មុខងារធម្មតារបស់ពោះវៀន ពោលបន្ទោបង់តែម្តង។ ល្ហុង ក៏មានអង់ស៊ីមមួយចំនួន ជួយដល់ការរំលាយអាហារទៀតផង។

ល្ហុង Hello គ្រូពេទ្យ

៤- ផ្លែសារី

សារី ជាផ្លែឈើ មានសារធាតុអាចនាំឲ្យមានប្រតិកម្មតិចបំផុត ក៏អាចយកធ្វើជាអាហារពេលផ្តាច់ទឹកដោះ ដូចផ្លែល្ហុងបានដែរ។

៥- ផ្លែចេក

ចេក ជាផ្លែឈើដ៏ល្អ សម្បូរទៅដោយសារធាតុចិញ្ចឹមជាច្រើន ហើយក៏ជាផ្លែឈើសក្តិសមសម្រាប់ទារកតូចៗរៀនញ៉ាំអាហារដំបូងៗ។ ចេញសម្បូរ ជាតិស្ករក្ររលាយ អាចផ្តល់ថាមពលក្មេងមានលំនឹង។ ចេក ក៏អាហារដ៏ល្អ ស្រួលយកតាមខ្លួន ដោយសារវាមានសំបកការពារស្រាប់ ថែមទាំងអាចជួយព្យាបាលអាការៈរាករូស និងក្តៀនលាមកបានដែរ។

៦- ផ្លែអាព្រីខត (Apricots)

ផ្លែឈើប្រភេទនេះ បច្ចុប្បន្នក៏មានលក់នៅតាមទីផ្សារក្នុងស្រុកយើងដែរ ហើយវាសម្បូរទៅដោយពពួកបេតាការ៉ូទែន និងសារធាតុសរសៃ ជាតិដែក ក៏ដូចជាប៉ូតាស្យ៉ូម សុទ្ធសឹងល្អខ្លាំងសម្រាប់ទារកតូចៗ។

៧- ផ្លែត្រសក់ផ្អែម

ត្រសក់ផ្អែម សម្បូរសារធាតុចិញ្ចឹមជាងគេក្នុងចំណោមពពួកពូជផ្លែត្រសក់ទាំងអស់ ព្រោះមានទាំងរសជាតិផ្អែមឆ្ញាញ់ ហើយសម្បូរដោយវីតាមីន C និងពពួកបេតាការ៉ូទែន។

អត្ថបទពាក់ព័ន្ធ៖

ប៉ាម៉ាក់ត្រូវដឹង អាហារទាំងនេះគ្មានសុវត្ថិភាពចំពោះក្មេងតូចៗទេ
មកដឹងពីបរិមាណបបរខាប់គ្រប់គ្រឿងត្រូវផ្តល់ឲ្យកូនអាយុ ៦ខែ-១ឆ្នាំ

៨- ផ្លែប្ល៊ូប៊ើរី

ផ្លែប្ល៊ូប៊ើរី សម្បូរទាំងដោយវីតាមីន C និងពពួកបេតាការ៉ូទែន ដូចគ្នា ខណៈសារធាតុពណ៌ខៀវ (Anthocyanin) នៅនឹងសំបក អាចជួយការពារយើងពីជំងឺមហារីក។ លើសពីនេះ ប៊្លូប៊ើរី មានសារធាតុប្រឆាំងអុកស៊ីតកម្ម ច្រើនជាងផ្លែឈើមួយចំនួនធំ និងមានសារធាតុសរសៃ វីតាមីន A ជាដើម។ យ៉ាងណា គួរឲ្យក្មេងញ៉ាំផ្លែឈើប្រភេទនេះ នៅពេលដល់អាយុប្រហែល ៨ ខែ។

៩- ផ្លែប៉ែស

ផ្លែប៉ែស សម្បូរវីតាមីន C ឯសាច់វាវិញងាយនឹងរលាយទៀតផង។

១០- ផ្លែឈើរី

ឈើរី មានរូបរាងតូចៗ ផ្អែមឆ្ញាញ់ និងមានសារធាតុចិញ្ចឹមសំខាន់ជាច្រើន មិនចាញ់ផ្លែឈើផ្សេងៗទេ។

១១- ពពួកផ្លែក្រូច

ពពួកផ្លែក្រូច សម្បូរទៅដោយវីតាមីន C ខណៈក្រូចមួយផ្លែ មានសារធាតុសរសៃដល់ទៅ ១២% នៃបរិមាណជាតិសរសៃ ដែលរាងកាយយើងត្រូវកាយប្រចាំថ្ងៃ។ ហេតុនេះ ឲ្យក្មេងតូចញ៉ាំក្រូចជារឿងល្អបំផុត។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយគ្រូពេទ្យជំនាញ។Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

ត្រួតពិនិត្យដោយ

វេជ្ជ. ចាន់ ស៊ីណេត

ឯកទេសសម្ភព និងរោគស្ត្រី · មន្ទីរពេទ្យបង្អែកមិត្តភាពកម្ពុជា-ចិន សែនសុខ

អត្ថបទដោយ Chamnan Amrith · កែ 16/08/2019