ចំពោះទារក ឬក្មេងតូចៗពេទ្យតែងតែតម្រូវឲ្យញ៉ាំអាហារទន់ៗ ហើយចៀសវាងចំណីរឹង ស្វិត ព្រោះមិនល្អចំពោះសុខភាពក្រពះ-ពោះវៀន។ នៅមានរឿងមួយទៀត គឺនៅពេលកូនញ៉ាំ ឬលេបរបស់រឹងទៅ ពេលកូនជុះមកមានឃើញរបស់អស់ទាំងនោះចេញមកវិញ។ តើនោះមកពីអ្វី?
វេជ្ជបណ្ឌិត សូ សំណាង ឯកទេសជំងឺទូទៅបានបញ្ជាក់ថា ចំណីអាហាររឹងៗ ជាពិសេសគ្រាប់ត្របែក ឬលេបគ្រាប់រុក្ខជាតិបែរជាចេញមកវិញទាំងអស់នោះមកពីក្រពះក្មេង ទឹកអាស៊ីដក្រពះមិនខ្លាំងទេ ដុំល្មមៗមិនអាចរំលាយបានទេ ដូច្នេះចេញមកទាំងមូល។
លោកបានបន្ថែមទៀតថា កាលណាក្រពះមិនអាចរំលាយបាន ហើយពេលបញ្ជូនទៅពោះវៀន របស់រឹងអស់ទាំងនេះធ្វើឲ្យលាមកប្រែជារឹង បណ្ដាលឲ្យទៅជាក្ដៀន។ ចំណីអាហាររឹងៗចំពោះក្មេងក្រោមអាយុ ២ ឆ្នាំមិនល្អចំពោះសុខភាពក្រពះ-ពោះវៀនទេ សូម្បីបាយក៏តម្រូវឲ្យមានសភាពទន់ និងញ៉ាំជាមួយម្ហូបមានជាតិទឹក បន្លែ និងសាច់ ហើយចៀសវាងអាហារក្រៀមៗដែលមិនសម្បូរជីវជាតិ ហើយក្រពះក៏កិនរំលាយអាហារទាំងនោះដោយពិបាក ព្រោះមានសភាពរឹង។
សុខភាពក្រពះ-ពោះវៀនល្អ ក៏ត្រូវពឹងផ្អែកលើប្រព័ន្ធការពាររាងកាយដែរ ដូចនេះនៅពេលប្រព័ន្ធភាពស៊ាំល្អ ផ្ដល់កម្លាំងដល់រាងកាយក្នុងការប្រយុទ្ធប្រឆាំងមេរោគ ក្នុងពេលកើតជំងឺ ។
ដើម្បីឲ្យសុខភាពក្រពះ-ពោះវៀនកូនតូចត្រូវឲ្យកូនញ៉ាំអាហារទន់ៗ ផ្លែឈើ បន្លែគ្រប់ប្រភេទ និងផឹកទឹកឲ្យបានច្រើន។ មួយវិញទៀតសម្រាប់របស់រឹងៗ កុំបណ្ដោយឲ្យកូនលេងឬដាក់ចូលមាត់ទោះជាអាចចេញមកវិញតាមលាមក តែបើប្រហែសអាចបណ្ដាលឲ្យធ្លាក់ចូលក្នុងបំពង់ខ្យល់ នាំគ្រោះថ្នាក់ដល់អាយុជីវិត។
[embed-health-tool-vaccination-tool]
