កូនអាយុក្រោម ១ឆ្នាំ រាងកាយក៏នៅខ្ចី ឯប្រព័ន្ធការពារក៏ខ្សោយ កាលណាមានការប៉ះទង្គិចអ្វីមួយ ឬថែទាំមិនបានដិតដល់ ងាយនឹងមានបញ្ហាបំផុត។ ដើម្បីឲ្យកូនតូច អាយុក្រោម ១ឆ្នាំ លូតលាស់បានល្អ មានសុវត្ថិភាព លោកវេជ្ជបណ្ឌិត ចាន់ ស៊ីណេត ប្រធានផ្នែកសម្ភព និងរោគស្រ្តី ថា ម៉ាក់ប៉ាគួរតែចាប់អារម្មណ៍រឿងសំខាន់ទាំងប៉ុន្មាននេះ។
កូនអាយុក្រោម ១ ឆ្នាំ ម៉ាក់ប៉ាចេះប្រយ័ត្នរឿងទាំងនេះ កូនមានសុវត្ថិភាព
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
– កុំចាប់ពកូន៖ រាងកាយក្មេងនៅខ្ចី សាច់ដុំកក៏ខ្សោយខ្លាំង មិនអាចទ្រទ្រង់ក្បាលក្មេងបានទេ ប្រសិនយើងចាប់ពកូន នៅពេលកមិនទាន់រឹង អាចប៉ះពាល់ដល់ខួរក្បាល។ ផ្ទុយទៅវិញ បើកូនយើងនៅតូច មិនទាន់រឹងក ត្រូវលើបីកូនថ្នមៗ ដោយដៃទាំងពីរទ្រក្បាល និងដងខ្លួនកូន។
– ដាក់កូនឲ្យគេងផ្ងារ៖ ម៉ាក់ប៉ាត្រូវប្រាកដថា រាល់ពេលកូនយើងដេក ត្រូវតែដេកផ្ងារ មិនមែនដេកផ្អៀង ឬផ្អាប់មុខទេ កាលណាកូនរើមិនរួចអាចនឹងថប់ដង្ហើមស្លាប់។
– កុំឲ្យអ្នកជក់បារីមកជិតកូន៖ ផ្សែងបារីមិនត្រឹមតែប៉ះពាល់សុខភាពអ្នកជក់ប៉ុណ្ណោះទេ អ្នកនៅក្បែរ ឬអ្នកបឺតស្រូបផ្សែងបារីពីគេក៏ប៉ះពាល់ដូចគ្នា។ មិនថា នៅក្នុងផ្ទះ ឬទីសាធារណៈ ដាច់ខាតកុំនាំកូនទៅក្បែរអ្នកជក់បារី បើក្នុងផ្ទះវិញ ត្រូវដាក់បម្រាមសមាជិកគ្រួសារកុំឲ្យជក់បារី។
– ការពារកូនពីការស្លាក់៖ ចំណីកូនតូចត្រូវតែម៉ដ្ត ឬជាចំណែកតូចៗដើម្បីបង្ការកុំឲ្យកូនញ៉ាំទៅស្លាក់។ ម្យ៉ាងវិញទៀត យើងមិនត្រូវឲ្យកូនកាន់ ឬលេងរបស់តូចៗដែលអាចដាក់ចូលក្នុងមាត់បាន។
– កុំឲ្យកូនលេងរបស់អ្វីដែលអាចបាំងមុខ៖ របស់បាំងមុខ មានដូចជាកន្សែង ភួយ ឬកំណាត់គ្របផ្សេងៗ មិនត្រូវមាននៅជិតកូនតូចនោះទេ ពេលយើងប្រហែសបន្តិច កូនអាចចាប់ទាញគ្របមុខ ធ្វើឲ្យថប់ដង្ហើម។
– កុំឲ្យកូន ឬនាំកូនទៅក្បែររបស់ក្តៅៗ៖ ទឹកក្តៅ បាយសម្លក្តៅ មិនត្រូវដាក់នៅជិតកូន ឬនាំកូនទៅជិតរបស់ក្តៅទាំងនោះឡើយ ព្រោះបើមានការប៉ះទង្គិច ឬកំពប់អាចឲ្យរលាកបាន។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម