កុមារកើតអូទីស្សឹមខ្សោយបញ្ញា ឬក៏មានសម្ថភាពពិសេស?

ជាធម្មតា កុមារកើតអូទីស្សឹមអាចពិបាកក្នុងការមើលថែ និងប្រាស្រ័យទាក់ទងជាមួយដែលជាហេតុធ្វើឱ្យមានការលើកឡើងថា កុមារកើតអូទីស្សឹមខ្សោយបញ្ញា។ ទន្ទឹមនឹងនោះ ក៏មានការលើកឡើងថា កុមារកើតអូទីស្សឹមកើតក្នុងលក្ខខណ្ឌពិសេស ដូច្នេះពួកគាត់មានសម្ថភាពពិសេសជាងក្មេងធម្មតា។ តើការលើកឡើងទាំងពីរនេះពិតដែរឬទេ?

លោក ហឿ សេធុល អ្នកឯកទេសពិគ្រោះយោបល់ និងអប់រំផ្លូវចិត្តនៅសាលាអប់រំពិសេស KCPS បានបកស្រាយថា មិនមានការសិក្សាស្រាវជ្រាវណាបង្ហាញថា ក្មេងអូទីស្សឹមខ្សោយបញ្ញាទេ ប៉ុន្តែក្នុងចំណោមក្មេងអូទីស្សឹមក៏មានក្មេងមួយចំនួនមានបញ្ហាខ្សោយបញ្ញាដែរ បានន័យថា កុមារមានទាំងអូទីស្សឹមមានទាំងបញ្ហាខ្សោយបញ្ញាពីរមុខចូលគ្នា។ ប៉ុន្តែជាលក្ខណៈទូទៅក្មេងអូទីស្សឹមមិនខ្សោយបញ្ញាទេ បញ្ញារបស់គាត់អភិវឌ្ឍប្រក្រតី។

មួយវិញទៀត ក្មេងអូទីស្សឹមមួយចំនួនអាចមានភាពវាងវៃ គ្រាន់តែពួកគាត់ពិបាកយកភាពវាងវៃរបស់ខ្លួនមកប្រើឱ្យត្រូវ បានន័យថាគាត់ឆ្លាត តែគាត់មិនអាចប្រើភាពឆ្លាតរបស់គាត់ឱ្យត្រូវតាមអ្វីដែលសង្គមត្រូវការ ហើយពេលខ្លះគាត់ប្រើភាពវាងវៃរបស់គាត់តែទៅលើអ្វីដែលគាត់ចង់ធ្វើ ឬុមានចំណាប់អារម្មណ៍ប៉ុណ្ណោះ។ ឧទាហរណ៍ បើយើងធ្លាប់នាំកុមារអូទីស្សឹមជិះតាមផ្លូវណា គាត់ចាំទាំងអស់ ថ្ងៃក្រោយគ្រាន់តែមកដល់ផ្លូវដដែលគាត់នឹងស្គាល់ភ្លាម។

ជាងនេះទៅទៀត មានក្មេងអូទីស្សឹមចន្លោះពី ៥% ទៅ ១០% មានបញ្ញាឆ្លាតវាងវៃជាងក្មេងទូទៅ តែមិនមានន័យថា ក្មេងអូទីស្សឹមទាំងអស់ឆ្លាតជាងក្មេងទូទៅទេ។ តួយ៉ាង អ្នកបង្កើតប្រព័ន្ធអគ្គីសនី Thomas Edison និង រូបវិទូ Albert Einstein សុទ្ធតែគេជឿថាមានបញ្ហាអូទីស្សឹម។

លោក ហឿ សេធុល អ្នកឯកទេសពិគ្រោះយោបល់ និងអប់រំផ្លូវចិត្តនៅសាលាអប់រំពិសេស KCPS (រូបភាព៖ Hello គ្រូពេទ្យ)

ចង់គណនាថ្ងៃសម្រាលកូន ចុចទីនេះ!

ចង់គណនាទម្ងន់ស្រ្តីពពោះ ចុចទីនេះ!

ចង់គណនាថ្ងៃមេជីវិតញីទុំធ្លាក់ ចុចទីនេះ!

ចង់ដឹងអត្ថន័យពណ៌ និងរូបរាងលាមកទារក ចុចទីនេះ!

កុមារមានបញ្ហាអូទីស្សឹម ម៉ាក់ប៉ាគួរថែទាំម៉េច?

លោក ហឿ សេធុល លើកទឹកចិត្តឱ្យអាណាព្យាបាលរកអ្នកឯកទេសឱ្យធ្វើការវាយតម្លៃ និងជួយណែនាំ ព្រោះកុមារអូទីស្សឹមមានលក្ខណៈខុសៗគ្នា យើងមិនអាចធ្វើការប្រៀបធៀបកុមារអូទីស្សឹមម្នាក់ទៅម្នាក់ទៀតបានទេ។ ឧទាហរណ៍ ក្មេងអូទីស្សឹមខ្លះ ឆេវឆាវ ច្រងេងច្រងាង ក្មេងអូទីស្សឹមខ្លះមិនលេងចូលក្មេងដទៃ ចូលចិត្តនៅតែឯង ចំណែកក្មេងអូទីស្សឹមខ្លះរពឹសខ្លាំង ហើយក្មេងអូទីស្សឹមខ្លះទៀតបាត់រសជាតិជាដើម ដូច្នេះវិធីជួយ និងថែទាំគឺខុសៗគ្នា។

ក្មេងអូទីស្សឹមគួរចូលសាលាពិសេសដែរឬទេ?

លោកបន្ថែមថា អាស្រ័យលើភាពធ្ងន់ធ្ងរ បើកុមារអូទីស្សឹមស្ថិតក្នុងកម្រិតធ្ងន់ធ្ងរ គាត់អាចមានភាពពិបាកក្នុងការប្រាស្រ័យទាក់ទងជាមួយក្មេងដទៃ ។ដូច្នេះកុមារគួរទទួលការអប់រំពិសេសនៅកន្លែងដែលមានសុវត្ថិភាពសម្រាប់គាត់ ព្រោះបើយើងដាក់កុមារចូលទៅបរិយាទូទៅ កុមារអាចមានអារម្មណ៍ថារំខាន។ ផ្ទុយមកវិញ បើកុមារអូទីស្សឹមស្ថិតក្នុងកម្រិតស្រាល ឬមិនអាចបង្កគ្រោះថ្នាក់ដល់អ្នកដទៃ គាត់គួរចូលរួមរៀនជាមួយក្មេងធម្មតានៅសាលាចំណេះដឹងទូទៅដោយមានការគាំទ្រពីគ្រូអប់រំពិសេសក្នុងកម្រិតណាមួយ។

លោកបន្តថា យើងអាចជួយកុមារអូទីស្សឹមឱ្យមានភាពប្រសើរឡើង ព្រោះអូទីស្សឹមមិនមែនជាជំងឺទេ តែជាពិការភាពផ្នែកប្រព័ន្ធប្រសាទខួរក្បាលណាមួយ ហើយអ្វីដែលយើងអាចធ្វើបានគឺជួយ ធ្វើអន្តរាគមន ដើម្បីឱ្យបញ្ហារបស់កុមារអូទីស្សឹមរួមតូច ប៉ុន្តែមិនមែនជាព្យាបាលទេ។

ឧទាហរណ៍ ក្មេងអូទីស្សឹមដែលងាយឆេវឆាវ អាចវាយគេវាយឯង ដូច្នេះអ្នកឯកទេនឹងជួយធ្វើយ៉ាងម៉េចឱ្យកុមារចេះរំងាប់អារម្មណ៍។ បើធ្ងន់ធ្ងរ អ្នកឯកទេសនឹងប្រើថ្នាំដើម្បីជួយឱ្យកុមាររំងាប់អារម្មណ៍ឆេវឆាវ។ មួយទៀត បើកុមារអូទីស្សឹមមិនចេះលេងជាមួយក្មេងដទៃ អ្នកឯកទេសនឹងជួយឱ្យកុមារចេះលេងជាមួយអ្នកដទៃ។ ម្យ៉ាងទៀត បើកុមារអូទីស្សឹមខ្សោយភាសា អ្នកអប់រំពិសេសនឹងជួយពង្រឹងភាសាឱ្យគាត់។

អត្ថបទគួរអាន៖

ត្រួតពិនិត្យដោយ គ្រូពេទ្យឯកទេស.

លោក ហឿ សេធុល

ប្រឹក្សាខាងសុខភាពផ្លូវចិត្ត · សាលាអប់រំពិសេស KCPS

អត្ថបទដោយ សុខ វណ្ណ · កែ 13/03/2023