យើងឃើញថា អាអូនតូចៗឧស្សាហ៍មានអាការៈក្ដៅខ្លួនមែនទែន។ ជួនកាល ពេលក្ដៅខ្លួនកូនលេបថ្នាំហើយនៅតែមិនព្រមបាត់ នៅតែក្ដៅ ហើយមានម៉ាក់ប៉ាខ្លះប្រើវិធីសុលគូទកូន ដើម្បីបញ្ចុះកម្ដៅកូន។ តែបើកូនក្ដៅខ្លួនញឹក ងាកសុលគូទៗអាចប៉ះពាល់ដល់កូនអត់?
រាល់ពេលកូនក្ដៅខ្លួន ម៉ាក់ប៉ាងាកសុលគូទៗ អាចប៉ះពាល់ដល់អាអូនអត់?
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
វេជ្ជបណ្ឌិត សូរ ប៉េង ឯកទេសរោគកុមារ បានពន្យល់ឲ្យដឹងថា ម៉ាក់ប៉ាមួយចំនួនទៀត ពេលកូនក្ដៅខ្លួន ដាក់ថ្នាំមិនទាន់បានប៉ុន្មានផង ទៅវាស់ម្ដងទៀត ឃើញកម្ដៅកូននៅដដែល ហើយតាំងនិយាយថា កូនលេបថ្នាំមិនត្រូវ ទើបបែរទៅរកការសុលគូទ។
ចំណែក ទាក់ទងនឹងការសុលគូទកូនញឹកពេលក្ដៅខ្លួនវិញ ម៉ាក់ប៉ាមិនចាំបាច់បារម្ភទេ ព្រោះថ្នាំសុលតូចៗ មិនអាចប៉ះពាល់ទៅដល់កូនបានទេ ហើយភាគច្រើន ម៉ាក់ប៉ាជ្រើសវិធីសុលគូទនេះ នៅពេលដែលកូនក្ដៅខ្លួន តែមិនព្រមញ៉ាំថ្នាំ ដាក់ថ្នាំទៅក្អួតៗ។ ហើយថ្នាំបញ្ចុះកម្ដៅមានច្រើនទម្រង់ដូចជា ទម្រង់ញ៉ាំតាមមាត់ សុលតាមគូទ ថ្នាំចាក់សាច់ដុំ ឬតាមសរសៃវ៉ែន។
“រាល់ទម្រង់នៃថ្នាំបញ្ចុះកម្ដៅសុទ្ធតែមានប្រសិទ្ធភាព គ្រាន់តែការគិតរបស់ម៉ាក់ប៉ាខុសពីគ្រូពេទ្យបន្តិច ដោយពួកគាត់ចង់ឲ្យកូនញ៉ាំថ្នាំភ្លាម កម្ដៅចុះភ្លាមៗដូចគ្នា។ ឧទាហរណ៍. ក្មេងមួយក្ដៅ៣៩អង្សារសេ ហើយម៉ាក់ប៉ាឲ្យថ្នាំញ៉ាំ បើមួយម៉ោងក្រោយ កម្ដៅកូននៅថេរ ឬចុះតិចតួចបានន័យថា ថ្នាំមានប្រសិទ្ធភាពហើយ តែវាមិនអាចដាក់ថ្នាំភ្លាម ត្រជាក់ភ្លាមដែរទេ។”
គ្រូពេទ្យជំងឺក្មេងនៃគ្លីនិកកុមារ មុនីឃីត បញ្ជាក់ថា ម៉ាក់ប៉ាត្រូវយល់ ទាល់តែកម្ដៅឡើងដល់ ៣៨ អង្សារសេ ទើបអាចហៅថា អាអូនក្ដៅខ្លួន ព្រោះមានប៉ាម៉ាកខ្លះ គ្រាន់តែកូនក្ដៅស្ទីងៗ ឬ ក្រោម ៣៨ អង្សារសេ ចាប់ផ្ដើមភ័យខ្លាចកូនឈឺខ្លាំងបាត់ហើយ។
មួយវិញទៀត មិនមែនពេលកូនក្ដៅខ្លួន ដាក់ថ្នាំភ្លាមអាចចុះត្រជាក់ភ្លាមទេ គឺវាត្រូវការពេលវេលា។ ដូចនេះម៉ាក់ប៉ា មុនសម្រេចរកវិធីបញ្ចុះកម្ដៅផ្សេង រង់ចាំមើលសិន បើកម្ដៅនៅដដែល សឹមបែររកវិធីផ្សេង ឬអាចយកកូនមកជួបពេទ្យជំនាញតែម្ដងក៏បាន។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម