ជារឿយៗ បញ្ហាហើមពោះកើតឡើងលើទារកដោយសារប្រព័ន្ធរំលាយអាហាររបស់អាអូននៅខ្ចី និងលេបខ្យល់ចូលទៅក្នុងពោះបៅដោះម្ដាយ ឬទឹកដោះគោ។ ចំណែកឯក្មេងខ្លះ អាចហើមពោះដោយសារផលរំខានពីអាហារដែលម៉ាក់ៗញ៉ាំ ឬគ្រឿងផ្សំក្នុងម្សៅទឹកដោះគោមួយចំនួន។

និយាយដល់បញ្ហាហើមពោះលើទារកនេះ លោកស្រីវេជ្ជបណ្ឌិត កុសល កណិការ ឯកទេសជំងឺកុមារ បានពន្យល់ឲ្យដឹងថា ម៉ាក់ប៉ាភាគច្រើន តែងតែមានការព្រួយបារម្ភពេលឃើញកូនតូចរបស់ខ្លួនមានបញ្ហាហើមពោះ។ ប៉ុន្តែ ការហើមពោះទាំងអស់មិនមែនសុទ្ធតែបង្កគ្រោះថ្នាក់ដល់សុខភាពកូនទេ។

ហេតុនេះទើបវេជ្ជបណ្ឌិតមានសញ្ញាប័ត្រពីបារាំងរូបនេះ បានណែនាំពីសញ្ញាមិនគ្រោះថ្នាក់ និងសញ្ញាអាសន្នទាក់ទងនឹងបញ្ហាហើមពោះលើទារកខ្លះៗ ដើម្បីជួយសម្រួលដល់ការបារម្ភរបស់ម៉ាក់ប៉ាគ្រប់រូបដែលមានកូនតូចដូចជា៖

១.សញ្ញានៃការហើមពោះមិនបង្កបញ្ហា

តាមពិតទៅ ទារកពេលបៅឆ្អែតតែងតែឃើញពោះធំ ដូចហើមពោះដែរ
ទារកយំច្រើនដែលជាហេតុធ្វើឲ្យមានខ្យល់ចូលក្នុងពោះវៀនច្រើនដែលធ្វើឲ្យហើមពោះ
ទារកបៅជាមួយដបទឹកដោះគោមួយចំនួនដែលក្បាលដបនោះមិនជួយរាំងទប់ខ្យល់ក្នុងដបដែលជាហេតុធ្វើឲ្យខ្យល់ក្នុងដបចូលក្នុងពោះវៀនច្រើន ធ្វើឲ្យកូនហើមពោះដូចគ្នា។

២.សញ្ញានៃការហើមពោះបង្កបញ្ហាដល់កូន

ពោះទារកហើមប៉ោងខ្លាំង
ក្ដៅខ្លួន
ក្អួតញឹកញាប់
លាមករាកខុសធម្មតា ឬមានឈាម ឬទល់លាមក
ហើមជើង
ការបៅថយចុះ
សន្លឹម ដេកមិនបើកភ្នែក ឬ
មិនរស់រវើកដូចធម្មតា។ល។

ហើមពោះ

ក្នុងករណីដែលអាអូនចេញសញ្ញាអាសន្នដូចដែលបានរៀបរាប់ខាងលើ លោកស្រីវេជ្ជបណ្ឌិតណែនាំឲ្យម៉ាក់ប៉ា យកកូនទៅពិនិត្យជាមួយពេទ្យជំនាញជំងឺកុមារ។ ទោះយ៉ាងណា ម៉ាក់ប៉ាអាចសម្រួលបញ្ហាហើមពោះលើកូនតូចបានដោយតិចនិកសាមញ្ញៗនេះ៖

ទី១.ដាក់កូនដេក រួចលើកជើងកូនដូចពេលធាក់កង់

ទី២.ដាក់ក្បាលកូនឲ្យខ្ពស់ រួចឲ្យកូនត្អើកចេញមក

ទី៣.ម៉ាស្សាពោះកូន តាមទ្រនិចនាឡិកា ហើយបន្ថែមសម្ពាធទៅតាមប្រតិកម្មកូន

ទី៤.អាចផ្ដល់ថ្នាំបន្តក់ឲ្យកូន (គួរពិគ្រោះជាមួយគ្រូពេទ្យជាមុន)។ល។

បើម៉ាក់ប៉ាចេះសម្គាល់ល្អ! សញ្ញាហើមពោះលើទារក មាន និងគ្មានគ្រោះថ្នាក់

១.សញ្ញា​នៃ​ការ​ហើម​ពោះ​មិន​បង្ក​បញ្ហា

២.សញ្ញា​នៃ​ការ​ហើម​ពោះ​បង្ក​បញ្ហា​ដល់​កូន

១.សញ្ញានៃការហើមពោះមិនបង្កបញ្ហា

២.សញ្ញានៃការហើមពោះបង្កបញ្ហាដល់កូន