ទោះបីជាវីរុសបំប្លែងថ្មី អូមីក្រុងឆ្លងលឿនជាងDeltaក៏ពិតមែន ប៉ុន្តែអង្គការសុខភាពពិភពលោក (WHO) ព្រមទាំងអ្នកជំនាញខាងវីរុសកូវីដ-១៩ ជឿជាក់ថា វ៉ារ្យ៉ង់អូមីក្រុងមានកម្រិតស្រាលខ្លាំង ហើយវីរុសមួយប្រភេទនេះ មិនបានបង្កើនអត្រាមរណភាពចំពោះអ្នកជំងឺនៅប្រទេសអាហ្វ្រិកខាងត្បូងឡើយ។
បន្ថែមពីនេះ WHOក៏បានអំពាវនាវឲ្យបណ្ដាប្រទេសនានាទម្លាក់ចោលការរឹតបន្តឹងលើការធ្វើដំណើរ ដោយសារតែរបាយការណ៍កាន់តែច្រើនឡើងចេញពីអាហ្វ្រិកខាងត្បូងបង្ហាញថា វ៉ារ្យ៉ង់អូមីក្រុង មិនមានគ្រោះថ្នាក់ជាងវ៉ារ្យ៉ង់Deltaនោះទេ។ ជាក់ស្ដែង មិនទាន់មានរបាយការណ៍នៃការសម្រាកព្យាបាលនៅមន្ទីរពេទ្យ ស្លាប់ដោយសារវីរុសបំប្លែងថ្មី អូមីក្រុងឡើយ។
អ្នកជំងឺភាគច្រើន ជួបប្រទះអាការៈឈឺក្បាលធ្ងន់ធ្ងរ ចង្អោរ វិលមុខ និងអត្រាជីពចរខ្ពស់ នេះបើយោងតាមមន្ទីរពេទ្យ និងគ្រូពេទ្យនៅទូទៅអាហ្រ្វិកខាងត្បូង។
អ្នកជំងឺរាប់រយនាក់នៅទូទាំងអាហ្វ្រិកខាងត្បូងបានរាយការណ៍ពីអាការៈចង្អោរ ឈឺក្បាល អស់កម្លាំង និងអត្រាជីពចរខ្ពស់ ប៉ុន្តែពុំមានអ្នកជំងឺណាម្នាក់ជួបប្រទះការបាត់បង់រសជាតិ ឬក្លិន ដែលជារោគសញ្ញានៃវីរុសបំប្លែងថ្មីដទៃទៀតឡើយ។
ជាមួយគ្នានេះដែរ អ្នកជំនាញខាងវីរុស លោកMarc Van Ranst មានប្រសាសន៍ថា ប្រសិនបើវ៉ារ្យ៉ង់ អូមីក្រុងមានរោគសញ្ញាស្រាល ប៉ុន្តែឆ្លងឆាប់រហ័ស វីរុសនេះអាចនឹងផ្ដល់ភាពវិជ្ជមានដល់យើងគ្រប់គ្នាទៅវិញ។ យ៉ាងណាមិញ លោកថា ចាំបាច់ត្រូវតាមដានយ៉ាងដិតដល់អំពីទិន្នន័យអ្នកចេញពីមន្ទីរពេទ្យទាក់ទងនឹងអ្នកជំងឺដែលឆ្លងវីរុសបំប្លែងថ្មី អូមីក្រុងនៅអាហ្វ្រិកខាងត្បូង និងទូទាំងពិភពលោកដែរ។
[embed-health-tool-bmi]
