ចង់ឲ្យកូនកើតមកសក់ច្រើន គួរញ៉ាំអាហារទាំងនេះពេលពពោះ

សម្រាប់ម៉ាក់ៗមានគភ៌ពិតជាគិតគូរខ្លាំង ដោយធ្វើយ៉ាងណាឲ្យប៊េបីមានសុខភាពល្អ និងមានសម្រស់ស្រស់ស្អាតតាំងពីក្នុងពោះខ្លួនម្ល៉េះ។ ក្នុងនោះរឿងចាំបាច់បំផុតទាំងគេទាំងយើងគិត គឺញ៉ាំអាហារប៉ូវ និងថ្នាំជំនួយផ្សេងៗឲ្យកូនពេញលក្ខណៈសិន ហើយបន្ទាប់មកទៀតគិតពីបញ្ហាសក់ ព្រោះម៉ាក់ប៉ាខ្លះសក់មិនសូវក្រាស់ ដូចនេះហើយខ្លាចកូនកើតមកបែបនោះដែរ ទើបខំស្វែងរកប្រភេទអាហារ ឬថ្នាំដែលអាចជួយបង្កើនសក់របស់កូនយើង។

Helloគ្រូពេទ្យ យល់ពីបញ្ហានេះ ហើយក៏បានសាកសួរម៉ាក់ៗជាច្រើនរូបដែលកូនកើតមកមានសក់ខ្មៅ ហើយក្រាស់ឃ្មឹកមកចែករំលែកដល់គ្នាយើង៖

១- ទឹកដោះគោឆៅ និងក្រូចពោធិ៍សាត់

បងស្រី ឡុងហៀង បានប្រាប់ឲ្យដឹងថា ពេលមានផ្ទៃពោះតាំងពីខែដំបូងរហូតដល់ថ្ងៃសម្រាល គាត់តែងតែផឹកទឹកដោះគោឆៅ និងញ៉ាំក្រូចពោធិ៍សាត់ ហើយលទ្ធផលកូនកើតមកពិតជាមានសក់ខ្មៅ ត្រង់ទន់រលោង និងច្រើនខ្លាំងទៀតផង។ មិនត្រឹមតែមានសក់ច្រើនឡើយ កូនប្រុសបងស្រីថែមទាំងមានស្បែកសរលោងស្អាត ទាំងខ្លួនសម្បុរខ្មៅស្រអែម។ ម៉ាក់ៗរូបនេះក៏បានណែនាំដល់ម៉ាក់ៗដទៃដែលកំពុងមានផ្ទៃពោះថា ក្រៅពីអាហារពីរមុខនោះ ត្រូវញ៉ាំបន្លែបៃតង និងត្រីឲ្យបានច្រើន។

២- អាហារមានជាតិប្រេង ឬខ្លាញ់ពីធម្មជាតិ

អ្នកដែលចង់ឲ្យកូនមានសក់ក្រាស់តាំងពីនៅក្នុងពោះ គួរតែញ៉ាំអាហារ ឬផ្លែឈើមានជាតិខ្លាញ់ច្រើនដូចជាផ្លែប៊ឺរ វ៉ល់ណាត់ ប្រេងបន្លែ បន្លែស្លឹកៗ សាច់ត្រី …។ អាហារទាំងនេះជួយឲ្យម៉ាក់ៗមានសុខភាពល្អ និងជួយឲ្យទារកលូតលាស់គ្រប់ផ្នែករួមទាំងសក់ច្រើនទៀតផង។ វិធីនេះជាការចែករំលែកពីម៉ាក់ៗ សុផាឡេង។

៣- ពងទាកូន

នេះជាវិធីមួយដែលចាស់ៗពីមុនតែងនិយាយតគ្នា ហើយពេលញ៉ាំទៅមានប្រសិទ្ធិភាពចំពោះ សុភានី ព្រោះគាត់មានសក់ស្ដើងៗ ហើយខ្លាចកូនបែបនោះដែរ ទើបសាកញ៉ាំតាមចាស់ៗនិយាយ។ ម៉ាក់ៗរូបនេះបន្តទៀតថា ក្រៅពីពងទាកូន គាត់ក៏បានញ៉ាំបន្លែផ្លែឈើជាច្រើនប្រភេទ រួមផ្សំនឹងថ្នាំជំនួយដែលទៅពិគ្រោះជាមួយគ្រូពេទ្យ។

៤- ស៊ុតគ្រប់ប្រភេទ

សម្រាប់ យូលី ដែលទើបសម្រាលកូន ហើយសក់របស់កូនប្រុសគាត់ពិតជាក្រាស់ជាងកូនមុនៗដែលមិនសូវសម្បូរ។ គាត់បានណែនាំបន្តទៀថា ពេលមានផ្ទៃពោះញ៉ាំពងគ្រប់ប្រភេទមិនថា ពងមាន់ ទា ក្ងាន ក្រួចអ្វីទេ គឺញ៉ាំរាល់ថ្ងៃ ព្រោះវាគឺជាប្រភពប្រូតេអ៊ីនដែលត្រូវការសម្រាប់ការលូតលាស់សក់របស់ទារក។

៥- ក្រូចលឿង

មិនមែនមានតែក្រូចពោធិ៍សាត់មួយទេដែលអាចជួយឲ្យកូនក្នុងពោះដុះសក់ច្រើនដូចគ្នា។ នេះជាការលើកឡើងរបស់ គន្ធា ដែលមានកូនប្រុស ២ នាក់ ហើយម្នាក់ៗសុទ្ធតែមានសក់ខ្មៅ និងច្រើនតាំងពីក្នុងពោះ។ ចំពោះមូលហេតុដែលធ្វើឲ្យគន្ធា ញ៉ាំក្រូចលឿងនេះ ព្រោះវាមានផលល្អចំពោះម៉ាក់ៗមានគភ៌ខ្លាំង ដោយសារសម្បូរវីតាមីន A ច្រើន ជួយឲ្យសក់លូតលាស់បានវែងល្អ។

ផ្លែក្រូច

៦- គ្រាប់ផ្លែឈើ

ចង់ឲ្យកូនកើតមកព្រមជាមួយសក់វែងខ្មៅ ក្រាស់ ម៉ាក់ៗគួរតែញ៉ាំពពួកគ្រាប់ផ្លែឈើ (nut) ព្រោះអាហារបំប៉នទាំងនេះសម្បូរដោយជាតិសរសៃ ជាតិរ៉ែ និងប្រូតេអ៊ីន ដែលល្អសម្រាប់ការលូតលាស់សក់។ មិនត្រឹមតែប៉ុណ្ណោះគួរតែញ៉ាំផ្លែឈើ និងលេបថ្នាំតាមការណែនាំរបស់គ្រូពេទ្យជំនាញៗ ទើបកូនមានសុខភាពល្អ។ នេះជាការចែករំលែករបស់ ដារ៉េន។

ត្រួតពិនិត្យដោយ

វេជ្ជ. ចាន់ ស៊ីណេត

ឯកទេសសម្ភព និងរោគស្ត្រី · មន្ទីរពេទ្យបង្អែកមិត្តភាពកម្ពុជា-ចិន សែនសុខ

អត្ថបទដោយ ទូច សុខា · កែ 14/10/2021

​ចង់ឲ្យកូន​កើតមកសក់​ច្រើន គួរ​​ញ៉ាំ​​អាហារ​ទាំង​នេះ​ពេល​ពពោះ​

១- ទឹកដោះគោ​ឆៅ និង​ក្រូចពោធិ៍សាត់

២- អាហារ​មាន​ជាតិប្រេង ឬ​ខ្លាញ់​ពី​ធម្មជាតិ

៣- ពង​ទា​កូន

៤- ស៊ុត​គ្រប់​ប្រភេទ

៥- ក្រូច​លឿង

៦- គ្រាប់​ផ្លែឈើ