អាការៈឈឺក្បាលអាចជាបញ្ហាទូទៅកើតឡើងនៅអំឡុងពេលម៉ាក់ៗពពោះដំបូងៗ ប៉ុន្តែជួនកាលវាអាចជាសញ្ញានៃជំងឺបម្រុងក្រឡាភ្លើង ឬជំងឺលើសសម្ពាធឈាមក្នុងពេលមានផ្ទៃពោះ។ ធម្មតា ពេលយើងឈឺក្បាលខ្លាំង មានតែលេបថ្នាំបំបាត់ការឈឺចាប់ទេ ទើបជួយសម្រួលការឈឺចាប់បានទាន់ចិត្ត តែម៉ាក់ៗពពោះមិនអាចចេះតែប្រើថ្នាំដោយមិនបានពិគ្រោះជាមួយគ្រូពេទ្យជំនាញឡើយ។ ហេតុនេះហើយ បើម៉ាក់ៗពពោះឈឺក្បាលលើកក្រោយៗ អាចសាកល្បងតិចនិកបំបាត់ការឈឺចាប់ដោយធម្មជាតិខាងក្រោមនេះសិន។
តិចនិកធម្មជាតិបំបាត់បញ្ហាឈឺក្បាលអំឡុងពពោះ
១. ចៀសវាងអ្វីបង្កឲ្យឈឺក្បាល៖ ប្រសិនបើក្លិន ឬអាហារណាមួយបណ្ដាលឲ្យម៉ាក់ៗធុំក្លិននោះហើយឈឺក្បាល គួរតែនៅឲ្យឆ្ងាយៗពីក្លិននោះ។
២. ហាត់ប្រាណជាប្រចាំ៖ សាកល្បងធ្វើសកម្មភាពរាងកាយឲ្យបានច្រើនដូចជាហាត់ប្រាណ ដោយការដើរ ឬហាត់យូហ្គាជាដើម។
៣. គ្រប់គ្រងស្ត្រេស៖ ព្យាយាមគ្រប់គ្រងភាពតានតឹងរបស់យើង ព្រោះការគិតច្រើនបណ្ដាលឲ្យយើងឈឺក្បាលកាន់តែខ្លាំង។
៤. ញ៉ាំឲ្យបានទៀងទាត់៖ ម៉ាក់ៗគួរញ៉ាំអាហារទៅតាមពេលវេលាឲ្យបានទៀងទាត់ និងមានរបបអាហារមានតុល្យភាព សម្បូរជីវជាតិ ព្រោះការដែលមានរបបអាហារត្រឹមត្រូវ អាចបង្ការកុំឲ្យអាការៈឈឺក្បាលកើតឡើងបាន។ ម៉ាក់ៗក៏ត្រូវញ៉ាំទឹកឲ្យបានគ្រប់គ្រាន់ក្នុងមួយថ្ងៃដែរ។
៥. គេងឲ្យទៀងទាត់៖ ការចូលគេងមិនគ្រប់គ្រាន់ ឬមិនទៀងទាត់ អាចជាមូលហេតុបង្កឲ្យម៉ាក់ៗឈឺក្បាលពេលពពោះ។
៦. អនុវត្តតិចនិកសម្រួលអារម្មណ៍៖ សាកល្បងតិចនិកដកដង្ហើម ឬការតាំងសមាធិ ឬម៉ាស្សា ដើម្បីសម្រួលអារម្មណ៍ឲ្យបានធូរស្រាល។
ជាចុងក្រោយ បើឈឺក្បាលខ្លាំងម៉ាក់ៗក៏អាចប្រើថ្នាំបំបាត់ការឈឺចាប់ដោយគ្មានវេជ្ជបញ្ជាបានដែរ ព្រោះភាគច្រើននៃថ្នាំបំបាត់ការឈឺចាប់មិនបង្កជាបញ្ហាដល់គភ៌ ឬម៉ាក់ៗទេ ប៉ុន្តែមុននឹងប្រើត្រូវសួរបញ្ជាក់ពីគ្រូពេទ្យឲ្យបានច្បាស់សិន។
បន្ថែមពីនេះ បើម៉ាក់ៗមានអាការៈឈឺក្បាលរ៉ាំរ៉ៃ បូករួមជាមួយរួយក ស្រវាំងភ្នែក និងហឹងត្រចៀក ម៉ាក់ៗគួរទៅពិនិត្យជាមួយគ្រូពេទ្យឲ្យបានឆាប់ ព្រោះវាអាចជាសញ្ញាជំងឺបម្រុងក្រឡាភ្លើង និងជំងឺលើសសម្ពាធឈាមពេលពពោះ ដើម្បីរកមធ្យោបាយព្យាបាល ចៀសវាងហេតុការណ៍មិនល្អកើតឡើងលើម៉ាក់ៗ ឬអាអូនក្នុងផ្ទៃ។
[embed-health-tool-pregnancy-weight-gain]
