ម៉ាក់ៗកំពុងពពោះត្រូវតែសម្រិតសម្រាំង និងប្រយ័ត្នប្រយែងចំណីអាហារបន្តិច នោះទើបមិនប៉ះពាល់ដល់សុខភាពខ្លួន និងកូនក្នុងផ្ទៃ។ ប្រធានផ្នែកសម្ភព និងរោគស្ត្រី នៃមន្ទីរពេទ្យបង្អែកមិត្តភាពកម្ពុជា-ចិន សែនសុខ លោកវេជ្ជបណ្ឌិត ចាន់ ស៊ីណេត បានណែនាំឲ្យស្ត្រីពពោះចៀសវាងនូវអាហារមួយចំនួនខាងក្រោមនេះ។
– អាហារផ្អាប់
អាហារផ្អាប់ មានដូចជា ផ្អក ប្រហុក ត្រីប្រៃ ម៉ាំ ឬជ្រក់គ្រប់ប្រភេទ ស្ត្រីមានផ្ទៃពោះគួរចៀសវាង ឬកាត់បន្ថយឲ្យបានច្រើន ព្រោះអាហារប្រភេទនេះមិនសូវសម្បូរជីវជាតិសម្រាប់បំប៉នខ្លួនយើង និងកូនក្នុងផ្ទៃនោះទេ។ ម្យ៉ាងវិញទៀត ពពួកជ្រក់ បើធ្វើមិនស្អាត ឬទុកយូរថ្ងៃពេកធ្វើឲ្យដុះផ្សិត ញ៉ាំទៅអាចធ្វើឲ្យយើងឈឺ ឬចុកពោះ ទៅជារាករូសក៏មាន។
– ត្រី សាច់ ស៊ុត និងបន្លែឆៅ
ត្រី សាច់ ស៊ុត ឆៅ ឬចម្អិនមិនបានឆ្អិនល្អ និងបន្លែឆៅ ស្ត្រីពពោះគួរតែចៀសវាងដែរ មិនអ៊ីចឹងទេ យើងអាចប្រឈមនឹងការឆ្លងបាក់តេរី និងវីរុសផ្សេងៗ ឬពុលអាហារ។ ក្នុងនោះបាត់តេរី ឬវីរុសខ្លះ អាចនឹងឆ្លងកាត់ទងសុកទៅកូនក្នុងផ្ទៃ ធ្វើឲ្យមានគ្រោះថ្នាក់។
– ត្រីមានជាតិបារ៉តខ្ពស់
ត្រីសមុទ្រប្រភេទខ្លះ ដូចជាត្រីសាលម៉ុន ជាប្រភពនៃអាស៊ីដខ្លាញ់អូមេហ្កា ៣ ល្អចំពោះស្ត្រីមានផ្ទៃពោះ និងកូន ដោយជួយឲ្យប្រព័ន្ធប្រសាទខួរក្បាលលូតលាស់បានល្អ ប៉ុន្តែត្រីរស់នៅក្នុងសមុទ្រទឹកជ្រៅ ដូចជាត្រីបាឡែន ត្រីដាវ ស្ត្រីមានផ្ទៃពោះគួរតែចៀសវាង ព្រោះវាសម្បូរជាតិបារ៉តខ្ពស់ មិនល្អចំពោះគភ៌នោះទេ។
ក្រៅពីអាហារប៉ុន្មានមុខខាងលើនេះ ស្ត្រីពពោះគួរតែចៀសវាងគ្រឿងស្រវឹង បារី និងកាត់បន្ថយការញ៉ាំកាហ្វេ ដោយជំនួសមកវិញនូវការញ៉ាំត្រី សាច់ ស៊ុត បន្លែគ្រប់មុខ ហើយចម្អិនឲ្យបានឆ្អិនល្អ ញ៉ាំផ្លែឈើឲ្យបានច្រើន ញ៉ាំថ្នាំជាតិដែកជាដើម។
[embed-health-tool-due-date]
