ជឿថា ម៉ាក់ប៉ាគ្រប់រូប ចង់ឲ្យកូនកើតមកដោយសុខភាពល្អ មិននាំជំងឺមកជាមួយ ប៉ុន្តែម៉ាក់ៗមួយចំនួនមិនបានយល់ច្បាស់ពីសញ្ញាផ្សេងៗដែលកើតឡើងអំឡុងពេលពពោះ ជាហេតុអាចបណ្ដាលឲ្យមានរឿងមិនល្អកើតឡើង។ ពេលខ្លះ រាល់សញ្ញាមិនល្អដែលម៉ាក់ៗពពោះជួប សុទ្ធតែអាចបញ្ជាក់ពីសុខភាពអាអូនក្នុងផ្ទៃបាន ថាល្អ ឬមិនល្អ។
និយាយមកដល់បញ្ហានេះ លោកវេជ្ជបណ្ឌិត ឃួន សុវណ្ណារិទ្ធ ជំនាញផ្នែកសម្ភព និងរោគស្ត្រី បានឲ្យដឹងថា ភាគច្រើន ឲ្យតែទទួលបានដំណឹងថា ម៉ាក់ៗមានផ្ទៃពោះ តែងតែមានអារម្មណ៍សប្បាយរីករាយណាស់ ជាពិសេសនៅពេលកូនក្នុងផ្ទៃកម្រើក ដូចមានកម្លាំងកំហែង ចង់ចេញមកក្រៅឆាប់ៗ។
ទន្ទឹមនឹងភាពរីករាយ ម៉ាក់ៗត្រូវចេះប្រយ័ត្ន និងតាមដានចលនារបស់កូនដោយខ្លួនឯងផ្ទាល់ ព្រោះក្រៅពីពិនិត្យជាមួយគ្រូពេទ្យ ការតាមដានចលនាអាអូនក្នុងផ្ទៃ ដោយខ្លួនឯងផ្ទាល់ក៏អាចបញ្ជាក់ឲ្យដឹងពីសុខភាពកូនបានដែរ។ ម៉ាក់ៗត្រូវតែយកចិត្តទុកដាក់ មិនគួរមើលរំលងពេលមានសញ្ញាខុសប្រក្រតីដូចជា ៖
- ចុកពោះខ្លាំងផ្នែកខាងក្រោម
- មានធ្លាក់ឈាមពីទ្វារមាសម៉ាក់ៗ
- ស្បូនកន្ត្រាក់ខ្លាំង
- អាអូនមានចលនាតិច ឬគ្មានសោះ
- សុដន់លែងតឹងរឹង
- ទារកមិនកម្រើកចលនាធាក់ខ្លួននៅអាយុ ២២ សប្ដាហ៍។
វេជ្ជបណ្ឌិតឯកទេសផ្នែកសម្ភពរូបនេះ បន្តថា ម៉ាក់ៗត្រូវសង្កេតដោយអារម្មណ៍ខ្លួនឯងថាតើ អំឡុងពេលពពោះ យើងមានជួបសញ្ញារៀបរាប់ខាងលើនេះទេ ព្រោះសញ្ញាទាំងប៉ុន្មាននេះ ជាសញ្ញាបញ្ជាក់ថា អាអូនក្នុងផ្ទៃមានសុខភាពមិនល្អឡើយ ដូចនេះ ម៉ាក់ៗត្រូវតែទៅពិនិត្យតាមដានជាមួយគ្រូពេទ្យជំនាញភ្លាម។
លោកវេជ្ជបណ្ឌិត បានបន្ថែមឲ្យដឹងថា ជាមធ្យម ទារកតែងតែមានចលនា ទាំងព្រឹក ថ្ងៃ និងពេលយប់ ហើយធាក់ ២-៤ដង/៣០នាទី។ បើ៣០នាទីម្ដង មិនមានចលនាទេ ម៉ាក់ៗត្រូវតែសម្រាកបន្តិចរួចតាមដានយ៉ាងតិច៣ដង/ថ្ងៃ រយៈពេលពី២-៤ម៉ោង។ ប៉ុន្តែ បើក្នុងរយៈពេល៤ម៉ោង អាអូនមិនប្រធាក់សោះ ដូចនេះម៉ាក់ៗ ត្រូវតែទៅពិគ្រោះជាមួយគ្រូពេទ្យជំនាញ ដើម្បីពិនិត្យ ឬតាមដានចង្វាក់បេះដូងកូនថាតើអាអូនមានសភាពខ្សោយ ឬទេ។
[embed-health-tool-due-date]
