មនុស្សជាច្រើនព្រោះតែចង់បានសុខភាពល្អ ចង់ស្អាត ខំទិញថ្នាំ ឬអាហារបំប៉នមកញ៉ាំ។ តែទង្វើអស់ទាំងនោះត្រូវបានលោកវេជ្ជបណ្ឌិតផ្នែកទូទៅ លី ឬទ្ធីគុណ បានឲ្យដឹងថា ទង្វើនោះមិនមែនជារឿងត្រឹមត្រូវឡើយ ហើយផ្ទុយទៅវិញថ្នាំ និងអាហារបំប៉នដែលមិនបានឆ្លងកាត់ការពិសោធអាចផ្ដល់ផលរំខានវិញ។
លោកបានបន្តទៀតថា មនុស្សឥឡូវសុខចិត្តញ៉ាំនេះញ៉ាំនោះ ដោយមិនគិតពីសុខភាព បន្ទាប់មកពេលមានបញ្ហាទើបស្វែងរកមន្ទីរពេទ្យ ឬគ្រូពេទ្យពូកែព្យាបាល។ ជាពិសេសរកទិញថ្នាំលេបដើម្បីទទួលបានភាពស្រស់ស្អាត ទាំងដែលមិនគិតពីសារធាតុចម្រាញ់ចេញជាថ្នាំសុទ្ឬអត់និងមានផលប៉ះពាល់ដល់កម្រិតណានោះទេ។
ទង្វើខុសទាំងនោះយើងឃើញមានមួយចំនួននោះ គឺលេបថ្នាំសម្រក លេបថ្នាំឲ្យស ថ្នាំជំនួយសុខភាព ទាំងដែលយើងខ្លួនឯងមិនញ៉ាំអាហារមានតុល្យភាព មិនហាត់ប្រាណ និងមិនគេងឲ្យបានច្រើន។
អត្ថបទពាក់ព័ន្ធ៖ មូលហេតុ យើងគួរញ៉ាំអាហារតែ ២ ពេលក្នុង១ថ្ងៃ
លោកក៏បានបន្ថែមទៀតថា បើចង់បានសុខភាពល្អគួរណាស់តែហាត់ប្រាណ ឬធ្វើសកម្មភាពផ្សេងៗដែលអាចបញ្ចេញញើស និងជាតិពុលពីក្នុងខ្លួន ល្អជាងញ៉ាំថ្នាំដែលអាចធ្វើឲ្យប៉ះពាល់ដល់សុខភាពផ្សេងៗដូចជា ឈឺក្បាល វិលមុខ ក្អួតចង្អោរជាដើម។
ម្ចាស់សេវាកម្មថែទាំមនុស្សចាស់តាមគេហដ្ឋានរូបនេះ ក៏បន្តទៀតថា បើចង់បានសុខភាពល្អ យើងអាចជ្រើសរើសវិធីបែបធម្មជាតិដូចជាញ៉ាំបន្លែផ្លែឈើជំនួសអាហារមួយចំនួន ឬកាត់បន្ថយការញ៉ាំចំណីខាងក្រៅដែលមិនចាំបាច់។ ក្រៅពីនោះ ការសម្រាកឲ្យបានគ្រប់គ្រាន់ និងលំហែផ្សេងៗក៏គួរតែមាន ដើម្បីឲ្យខួរក្បាលបានស្រឡះល្អ គិតអ្វីក៏ចេញ មិនឈឺក្បាល មិនធុញថប់ មិនតានតឹង មិនស្រ្តេស ដែលអាចវិវតិ្តជាជំងឺបាក់ទឹកចិត្តបាន។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-bmi]
