ខណៈតំបន់អាស៊ី រងការរាតត្បាតដោយជំងឺគ្រុនឈាម នៅតំបន់អឺរ៉ុប និងអាមេរិកវិញ កំពុងរងការរាតត្បាតដោយជំងឺកញ្ជ្រឹល រហូតដល់អង្គការសុខភាពពិភពលោក (WHO) ប្រកាសថា ប្រទេសអាល់បានី ឆេក ក្រិច និងអង់គ្លេស បាត់បង់ឋានៈក្នុងការលុបបំបាត់ជំងឺកញ្ជ្រឹល។
លោកស្រី Kate O’Brien មន្ត្រីជាន់ខ្ពស់អង្គការ WHO បញ្ជាក់ថា ប្រទេសអឺរ៉ុបទាំង ៤ បានប្រកាសគ្មានករណីជំងឺកញ្ជ្រឹលអស់រយៈពេល ១២ខែមកហើយ។ ប៉ុន្ដែពេលនេះ ប្រទេសទាំង ៤ បានបាត់បង់ឋានៈក្នុងការលុបបំបាត់ជំងឺកញ្ជ្រឹល។
លោកស្រីបន្ថែមថា “នេះជាជួងអាសន្នមួយ ប្រកាសប្រាប់ពិភពលោក ដោយសារការសម្រេចបាននៅថ្នាក់ជាតិ មិនគ្រប់គ្រាន់ទេ វាត្រូវសម្រេចគ្រប់សហគមន៍ គ្រួសារ និងកុមារ“។
អង្គការសុខភាពពិភពលោក ប្រកាសថា ករណីជំងឺកញ្ជ្រឹល ប្រមាណ ៣៦៥.០០០ករណី បានកើតឡើងនៅទូទាំងពិភពលោក នៅឆ្នាំ២០១៩ កើនឡើងប្រមាណ ៣ដង បើធៀបនឹងឆ្នាំ២០១៨។ ការផ្ទុះឡើងនៃជំងឺកញ្ជ្រឹលនេះ ដោយសារក្មេងមួយចំនួន ពុំទទួលបានវ៉ាកសាំង និងមួយចំនួនទៀត ទទួលព័ត៌មានមិនត្រឹមត្រូវអំពីជំងឺ និងវិធីបង្ការជំងឺនេះ។
អត្ថបទពាក់ព័ន្ធ៖
[embed-health-tool-bmi]
