ប្រុសៗយើងមួយចំនួនអាចនឹងមានចម្ងល់ទៅនឹងបរិមាណទឹកកាមរបស់ខ្លួន។ ប្រុសៗមួយចំនួនគិតថាបរិមាណទឹកកាមកាន់តែច្រើនអាចជួយដល់លទ្ធភាពបង្កកំណើតកាន់តែខ្ពស់។ តើនេះជាការពិតឬយ៉ាងណា?

នៅពេលសប្រុសយើងបញ្ចេញទឹកកាមច្រើនជាងធម្មតា (ច្រើនជាង ៦,៣មិល្លីលីត្រ) នៅពេលរួមភេទម្ដងៗ នោះគឺមានន័យថាមានទឹកកាមច្រើនជ្រុល ដែលពាក្យបច្ចេកទេសហៅថា Hyperspermia។ បញ្ហាទឹកកាមច្រើននេះ គឺជាបញ្ហាដែលកើតមានកម្រចំពោះមនុស្សប្រុស ។ អាការៈនេះគឺមិនមានបង្កផលអវិជ្ជមានដល់សុខភាពបុរសទេ អាការៈនេះអាចមានផលប៉ះពាល់ដល់លទ្ធផលបង្កកំណើតរបស់មនុស្សប្រុស តែក៏មិនមែនគ្រប់ករណីដែរ។ ប្រុសៗមួយចំនួនអាចមានបរិមាណទឹកកាមច្រើនតែមានចំនួនមេជីវិតតិចជាងធម្មតា ហើយមនុស្សប្រុសដែលមានបរិមាណទឹកកាមច្រើនជាងធម្មតានេះ ក៏ច្រើនតែមានតម្រេកផ្លូវភេទច្រើនជាងធម្មតាដែរ។

អត្ថបទពាក់ព័ន្ធ:

ស្បែកគ្របលិង្គវែង មិនព្រលាត់ បើអត់កាត់ចេញ មានបញ្ហាទេ?

អ្នកជំនាញខ្លះអះអាងថាបរិមាណទឹកកាមជាមធ្យមអាចមាន៣,៥មិល្លីលីត្រ ឬ១ភាគ៣ស្លាបព្រាតែ ហើយអ្នកមានបរិមាណទឹកកាមច្រើនជាងនេះ មិនប្រាកដថាមានមេជីវិតច្រើនដែរនោះទេ។ ជាធម្មតា ចំនួនមេជីវិតឈ្មោល មាននៅចន្លោះពី១៥លានទៅច្រើនជាង២០០លានមេជីវិតក្នុងបរិមាណទឹកកាមមួយមិល្លីលីត្រ។ ចំណែកឯចំនួនមេជីវិតទាបគឺមានតិចជាង១៥លានក្នុងទឹកកាមមួយមិល្លីលីត្រ ឬតិចជាង៣៩លានក្នុងពេលបញ្ចេញទឹកកាមម្ដង។ ដូចនេះហើយ ការដែលមានចំនួនមេជីវិតទាបទៅវិញទេ ដែលបន្ថយលទ្ធភាពបង្កកំណើត។

យ៉ាងណាមិញ ប្រសិនជាប្រុសៗមានបរិមាណទឹកកាមច្រើនតែចំនួនមេជីវិតធម្មតា អាការៈទឹកកាមច្រើនមិនប៉ះពាល់លទ្ធភាពបង្កកំណើតទេ ហើយទោះបីជាមានមេជីវិតតិច មិនមែនមានន័យថាមិនអាចបង្កកំណើតបានដែរ គឺនៅតែអាចបង្កកំណើតបានគ្រាន់តែត្រូវការពេលយូរជាងធម្មតា។ ផលវិបាកនៃការមានអាការៈនេះគឺអាចបង្កើនហានិភ័យរលូតកូនទៅលើដៃគូបាន។

ចំណែកឯមូលហេតុបង្កអាការៈ hyperspermia មានរយៈពេលយូរគឺមិនទាន់ដឹងច្បាស់នៅឡើយទេ។ ជាធម្មតា ប្រុសៗយើងអាចនឹងមានអាការៈនេះរយៈពេលខ្លីប៉ុណ្ណោះ និងត្រលប់មកធម្មតាវិញ។ អ្នកវិទ្យសាស្ត្រមួយចំនួនជឿថានេះអាចមកពីរបបអាហារប្រចាំថ្ងៃ និងទម្លាប់នៃការរស់នៅប្រចាំថ្ងៃដូចជាការញ៉ាំអាហារបំប៉នដើម្បីជំនួយសរីរាង្គភេទ។ អ្នកស្រាវជ្រាវផ្សេងទៀតជឿថាមកពីការរលាកនៅក្រពេញប្រូស្តាតដែលបង្កើនការផលិតទឹកកាម។ ទោះយ៉ាងណាទាំងនេះគ្រាន់ជាការសន្មតមិនទាន់បានសិក្សាលម្អិតនោះទេ។

ប្រុសៗអាចទៅពិគ្រោះជាមួយគ្រូពេទ្យប្រសិនជាមានការបារម្ភទៅលើបញ្ហានេះ ឬព្យាយាមយកកូនតែមិនទាន់បានសម្រេចក្នុងរយៈពេលមួយឆ្នាំ។

ពិតឬអត់? ប្រុសៗមាន​ទឹកកាមច្រើនឆាប់មានកូន​

ពិតឬអត់? ប្រុសៗមានទឹកកាមច្រើនឆាប់មានកូន