ម៉េចបានស្រីៗចុកពោះក្រោយពេលមករដូវ? គួរដោះស្រាយបែបណា?

ស្រីៗយើងមួយចំនួន អាចមានអាការៈចុកពោះក្រោយពេលមករដូវ ដែលបញ្ហាមួយនេះពុំមានអ្វីគួរឲ្យបារម្ភឡើយ។ ប៉ុន្តែ ជួនកាល អាការៈចុកពោះខ្លះ ចាំបាច់ត្រូវធ្វើការព្យាបាល ទើបបានធូរស្រាល។ តើការចុកពោះក្រោយមកពេលរដូវបណ្តាលមកពីមូលហេតុអ្វី? ហើយយើងអាចគ្រប់គ្រងស្ថានភាពមួយនេះតាមវិធីណា?

មូលហេតុបង្កនៃការចុកពោះក្រោយពេលមករដូវ

១. ធ្លាក់មេជីវិតញី

មូលហេតុទូទៅមួយនៃការចុកពោះក្រោយពេលមករដូវ អាចបណ្តាលមកពីការធ្លាក់មេជីវិតញី។ អំឡុងពេលនេះ ស្បូនរបស់យើងកន្ត្រាក់ និងបណ្តាលឲ្យមានការឈឺចាប់នៅត្រង់ពោះផ្នែកខាងក្រោម។ ប្រហែលជា៤០%នៃស្រីៗក្នុងវ័យបន្តពូជ អាចប្រឈមនឹងការឈឺចាប់បែបនេះជារៀងរាល់ខែ។

២. ពពោះ

អ័រម៉ូនដែលបញ្ចេញក្នុងអំឡុងពេលពពោះថ្មីថ្មោង អាចបង្កឲ្យមានអាការៈចុកពោះតិចតួចទៅធ្ងន់ធ្ងរ។ មូលហេតុនៃការចុកពោះនេះ ទាក់ទងទៅនឹងការបង្កកំណើត នៅពេលដែលស៊ុតញីភ្ជាប់ទៅនឹងស្បូន។ ក្នុងអំឡុងពេលនេះ យើងក៏អាចសង្កេតឃើញមានធ្លាក់ឈាមពីទ្វារមាសតិចតួចផងដែរ។ យ៉ាងណាមិញ អាការៈចុកពោះខ្លាំង ធ្លាក់ឈាមតិចតួច ឬមានធ្លាក់សារធាតុរាវ និងជាលិកាពីទ្វារមាស ក៏អាចបង្ហាញពីការរលូតកូនដូចគ្នា។

ចង់គណនា BMR ចុចទីនេះ !

ចង់គណនារង្វាស់ចង្វាក់បេះដូង ចុចទីនេះ !

ចង់ពិនិត្យជំងឺមហារីកសុដន់ ចុចទីនេះ !

ចង់ពិនិត្យជំងឺមហារីកមាត់ស្បូន ចុចទីនេះ !

៣. កូនក្រៅស្បូន

ការមានផ្ទៃពោះក្រៅស្បូន កើតឡើងនៅពេលដែលអំប្រ៊ីយ៉ុងកកំណើតនៅខាងក្រៅស្បូន ដែលអាចបណ្តាលឲ្យស្រីៗយើងចុកពោះក្រោយពេលមករដូវ។ ការឈឺចាប់ ធ្លាក់ឈាម និងចង្អោរ អាចជារោគសញ្ញានៃការមានផ្ទៃពោះក្រៅស្បូន។

៤. ជំងឺEndometriosis

ជំងឺEndometriosis ជាស្ថានភាពដែលកោសិកាពាសក្នុងស្បូនលូតលាស់នៅខាងក្រៅស្បូន។ កោសិកាទាំងនេះ អាចផ្សាំនៅលើអូវែ ដៃស្បូននិងសរីរាង្គផ្សេងទៀតដូចជាពោះវៀន និងប្លោកនោម។ ជំងឺមួយនេះ ជាមូលហេតុទូទៅដែលនាំឲ្យគ្នាយើងមានការឈឺចាប់ និងចុកពោះក្រោយពេលមករដូវ ហើយប៉ះពាល់ដល់ស្រីៗដែលមានអាយុចន្លោះពី១៥ឆ្នាំ ទៅ៤៤ឆ្នាំច្រើនជាង១១%តាំងពីកំណើតមកម្ល៉េះ។

៥. ដុំគីសអូវែ

ដុំគីសអូវែ ជាថង់ដែលផ្ទុកទៅដោយសារធាតុរាវ ដែលវិវត្តន៍នៅលើ ឬខាងក្នុងអូវែ។ ស្ថានភាពមួយនេះ អាចបណ្តាលឲ្យមានការឈឺចាប់ខ្លាំង ជាពិសេសនៅពេលដែលដុំគីសបែក។ ការចុកពោះក្រោយពេលមករដូវ អាចជាសញ្ញានៃដុំគីសអូវែ ហើយភាគច្រើនមិនតម្រូវឲ្យមានការព្យាបាលឡើយ។

៦. ជំងឺរលាកនៅតំបន់អាងត្រគាក

អាការៈចុកពោះក្រោយពេលមករដូវ ក៏អាចបណ្តាលមកពីជំងឺរលាកនៅតំបន់អាងត្រគាក។ ស្ថានភាពនេះ ជាការឆ្លងមេរោគធ្ងន់ធ្ងរដែលអាចធ្វើឲ្យស្រីៗយើងមិនអាចមានកូនបាន ប្រសិនបើមិនធ្វើការព្យាបាលទេនោះ។

គន្លឹះដោះស្រាយបញ្ហាចុកពោះក្រោយពេលមករដូវ

ពិតណាស់ ការព្យាបាលអាការៈចុកពោះ មានភាពខុសៗគ្នាអាស្រ័យលើមូលហេតុបង្ក។ ក្នុងករណីខ្លះ គ្នាយើងអាចត្រូវប្រើប្រាស់ថ្នាំ ការព្យាបាលដោយអ័រម៉ូន ឬវះកាត់ជាដើម។ យ៉ាងណាមិញ យើងអាចកាត់បន្ថយការឈឺចាប់ ដោយការញ៉ាំទឹកឲ្យបានគ្រប់គ្រាន់ ធ្វើលំហាត់ប្រាណ និងស្អំកំណាត់ក្តៅ ឬទឹកកក។ ជាមួយគ្នានេះដែរ ប្រសិនបើយើងចុកពោះធ្ងន់ធ្ងរ និងមានធ្លាក់ឈាមផងនោះ យើងគួរពិគ្រោះយោបល់ជាមួយនឹងគ្រូពេទ្យ ទើបជាការប្រសើរ។

អត្ថបទគួរអាន៖

ត្រួតពិនិត្យដោយ គ្រូពេទ្យឯកទេស.វេជ្ជ. ចាន់ ស៊ីណេតឯកទេសសម្ភព និងរោគស្ត្រី · មន្ទីរពេទ្យបង្អែកមិត្តភាពកម្ពុជា-ចិន សែនសុខ

អត្ថបទដោយ នូ សោភ័ណ្ឌ · កែ 30/08/2024

ម៉េចបានស្រីៗចុកពោះក្រោយពេលមករដូវ? គួរដោះស្រាយបែបណា?​​​​​​​​​​​​​​​​​​​​​​​​​​​​​​​​​​​​​​​​

មូលហេតុ​បង្ក​នៃ​ការ​ចុក​ពោះ​ក្រោយ​ពេល​​មក​រដូវ

១. ធ្លាក់​មេ​ជីវិត​ញី

២. ពពោះ

៣. កូន​ក្រៅ​ស្បូន

៤. ជំងឺ​Endometriosis

៥. ដុំ​គីស​អូវែ

៦. ជំងឺ​រលាក​នៅ​តំបន់​អាង​ត្រគាក

គន្លឹះ​ដោះស្រាយ​បញ្ហា​ចុក​ពោះ​ក្រោយ​ពេល​មក​រដូវ