ប៉ាម៉ាក់ថ្មីថ្មោងអាចមានអារម្មណ៍អន្ទះអន្ទែង នៅពេលដែលឃើញកូនដង្ហក់មិនឈប់។ ពេលខ្លះ អាអូនដង្ហក់អាចមិនមែនជារឿងដែលយើងត្រូវបារម្ភពេកឡើយ។ ពិតណាស់ ប៉ាម៉ាក់គប្បីស្វែងយល់ពីមូលហេតុនៃការដង្ហក់នេះឲ្យបានច្បាស់ជាមុនសិន។ ជាទូទៅ កូនដង្ហក់នៅពេលដែលមានអ្វីមួយស្ទះនៅក្នុងបំពង់ករបស់ពួកគេ ដូចជាស្លេស្មច្រើនជ្រុលដោយសារតែជំងឺផ្ដាសាយជាដើម។ ខាងក្រោមនេះ ជាមូលហេតុផ្សេងៗ ដែលបណ្ដាលឲ្យទារកដង្ហក់។

មូលហេតុនាំឲ្យកូនដង្ហក់

១. ការបង្ករោគផ្លូវដង្ហើម

ការបង្ករោគនៅច្រមុះ ប្រហោងឆ្អឹង បំពង់ក ផ្លូវដង្ហើម ឬសួត គឺជាការឆ្លងមេរោគផ្លូវដង្ហើម។ ការឆ្លងមេរោគផ្លូវដង្ហើមនេះ បណ្ដាលឲ្យមានការបញ្ចេញស្លេស្មច្រើនជ្រុល និងរលាកជាលិកាផ្លូវដង្ហើម ជាហេតុនាំឲ្យកូនពិបាកដកដង្ហើម។ រោគសញ្ញាផ្សេងទៀត រួមមានគ្រុនក្ដៅ ផ្ដាសាយ ក្អក ឈឺក និងឈឺត្រចៀក។

២.ជំងឺហឺត

ជំងឺហឺតត្រូវបានចាត់ចូលជាប្រភេទការរលាករ៉ាំរ៉ៃលើផ្លូវដង្ហើម ដែលមូលហេតុចម្បងនៃជំងឺមួយនេះនៅមិនទាន់ដឹងច្បាស់នៅឡើយ។ យោងតាមមូលនិធិជំងឺហឺត និងអាលែកហ្ស៊ីរបស់អាមេរិក ជំងឺហឺតអាចបណ្ដាលឲ្យពិបាកដកដង្ហើម ដកដង្ហើមតឹងៗ ក្អកជាប់រហូត ពិបាកបៅ និងអស់កម្លាំង។

៣. ស្រូបផ្សែងបារី

ការជក់បារីនៅក្នុងបន្ទប់ដែលអាអូននៅ អាចធ្វើឲ្យរលាកផ្លូវដង្ហើមរបស់ទារក។ វាក៏អាចនាំឲ្យកើតជាជំងឺហឺតផងដែរ។ ដូច្នេះហើយ អ្នកជក់បារីគប្បីជក់ឲ្យឆ្ងាយពីកន្លែងដែលទារកនៅ ឬប៉ាម៉ាក់គួរយកកូនចេញឆ្ងាយពីផ្សេងបារី។

កូនដង្ហក់

៤. គេងមិនដកដង្ហើម

ការស្ទះដង្ហើមពេលគេងកើតឡើងនៅពេលដែលផ្លូវដង្ហើមដែលនៅចន្លោះ ច្រមុះ និងសួតរួមតូច។ ទារកដែលមានបញ្ហាសុខភាពនេះ អាចឈប់ដង្ហើមមួយសន្ទុះ ដង្ហក់ និងដកដង្ហើមមានសំឡេង។

៥. ឆ្អឹងបំពង់សំឡេងទន់

ឆ្អឹងបំពង់សំឡេងទន់ ជាមូលហេតុចម្បងដែលទារកដកដង្ហើមមានសំឡេង។ វាកើតឡើងដោយសារតែជាលិកាទន់នៅលើខ្សែសំឡេង។ ក្មេងភាគច្រើនអាចបាត់ទៅវិញនៅអាយុ ១ឆ្នាំ និងក្មេងខ្លះទៀតអាចបាត់ទៅវិញនៅពេលដែលពួកគេអាយុ ២ឆ្នាំ។

៦. កូនកើតមិនគ្រប់ខែ

អាការៈពិបាកដកដង្ហើម ជាទូទៅកើតឡើងចំពោះទារកដែលកើតមិនគ្រប់ខែ។ ទារកដែលសម្រាលមុនអាយុ ៣៧សប្ដាហ៍ មានហានិភ័យខ្ពស់ក្នុងការវិវត្តទៅជាជំងឺផ្លូវដង្ហើម។ ទារកដែលមានជំងឺផ្លូវដង្ហើម ព្យាយាមដកដង្ហើមខ្លាំង និងអាចនាំឲ្យកើតមានអាការៈដង្ហក់។

ពេលណាគួរនាំកូនទៅជួបនឹងគ្រូពេទ្យ?

ប៉ាម៉ាក់គប្បីនាំកូនទៅជួបនឹងគ្រូពេទ្យភ្លាមៗ ប្រសិនបើអាអូនមានអាការៈដូចខាងក្រោម៖

មានរោគសញ្ញានៃការបង្ករោគ ដូចជាគ្រុនក្ដៅ មិនឃ្លានអាហារ ល្ហិតល្ហៃ។
ស្បែកទារក ជាពិសេសផ្ទៃមុខឡើងស្វាយ ដែលបង្ហាញថាកូនខ្វះអុកស៊ីសែនក្នុងរាងកាយ។
ដង្ហក់ដោយសារតែមានអ្វីមួយជាប់នៅផ្លូវដង្ហើម។
ដង្ហក់ រួមជាមួយការដកដង្ហើមតឹងៗ។
ចាប់ផ្ដើមដង្ហក់ ក្រោយពេលត្រលប់មកពីខាងក្រៅ ដោយសារតែប៉ះពាល់នឹងសារធាតុអ្វីមួយដូចជា Aerosol Spray។
ចាប់ផ្ដើមដង្ហក់ក្រោយញ៉ាំអ្វីមួយ។
ផតទ្រូងនៅពេលដកដង្ហើម ដែលបង្ហាញថាកូនពិបាកដកដង្ហើមខ្លាំង។

មូលហេតុ​​នាំ​ឲ្យ​កូន​ដង្ហក់​

១. ការ​បង្ក​រោគ​ផ្លូវ​ដង្ហើម​

២.​ជំងឺ​ហឺត​

៣. ស្រូប​​ផ្សែង​បារី​

​​៤. គេង​មិន​ដក​ដង្ហើម​

៥. ឆ្អឹង​បំពង់​សំឡេង​ទន់

៦. កូន​កើត​មិន​គ្រប់​ខែ

​​​ពេល​ណា​គួរ​នាំ​កូន​ទៅ​​ជួប​នឹង​​គ្រូពេទ្យ​?