បញ្ហាស្បែកស្ងួតលើបេប៊ីគឺជារឿងធម្មតាទៅហើយ ដោយកូនខ្លះទើបនឹងកើតភ្លាមមានបញ្ហានេះភ្លែត និងខ្លះទៀតចាស់ថ្ងៃបន្តិច ទើបមានស្បែកស្ងួតខ្លះនៅលើមុខ។ វេជ្ជបណ្ឌិត ហ៊ាង រតនា បានបញ្ជាក់ថា ក្នុងករណីភាគច្រើនស្បែកស្ងួតនេះមិនបង្កគ្រោះថ្នាក់អ្វីចំពោះកូនទេ ហើយវាច្រើនតែជាទៅវិញទាំងគ្មានការព្យាបាល។

លោកបញ្ជាក់ទៀតថា ជារឿយៗទារកមានស្បែកស្ងួតនៅលើផ្ទៃមុខ ព្រោះស្បែកគេងាយនឹងរលាកជាងមនុស្សពេញវ័យ និងយូរៗទៅស្បែកកូនអាចសម្របខ្លួនទៅនឹងបរិស្ថានខាងក្រៅស្បូន ហើយបើសិនទោះជាស្ងួតក៏ប្រហែលមកពីប្រតិកម្ម ឬអាលែកហ្ស៊ីជាមួយផលិតផល ឬសម្លៀកបំពាក់របស់កូនដែរ។ មួយវិញទៀតការខ្សោះជាតិទឹក និងស្ថានភាពស្បែកខ្លួនឯងក៏អាចបណ្ដាលទៅជាស្ងួតបែបនោះផងដែរ។

វេជ្ជបណ្ឌិតឯកទេសទូទៅរូបនោះបន្ថែមទៀតថា អំឡុងពេលសង្កេតឃើញស្បែកកូនមានបញ្ហានោះ បើយើងនៅតែបារម្ភត្រូវរកគ្រូពេទ្យឯកទេសដើម្បីព្យាបាល និងតាមដានការវិវត្តន៍បន្តរបស់ស្បែកកូន។ ដំបូន្មានជាជំហានដំបូង គឺការប្រើប្រាស់ទឹកក្ដៅឧណ្ហ៍ៗ សម្រាប់ងូត និងលាបឡេ ឬប្រេងផ្ដល់សំណើម តែត្រូវជ្រើសរើសឲ្យត្រូវនឹងប្រភេទស្បែកសិន ចៀសវាងឡេដែលមានជាតិអាល់កុល សារធាតុកាត់ ព្រោះវាធ្វើឲ្យបាត់បង់ជាតិទឹកខាងក្រៅ។

ទារកស្បែកស្ងួត

ចំពោះកូនដែលមានបញ្ហាស្បែកស្ងួត គួរកុំងូតទឹកយូរពេក ព្រោះអាចលាងសម្អាតប្រេងដែលមានពីធម្មជាតិតាមស្បែក បង្កើនហានិភ័យឲ្យស្បែកកាន់តែស្ងួត និងរបក។ បន្ទាប់ពីងូតទឹករួច ម៉ាក់ៗត្រូវយកកន្សែងដ៏ទន់មកផ្ដិលជាតិសំណើម ចៀសវាងការជូតជាមួយកន្សែងក្រាស់ៗ នាំឲ្យកកិតធ្វើឲ្យស្បែកកាន់តែយ៉ាប់យ៉ឺន។

លោកបានបញ្ជាក់ទៀតថា ក្នុងករណីទារកទើបនឹងកើត ទឹកដោះយើងគឺជាដំណោះស្រាយដ៏ល្អបំផុតដើម្បីឲ្យកូនមានជាតិទឹក និងមានសុខភាពល្អ ដោយឧស្សាហ៍បំបៅ ហើយពេលកូនបានទទួលទឹកដៅច្រើន ធ្វើឲ្យឆាប់ថ្លោស ស្បែកប្រែជាភ្លឺរលោង ស្អាតឡើងវិញដោយឯងៗ។

បេប៊ីទើបនឹងកើតមានស្បែកមុខស្ងួត ម៉ាក់ៗគួរធ្វើបែបណា?