អាយុ ៣៧ សប្តាហ៍៖ កើន ១ អាទិត្យទៀតបាត់ កូនយើងប្លែកយ៉ាងណា?
ការលូតលាស់ និងអាកប្បកិរិយា
ឈានចូលសប្តាហ៍ថ្មីនេះ អាអូនប្រែប្រួលយ៉ាងណាទៅ? មិនប្រាប់ក៏ម៉ាក់ប៉ាអាចដឹងថា កូនចេះជាងមុន ថែមទាំងរពឹសចាប់មិនចង់ឈ្នះ។ ក្នុងសប្តាហ៍ទី ៣៧ នេះ កូនយើងអាចនឹង៖
– ឈោងយករបស់លេងនៅឆ្ងាយពីដៃ
– រកមើលរបស់ដែលជ្រុះបាត់។
១- បង្រៀនកូនរបៀបណា?
បើម៉ាក់ត្រូវធ្វើដំណើរតាមខេត្ត ឬដើរកម្សាន្តជាមួយមិត្តភក្តិ ក្រុមការងារ ដោយយកកូនទៅជាមូយ អាចនឹងពិបាកបន្តិច ព្រោះអាអូនខ្លាចមនុស្សប្លែកមុខ តាមតែយើងតែម្នាក់។ ទោះយ៉ាងណាយើងអាចដោះស្រាយបញ្ហាទាំងនេះ ដោយប្រាប់មិត្តភក្តិដែលចង់លេងជាមួយកូនយើងឲ្យចូលមកជិតបន្តិចម្តងៗ ហើយចាំឲ្យកូនយើងជាអ្នកនាំលេង។
នៅវ័យនេះ អូនតូចពុំទាន់យល់ពីការធ្វើដំណើរទេ តែពួកគេដឹង និងស្គាល់ថាវាជាកន្លែងថ្មី ឬកន្លែងប្លែក ដូច្នេះយើងគួរត្រៀមរបស់លេងមានសំឡេង សៀវភៅរូបភាព និងរបស់ដែលគេចូលចិត្តទុកជិតខ្លួន ដើម្បីលួងកូន ព្រោះអាអូនឆាប់មួម៉ៅ មិនងាយតាមអ្នកណាទេ យកល្អកុំឲ្យកូននៅជាមួយអ្នកមិនស្គាល់ច្រើនពេក ធ្វើឲ្យកូនខ្លាច។
សុខភាព និងសុវត្ថិភាព
២- ពិភាក្សាជាមួយពេទ្យរឿងអីខ្លះ?
គ្រូពេទ្យមានតិចនិចក្នុងការពិនិត្យអាអូនផ្សេងៗពីគ្នា ហើយរបៀបនិងបែបបទក្នុងការពិនិត្យក៏ទៅតាមក្មេងនីមួយៗដែរ។
– ថ្លឹងទម្ងន់ វាស់កម្ពស់ និងទំហំក្បាល
– សួរសំណួរពីការថែទាំកូន និងរបបអាហារ
– សួរពីការគេង និងការលូតលាស់ -ល-។
៣- ចំណុចត្រូវដឹង?
ជំងឺផ្តាសាយ៖ ក្មេងៗភាគច្រើនមានជំងឺនេះ ៨-១០ ដង/២ ឆ្នាំដំបូង។ អ្វីដែលយើងគួរធ្វើដើម្បីឲ្យកូនឆាប់ជាគឺ ៖
– ឲ្យកូនគេងគ្រប់គ្រាន់ (អាអូនត្រូវការគេងច្រើនជាងធម្មតា)
– ដាក់កន្សែងកល់ក្បាលកូនឲ្យខ្ពស់បន្តិច ដើម្បីស្រួលដកដង្ហើម
– មុជទឹកក្តៅឧណ្ហៗឲ្យកូន
– ឲ្យកូនបៅទឹកដោះ និងញ៉ាំទឹកឲ្យបានច្រើន
– បន្តក់សេរ៉ូមប្រៃ ហើយយកសឺរ៉ាំងបូមស្លេស្សចេញពីច្រមុះកូន
– ដាក់ម៉ាស៊ីនចំហាយទឹកក្នុងបន្ទប់ ឬ
– យកកូនទៅមុជទឹកក្នុងបន្ទប់ឆ្ពង់ប្រហែលជា ១៥ នាទី។
ត្រូវពិគ្រោះជាមួយគ្រូពេទ្យមុនពេលឲ្យថ្នាំលេប ឬថ្នាំបាញ់ច្រមុះកូន។ មិនត្រូវឲ្យពពួកថ្នាំ Aspirin Ephedra Ephedrine ឬថ្នាំដែលមានលាយជាតិទាំងអស់នេះ។ យើងអាចឲ្យថ្នាំ Acetaminophen និង Ibuprofenតែត្រូវប្រយ័ត្នពីបរិមាណដែលត្រូវប្រើ បើមិនច្បាស់ សូមសួរគ្រូពេទ្យជាមុន។
សួរគ្រូពេទ្យភ្លាមបើរោគសញ្ញាកូនធ្ងន់ជាងមុនក្នុងរយៈពេល ៥ ថ្ងៃ ឬឈឺយូរ ១០-១៤ ថ្ងៃហើយមិនជា។ ត្រូវនាំកូនទៅជួបគ្រូពេទ្យភ្លាម បើសំឡេងដង្ហើមកូនឮងឺតៗ ពិបាកដកដង្ហើម យំពេលបញ្ចុកអាហារ ឬពេលដាក់ឲ្យគេង យកដៃទាញត្រចៀក ឬមានកម្តៅលើសពី ៣៨,៣ អង្សាសេ។
ដើម្បីការពារកុំឲ្យមានជំងឺផ្តាសាយត្រូវលាងដៃយើង និងកូនឲ្យបានទៀងទាត់ ហើយកុំភ្លេចប្រាប់អ្នកផ្សេងឲ្យលាងដៃមុនពេលប៉ះកូន។ កុំយកកូនទៅជិតអ្នកឈឺ ឬអ្នកជក់បារីឲ្យសោះ។ បើអាអូននៅម៉ឹមដោះ គួរតែបន្តបំបៅដោះកូនរហូតដល់ជា។
ការគេង៖ ទោះបីកូនគេងបានច្រើនម៉ោងប៉ុនណាក៏ដោយ បើអាអូនងើបឡើងហើយមួម៉ៅយំក៏មិនល្អដែរ គួរលួងកូនឲ្យគេងបន្ថែមទៀតទោះបីមិនចង់គេងក៏ដោយ។ វិធីជួយឲ្យកូនឆាប់គេងលក់ យើងត្រូវដាក់កូនឲ្យគេងក្នុងបន្ទប់ងងឹត ហើយចាក់បទភ្លេងតិចៗ ទោះកូនមិនព្រមគេង ក៏ព្យាយាមធ្វើបែបនេះឲ្យបានយូរបន្តិចទៅ ព្រោះឲ្យក្មេងគេងពេលថ្ងៃពិបាកបន្តិចហើយ។
ការព្រួយបារម្ភ
៤- រឿងអ្វីខ្លះត្រូវបារម្ភ?
បញ្ចុកកូននៅតុអាហាររួម៖ មិនមែនជារឿងចម្លែកទេ ម៉ាក់ប៉ាគួរតែឲ្យកូនតូចចូលញ៉ាំបាយជុំគ្នាជាមួយមនុស្សចាស់ ដោយរៀបចំតុ កៅអីតូចឲ្យកូន និងអាហារដែលកូនអាចចាប់ញ៉ាំបាន។ ធ្វើបែបនេះអូនតូចនឹងមានឱកាសនិយាយ ឬស្តាប់សំឡេងពីសមាជិកគ្រួសារបានគ្រប់ៗគ្នា។
មិនចង់បៅដោះ៖ បើកូនមិនចង់បៅដោះទៀតទេ អាចជិតដល់ពេលផ្តាច់ហើយ ប៉ុន្តែយើងអាចព្យាយាមធ្វើតាមវិធីខាងក្រោមនេះ៖
– បំបៅកូននៅកន្លែងស្ងាត់ ឱប បបោសអង្អែលកូនថ្នមៗ
– មុនទៅធ្វើការ ត្រូវឆ្លៀតបំបៅដោះកូន
– ក្រោយពីភ្ញាក់ពីគេងត្រូវបំបៅដោះកូនម្តងទៀត
ម៉ាក់ៗគ្រប់រូបគួរតែបូមទឹកដោះឲ្យកូនបៅឲ្យបានយ៉ាងហោចណាស់ ១ ឆ្នាំ តែបើមិនចង់បូមទេអាចប្រើទឹកដោះគោកំប៉ុងក៏បានដែរ។ ទឹកដោះម្តាយអាចដាក់ក្នុងដបទឹកដោះគោបាន ប៉ុន្តែយកល្អយើងគួរតែដាក់កែវវិញ ព្រោះកូនយើងដល់វ័យរៀនប្រើកែវហើយ។
ឥលូវកូនយើងអាយុ ៣៧ សប្តាហ៍ហើយ ជួបគ្នាក្នុងសប្តាហ៏ទី ៣៨បន្តទៀត!
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
Murkoff, Heidi. What to Expect, The First Year. New York: Workman Publishing Company, 2009. Print version. Page 416-434.
កំណែប្រែបច្ចុប្បន្ន
23/01/2019
អត្ថបទដោយ Duk Panharat
ត្រួតពិនិត្យដោយ គឹម កាណែល
បច្ចុប្បន្នភាពដោយ៖ ដេត ធន្នី
ត្រួតពិនិត្យដោយ
គឹម កាណែល
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម