ប៉ាម៉ាក់ទិញប្រដាប់ប្រដាឲ្យកូនលេងមិនត្រឹមតែអាចជួយឲ្យកូនមានភាពរីករាយ និងល្អចំពោះសុខភាពផ្លូវចិត្តទេ ថែមទាំងចូលរួមដល់ការអភិវឌ្ឍរាងកាយ និងខួរក្បាលរបស់ទៀតផង។ តែអ្វីដែលសំខាន់គឺប្រដាប់ប្រដាក្មេងលេងមួយចំនួនអាចបង្កគ្រោះថ្នាក់ដល់អាអូន។ តើរបស់ក្មេងលេងអាចបង្កគ្រោះថ្នាក់ដល់អូនតូចបែបណាខ្លះ? ហើយម៉ាក់ប៉ាគួរជ្រើសរើសរបស់លេងបែបម៉េចទើបសុវិត្ថិភាព?
ប្រដាប់ប្រដាក្មេងលេងមួយចំនួនអាចធ្វើឱ្យអាអូនស្លាក់ មុតរបួស ថប់ដង្ហើម ឬពុលដោយសារមានផ្ទុកសារធាតុគីមី ហើយបើធ្ងន់ធ្ងរអាចគ្រោះថ្នាក់ដល់ជីវិតទៀតផង។
ដើម្បីសុវត្ថិភាព ម៉ាក់ប៉ាគួរជ្រើសរើសប្រដាប់ប្រដាក្មេងលេងឱ្យកូនតាមការណែនាំដូចខាងក្រោម៖
១. អានស្លាកព្រមាន
ជាទូទៅស្លាកព្រមានលើប្រអប់ ឬថង់ដាក់ប្រដាប់ប្រដាក្មេងលេងតែងផ្តល់ព័ត៌មានសំខាន់ៗពីរបៀបលេង និងអាយុកុមារដែលស័ក្តិសមនឹងលេងប្រដាប់ប្រដាទាំងនោះ ឬអាចលេងដោយសុវត្ថិភាពជាដើម។ លើសពីនេះទៅទៀត ម៉ាក់ប៉ាគួររកមើលពាក្យ “គ្មានផ្ទុកសារធាតុពុល” នៅលើប្រអប់ ឬថង់។
២. ប្រយ័ត្នចំពោះប្រដាប់ប្រដាក្មេងលេងប្រើថ្ម
គម្របបិទថ្មលើប្រដាប់ប្រដាក្មេងលេងគួរត្រូវបានចាប់វីសដើម្បីកុំឱ្យអាអូនបើកកើត ព្រោះក្មេងៗចូលចិត្តចង់ដឹងចង់ឃើញ និងចង់ប៉ះណាស់ ហើយអាចខាំ ឬបៀមថ្មបានដែលអាចបណ្តាលឱ្យស្លាក់ក្នុងករណីថ្មមានទំហំតូចៗ ហើយអាចពុលនឹងសារធាតុគីមីនៅក្នុងថ្មក្នុងករណីអាអូនខាំបែកសំបកថ្ម។
៣. គួរជ្រើសរើសតុក្កតាគ្មានបំពាក់គ្រាប់តូចៗ
ម៉ាក់ប៉ាត្រូវប្រាកដថាគ្រប់ផ្នែក និងថ្នេរទាំងអស់របស់តុក្កតាគឺត្រូវបានដេរភ្ជាប់យ៉ាងជាប់ល្អហើយម៉ាក់ប៉ាគួរចៀសវាងទិញតុក្កតាដែលមានបំពាក់គ្រាប់តូចៗដូចជាឡេវ ឬជ័រផ្សេងៗធ្វើជាភ្នែក ច្រមុះ ឬមាត់ជាដើមដែលអាចបណ្តាលឱ្យអាអូនខាំ បៀបនាំឲ្យស្លាក់ព្រោះពេលអាអូនរមាស់ធ្មេញ អាអូនអាចខាំគ្រាប់តូចៗទាំងនោះ។
លើសពីនេះទៅទៀតតុក្កតានោះគួរតែជារបស់អាចបោកសម្អាតបាន ព្រោះធូលីដី និងមេរោគផ្សេងៗអាចតោងជាប់នៅលើតុក្កតាដែលបណ្តាលឱ្យអាអូនមានបញ្ហាផ្លូវដង្ហើម។
៤. គួរជ្រើសរើសប្រដាប់ក្មេងលេងពីប្លាស្ទិកមាំល្អ
ប្រដាប់ប្រដាក្មេងលេងដែលធ្វើពីប្លាស្ទិកស្តើងៗអាចងាយនឹងបែកបាក់ ហើយអាចបង្កឱ្យអាអូនរបួស ឬមុតបានយ៉ាងងាយ ប្រសិនបើអាអូនដើរជាន់ ដួលពីលើ កាន់លេង ឬដាក់ចូលមាត់។
៥. ចៀសវាងប្រដាប់ប្រដាក្មេងលេងដែលតូចៗ
ម៉ាក់ប៉ាចៀសវាងទិញប្រដាប់ប្រដាក្មេងលេងដែលមានទំហំតូចៗ ឬមានផ្នែកផ្គុំតូចៗ ដែលតូចជាងទំហំមាត់អាអូនដើម្បីចៀសវាងការស្លាក់ ព្រោះក្មេងតូចៗចូលចិត្តយករបស់របរតូចៗដាក់ចូលក្នុងមាត់ណាស់។ ជាពិសេសប្រដាប់ប្រដាក្មេងលេងដែលមានភ្ជាប់ដែកឆក់តូចៗ ព្រោះការលេបដែកឆក់ចូលពោះអាចបណ្តាលឱ្យខូចពោះវៀនអាអូន។
ចង់គណនារង្វាស់ចង្វាក់បេះដូង ចុចទីនេះ!
ចងពិនិត្យជំងឺសរសៃឈាមបេះដូង ចុចទីនេះ!
៦. ចៀសវាងទិញប្រដាប់ប្រដាអាចបាញ់បាន
ប្រដាប់ប្រដាក្មេងលេងដែលអាចបាញ់បានដូចជា កាំភ្លើង ធ្នូ ឬចម្ពាមជាដើមអាចបណ្តាលឱ្យអាអូនរបួសដែលបង្កឱ្យទៅជាជាំ ឬរបួសភ្នែកនៅពេលអាអូនបាញ់គ្នាលេង។ ម៉្យាងទៀត អាអូនក៏អាចស្លាក់ដោយសារការបៀម ឬដាក់គ្រាប់កាំភ្លើងជ័រចូលមាត់ដែរ។
៧. ចៀសវាងប្រដាប់ប្រដាក្មេងលេងបញ្ចេញសំឡេងខ្លាំង
ប្រដាប់ប្រដាក្មេងលេងដែលមានភ្លេងអមមួយចំនួនអាចបញ្ចេញសំឡេងឮ ឬខ្លំាងពេកដែលអាចធ្វើឱ្យខូចក្រដាសត្រចៀករបស់អាអូន។ ដូច្នេះម៉ាក់ប៉ាគួរច្រើសរើសដោយប្រុងប្រយ័ត្ន និងត្រូវសាកតេស្តស្តាប់មុនសិន មុននឹងសម្រេចទិញ។
[embed-health-tool-vaccination-tool]
៨. ចៀសវាងទិញប្រដាប់ប្រដាក្មេងលេងមានខ្សែវែងៗ
ពាក្យថាក្មេងគឺរពិសណាស់ ពេលលេងអាអូនអាចយកខ្សែ ឬបូដែលជាប់នឹងប្រដាប់ប្រដាលេងមកពាក់នឹងកដែលអាចបណ្តាលឱ្យទាក់ ឬរុំជាប់ក ហើយបណ្តាលឱ្យគ្រោះថ្នាក់ ឬអាចគ្រវីខ្សែលេងដែលបណ្តាលឱ្យរបស់លេងត្រលប់ត្រូវក្បាល ឬត្រូវភ្នែកជាដើម។
ដូច្នេះម៉ាក់ប៉ាគួរជ្រើសរើសប្រដាប់ប្រដាលេងដែលស័ក្តិសមនឹងអាយុ និងសមត្ថភាពរបស់អាអូនទើបមិនបង្កឱ្យគ្រោះថ្នាក់ដោយយថាហេតុ។ ជាពិសេសគួរចៀសវាងប្រដាប់ប្រដាលេងដែលមានទំហំតូចៗ។
អត្ថបទគួរអាន៖
- តិចនិកងាយៗ ជួយដោះស្រាយបញ្ហាញៀនលេងទូរសព្ទមិនឈប់
- ប៉ាម៉ាក់ចូលចិត្តលេងទូរសព្ទនៅផ្ទះ អាចនាំឲ្យបាត់ទំនាក់ទំនងល្អជាមួយកូនៗ
- ក្មេងចូលចិត្តលេងច្រើន មិនអត់ប្រយោជន៍ទេ ជួយក្មេងបានច្រើនណាស់
- កាសិក្សារកឃើញថាកូនលេងហ្គេមរាល់ថ្ងៃមិនអត់ប្រយោជន៍ទេ តែត្រូវមានម៉ោងកំណត់
- មូលហេតុ ៥ យ៉ាង ប៉ាម៉ាក់គួរឧស្សាហ៍នាំកូនដើរលេងក្រៅផ្ទះ
- ម៉ាក់ប៉ាដឹងអត់ ការលេងដោយសេរីផ្ដល់ប្រយោជន៍ដល់ការអភិវឌ្ឍកូនច្រើន
ចំណុចសំខាន់
- អានស្លាកព្រមាន
- ប្រយ័ត្នចំពោះប្រដាប់ប្រដាក្មេងលេងប្រើថ្ម
- គួរជ្រើសរើសតុក្កតាគ្មានបំពាក់គ្រាប់តូចៗ
- គួរជ្រើសរើសប្រដាប់ក្មេងលេងពីប្លាស្ទិកមាំល្អ
- ចៀសវាងប្រដាប់ប្រដាក្មេងលេងដែលតូចៗ
- ចៀសវាងទិញប្រដាប់ប្រដាអាចបាញ់បាន
- ចៀសវាងប្រដាប់ប្រដាក្មេងលេងបញ្ចេញសំឡេងខ្លាំង
- ចៀសវាងទិញប្រដាប់ប្រដាក្មេងលេងមានខ្សែវែងៗ
