កូនផឹកទឹកដោះគោ គួរផ្ដល់វីតាមីនបំប៉នឲ្យញ៉ាំទៀត ឬអត់?

បច្ចុប្បន្ន ថ្នាំវីតាមីនបំប៉នកំពុងតែក្លាយជាទីពេញនិយមក្នុងចំណោមម៉ាក់ប៉ាមួយចំនួនសម្រាប់ផ្ដល់ឲ្យកូនញ៉ាំជាប្រចាំ ដោយ​ជឿថា​អាច​បំពេញតម្រូវអាហារូបត្ថម្ភដែលរាងកាយកូនត្រូវការ ព្រោះខ្លាចអាអូនជួបបញ្ហាខ្វះអាហារូបត្ថម្ភ។ ក្រៅពីផ្ដល់វីតាមីនបំប៉ន ម៉ាក់ប៉ាខ្លះឲ្យអាអូនញ៉ាំទឹកដោះគោម្សៅថែមទៀត ហេតុនេះក៏មានចម្ងល់មួយលើកឡើងថា បើឲ្យកូនបៅទឹកដោះគោម្សៅហើយ ចាំបាច់ឲ្យកូនញ៉ាំវីតាមីនបំប៉នទៀតទេ​?

អត្ថន័យពណ៌ និងរូបរាងលាមកទារក

តាមលោកវេជ្ជបណ្ឌិត ចាន់ ស៊ីណេត ឯកទេសទូទៅ បានពន្យល់ឲ្យដឹងថា ជាធម្មតា ទឹកដោះម្ដាយ ឬទឹកដោះគោម្សៅផ្ដល់នូវសារធាតុចិញ្ចឹមគ្រប់យ៉ាងដែលទារកត្រូវការ និងគ្រប់គ្រាន់សម្រាប់អាអូនរយៈពេល៤-៦ខែដំបូងនៃជីវិត។ ប៉ុន្តែ លើកលែងតែវីតាមីន D វីតាមីន A និងវីតាមីន C ដែលអ្នកជំនាញណែនាំផ្ដល់ជាអាហារបំប៉នដល់កូន ចំពោះក្មេងដែលបៅទឹកដោះម្ដាយ ឬក្មេងបៅទឹកដោះគោម្សៅតិចជាង ៥០០មីលីលីត្រក្នុងថ្ងៃ។

បន្ទាប់ពីអាយុ៤-៦ខែ អង្គការសុខភាពពិភពលោក (WHO) ណែនាំឲ្យម៉ាក់ប៉ាអាចបន្ថែមជាអាហារទន់ល្មមញ៉ាំដល់កូនហើយ។ ដោយសារតែរបបអាហារកូនផ្លាស់ប្ដូរបន្តិចម្ដងៗពីអាហាររាវសុទ្ធទៅជាអាហាររឹងធម្មតាកាន់តែច្រើន គ្រូពេទ្យអាចណែនាំឲ្យបន្ថែមវីតាមីនបំប៉នដល់កូន បើកូនខ្វះអាហារូបត្ថម្ភ ឬមិនចាំបាច់បន្ថែមក៏បាន បើកូនមានសុខភាពធម្មតា ព្រោះកូនអាចទទួលសារធាតុចិញ្ចឹមគ្រប់ពីអាហារប្រចាំថ្ងៃ។

ទារក ឬក្មេងដែលញ៉ាំអាហារច្រើនប្រភេទមានទាំងត្រី សាច់ បន្លែ ផ្លែឈើគ្រប់មុខ ម៉ាក់ប៉ាមិនចាំបាច់បំប៉នវីតាមីនទាំងអស់នោះទេ ប៉ុន្តែមានករណីលើកលែង។ ឧទាហរណ៍ អាហារ ឬវីតាមីនបំប៉នអាចចាំបាច់ ប្រសិនបើកូនកើតមិនគ្រប់ខែ ទម្ងន់កំណើតទាប បៅទឹកដោះម្ដាយ ឬទឹកដោះគោម្សៅជាប្រចាំតិចជាងទារកដទៃនៅអាយុស្របាលគ្នា ឬមានបញ្ហាសុខភាពរ៉ាំរ៉ៃដែលប៉ះពាល់ដល់ការញ៉ាំរបស់កូន។

យ៉ាងណាក៏ដោយ ក្នុងករណីដែលយើងសង្កេតឃើញថា អាអូនមានសញ្ញាបៅដោះ ឬញ៉ាំអាហារខុសប្រក្រតីពីក្មេងដទៃ ឬមានចម្ងល់ចាំបាច់ណាមួយទាក់ទងនឹងសុខភាពកូន កុំបង្អង់យូរ ត្រូវពិគ្រោះ និងពិនិត្យជាមួយគ្រូពេទ្យជំនាញក្មេងជាចាំបាច់។