បញ្ហានេះម៉ាក់ប៉ាណាក៏ព្រួយបារម្ភដែរ ព្រោះកូនទើបតែចេះតោងឈរ និងដើរថ្មីៗ ជួបច្រើនដងខ្លាំងណាស់ដូចជាធ្លាក់ពីលើទីខ្ពស់ ដួលបោកក្បាល។ ដើម្បីស្រាយចម្ងល់នេះលោកវេជ្ជបណ្ឌិត ប៉ែន កក្កដា ឯកទេសរោគកុមារ និងទារកនៅមន្ទីរពេទ្យកុមារជាតិ បានឲ្យដឹងថា ករណីនេះគេបែងចែកច្រើនតាំងពីស្បែក ឆ្អឹង និងសរីរាង្គសំខាន់ៗខាងក្នុង។

គ្រូពេទ្យឯកទេសកុមាររូបនេះបានបន្តថា ការប៉ះពាល់បណ្ដាលមកពីដួលនោះច្រើនកម្រិតណា ក៏មិនសំខាន់ អ្វីដែលសំខាន់ គឺត្រូវខ្លាំងកម្រិតណា ព្រោះទារកខ្លះប៉ះញឹកមែន តែត្រឹមសើស្បែក ឬអ្នកខ្លះទៀតមិនញឹកញាប់ទេ ប៉ុន្តែត្រូវខ្លាំងរហូតដល់បាក់ឆ្អឹង ខ្ទាំ ឬក៏ដាច់សរសៃឈាមខួរក្បាលក៏មាន។ លោកក៏បានបែងចែកការដួលនោះជា ៥ ដំណាក់កាល ដែលក្នុងនោះរាប់មានការដួល ធ្លាក់ពីលើកាំជណ្ដើរ មានរបស់អ្វីធ្លាក់ចំជាដើម៖

ដួលបោកក្បាលHello_គ្រូពេទ្យ

១- ប្រសិនបើសន្លប់ នេះបញ្ជាក់ថាកូនមានអាការៈធ្ងន់ធ្ងរហើយ

២- ភ្នែកឡើងជាំដូចភ្នែកខ្លាឃ្មុំផេនដា មានន័យថាកូនបាក់ឆ្អឹងច្រមុះ ឬផ្នែកណាមួយហើយ

៣- កូនហូរឈាមតាមត្រចៀក ក៏ជារឿងមិនល្អដែរ

៤- កូនហូរឈាមតាមច្រមុះ ស្ថិតក្នុងករណីគួរឲ្យបារម្ភខ្លាំង

៥- កូនក្អួត ដោយក្អួតជាប់ ក៏ជាសញ្ញាប៉ះពាល់ដល់ខួរក្បាលផ្នែកខាងក្នុង ឬខ្ទាំ

រោគសញ្ញាប៉ុន្មានខាងលើនេះ តម្រូវឲ្យម៉ាក់ប៉ាត្រូវនាំកូនទៅជួបគ្រូពេទ្យ ដើម្បីតាមដាន។ ក្នុងករណីខ្លះក្មេងជួបគ្រោះថ្នាក់ធ្ងន់ភ្លាមមិនទាន់លេចចេញសញ្ញាគួរឲ្យសង្ស័យឡើយ ហើយគ្រូពេទ្យតាមដានរហូតដល់មួយសប្ដាហ៍ ទើបអាចសន្និដ្ឋានថាប៉ះពាល់ ឬអត់។

អត្ថបទពាក់ព័ន្ធ៖

ម្ចាស់បន្ទប់ពិគ្រោះជំងឺកុមារ វត្តអង្គតាម៉ិញខាងលើបន្តថា ប្រសិនបើការដួលនោះប៉ះក្បាលត្រឹមជាំ ឬរលាត់ធម្មតាគ្មានបញ្ហាអ្វីទេ ប៉ុន្តែបើដួលទៅប៉ះពាល់ដល់ឆ្អឹងអាចប្រេះ ត្រូវប្រញាប់ទៅជួបគ្រូពេទ្យភ្លាម ព្រោះខ្លាចក្រែងប៉ះពាល់ដល់ខួរក្បាលទារក៖’កាលណាប៉ះពាល់ដល់ខួរក្បាលកូន ថ្ងៃក្រោយទៅកូនអាចមានអាការៈភ្លេចភ្លាំង ឬមិនបញ្ហាស្មារតីមិនល្អណាមួយ។ ចំណែកភ្លាមៗវិញបើប៉ះចំសរសៃឈាមវិញ គ្រោះថ្នាក់ខ្លាំងណាស់“។

ប៉ាម៉ាក់ខ្លះប្រាកដជាចង់ដឹងថាមានវិធីការពារមិនឲ្យកូនជួបបញ្ហានេះហើយ តែធម្មជាតិរបស់ទារកចូលដល់វ័យនេះ គឺជួបបញ្ហាដួលនេះគ្រប់គ្នា តែអាចទិញមួកការពារក្បាលទារក តាមមើលថែឲ្យបានដិតដល់ ឬរកទិញកម្រាលជ័រទន់ៗក្រាលកន្លែងកូនលេង យកកំណាត់ទៅបិទកន្លែងកែង ជើងតុ ទូ ជាដើម។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

ក្មេងទើបចេះតោងឈរ ដើរ ឧស្សាហ៍ដួល ប៉ះពាល់ដល់ខួរក្បាលអត់?