ចិញ្ចឹមកូនតូចមិនមែនជារឿងងាយនោះទេ ត្រូវការថែទាំឲ្យបានដិតដល់បំផុត តែប្រហែសបន្តិចឈឺភ្លាម។ តែទោះយ៉ាងណា បើយើងដឹងរបៀបចិញ្ចឹមកូនបានត្រឹមត្រូវ នោះអាចកាត់បញ្ហាបានច្រើន ម៉ាក់ប៉ាប្រហែលជាចង់ដឹងហើយមែនទេ តើមានតិចនិកអីខ្លះជួយឲ្យកូនលូតលាស់បានល្អ មិនសូវឈឺថ្កាត់?
តិចនិកសាមញ្ញៗជួយឲ្យកូនរឹងមាំ មិនឈឺផ្ដេសផ្ដាស
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
បំពេញបាន ៥ ចំណុចខាងក្រោមនេះ កូនៗលូតលាស់បានល្អ ងាយមិនឈឺ!
១- បំបៅដោះកូន
ការបំបៅកូនដោយទឹកដោះម្ដាយតែមួយមុខគត់រយៈពេល ៦ ខែ ដំបូង អាចកាត់បន្ថយការកើតជំងឺ ពិសេសជំងឺរាករូស និងជំងឺសួត ដោយសារទឹកដោះម្ដាយសម្បូរសារធាតុចិញ្ចឹម វីតាមីនច្រើនប្រភេទ ជួយដល់ការលូតលាស់ ធ្វើឲ្យខួរក្បាលវៃឆ្លាត និងមានអង់ទីករការពារជំងឺផ្សេងៗ។
អត្ថបទពាក់ព័ន្ធ៖ ក្មេងបៅទឹកដោះម្តាយ អាចចៀសផុតពីជំងឺធ្ងន់ធ្ងរដល់ទៅ៤មុខ
២- អនាម័យគ្រប់ពេល
ម៉ាក់ៗដឹងហើយថា កូនឈឺភាគច្រើនបណ្តាលមកពីអត់មានអនាម័យ ទាំងអនាម័យក្នុងការរស់នៅ និងចំណីចំណុក។ ចំពោះកូនម៉ឹមទឹកដោះគោ ចាំបាច់ត្រូវយកចិត្តទុកដាក់ចំពោះអនាម័យដបទឹកដោះគោ ត្រូវលាងនឹងសាប៊ូឲ្យបានស្អាត រួចស្រុសជាមួយទឹកក្ដៅសម្លាប់មេរោគ និងទឹកដែលយកមកឆុង ត្រូវតែទឹកស្អាត ឬទឹកដាំឲ្យពុះ ទើបកូនមិនងាយឈឺ។
៣- ផ្ដល់អាហារមានជីវជាតិ
ទោះទឹកដោះម្ដាយ មានអង់ទីករ ឬទឹកដោះគោដែលសម្បូរដោយ Prebiotic ជួយឲ្យប្រព័ន្ធការពារកូនរឹងមាំក៏ដោយ ក៏ចាប់ពី ៦ ខែ ទៅ កូនក្មេងត្រូវការអាហារចម្រុះបន្ថែម ដើម្បីការលូតលាស់សរីរាង្គ ឆ្អឹង និងខួរក្បាល។ អាហារ ៣ ក្រុមនេះសំខាន់សម្រាប់ក្មេងខ្លាំងណាស់៖
– អាហារថាមពល៖ ផ្ដល់ទាំងថាមពល និងកម្ដៅចំពោះរាងកាយ ដែលសម្បូរទៅដោយជាតិកាបូអ៊ីដ្រាតក្នុងនោះមាន ប្រេងឆា អង្ករ និងពពួកបន្លែមានជាតិម្សៅ ដូចជា ពោត ត្រាវ ដំឡូងជ្វា ជាដើម។
– អាហារសាងសង់៖ ក្រុមអាហារប្រូតេអ៊ីន ផ្ដល់ឲ្យនូវការជួសជុល សាងសង់កោសិកា និងជាលិកាក្នុងរាងកាយ និងធ្វើឲ្យលូតលាស់បានល្អ ក្នុងនោះមាន សាច់សត្វ ស៊ុត ទឹកដោះគោ សណ្ដែកដី តៅហ៊ូ និងផលិតផលធ្វើពីសណ្ដែកដទៃទៀត។
– អាហារការពារ៖ អាចការពារកូនក្មេងពីជំងឺផ្សេងៗ ដោយសារបានញ៉ាំពពួកបន្លែបៃតងដែលសម្បូរជាតិខនិជ និងវីតាមីនស្លឹកបាស ស្ពៃចង្កឹះ ផ្ទៃ ត្រកួន ឬល្ពៅ ហើយផ្លែឈើមានចេក ក្រូច ល្ហុង។
អត្ថបទពាក់ព័ន្ធ៖ អ្វីជា Prebiotics ហើយហេតុអ្វីពេលកូនទើបចេះដើរ ត្រូវការចាំបាច់បំផុត?
៤- ចាក់វ៉ាក់សាំងឲ្យកូន
ប្រព័ន្ធការពាររាងកាយក្មេងខ្សោយ មិនអាចទ្រាំទ្រនឹងការវាយប្រហារពីមេរោគផ្សេងៗបានទេ ដូច្នេះត្រូវចាក់វ៉ាក់សាំង ទើបអាចបញ្ចៀសពីការឆ្លងជំងឺបាន។ ចាប់ពីពេលកើតភ្លាម រហូតដល់អាយុ ៩ ខែ ម៉ាក់ប៉ាត្រូវនាំកូនទៅចាក់វ៉ាក់សាំងឲ្យបាន ១១ មុខ ទៅតាមគោលការណ៍ថ្នាក់ជាតិរបស់ក្រសួងសុខាភិបាល និងបន្ថែមការចាក់វ៉ាក់សាំងផ្សេងទៀត ទៅតាមអាយុ។
អត្ថបទពាក់ព័ន្ធ៖ ម៉ាក់ប៉ា ចំណាំទុក កាលវិភាគចាក់វ៉ាក់សាំងអូនតូច
៥- ប្រើថ្នាំតាមវេជ្ជបញ្ជា
បើក្មេងឈឺចៀសមិនរួចពីការប្រើថ្នាំសម្រាប់ព្យាបាលនោះទេ តែមុននឹងប្រើ ចាំបាច់ត្រូវពិគ្រោះជាមួយគ្រូពេទ្យ មិនត្រូវទិញថ្នាំផ្សំ ឬទិញថ្នាំតាមគ្នាឲ្យកូនញ៉ាំនោះទេ។ ការប្រើថ្នាំលើសកម្រិត ឬប្រើតិចពេក អាចធ្វើឲ្យកូនស៊ាំថ្នាំ ពិបាកព្យាបាល។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម