ម៉ាក់ៗមានកូនកើតអូទីស្សឹម ចែករំលែកវិធីជួយឲ្យកូនប្រសើរឡើង

សម្រាប់អ្នកម៉ាក់ដែលមានបញ្ហាកូនកើតអូទីស្សឹមប្រាកដជាចង់ដឹងពីវិធីដែលជួយឲ្យកូនមានភាពប្រសើរឡើងវិញហើយ។ ខាងក្រោមនេះជាបទពិសោធម៉ាក់ៗ ២ នាក់ដែលព្យាយាមឲ្យកូនបានវិវត្តច្រើនគួរសមវិញបាន។

១- ទៅរកគ្រូពេទ្យ និងគ្រូបង្រៀនជំនាញ

ម៉ាក់ៗឈ្មោះ រស់ រចនា បានរៀបរាប់ឲ្យដឹងថា «កូនខ្ញុំជាកុមារអូទីស្សឹម តើអ្នកដឹងទេថាកូនយើងជាកុមារអូទីស្សឹម? តើហេតុអ្វីបានជាកូនយើងជាក្មេងអូទីស្សឹម? បណ្ដាលមកពីការធ្វេសប្រហែសរបស់យើង ឬវាជាជំងឺមកពីកំណើត? នាងខ្ញុំសុំបកស្រាយថា មូលហេតុដែលធ្វើឲ្យគាត់មានជំងឺនេះ ព្រោះការឲ្យកូនមើលគ្រឿងអេឡិចត្រូនិច និងគ្មានពេលវេលាជជែកលេងជាមួយ»។ អ្នកនាងបានរៀបរាប់ថា កាលពីពពោះកូនទី១ គ្មានលទ្ធភាពគ្រប់គ្រាន់តាំងពីការញ៉ាំ ការគេង ការដើរ ព្រោះគ្រួសារកំពុងខ្វះខាត កូនរស់នៅកន្លែងរកស៊ី មនុស្សចេញចូលអ៊ូអរ ឆាប់បានឃើញ បាននិយាយជាមួយភ្ញៀវ និងអ្នកដទៃច្រើន ហើយកូនបែរចេះនិយាយតាំងពីមិនទាន់បាន ១ ខួប។

តែចូលដល់កូនទី ២ ម្ចាស់អាជីវកម្មបោះពុម្ពរូបនេះ ចាប់ផ្ដើមជីវភាពធូរធារជាងមុន ញ៉ាំរបស់ដែលចង់ញ៉ាំបានតាមចិត្ត មានផ្ទះ មានកន្លែងគេងស្រួល និងឲ្យកូនទើបកើតនៅតែផ្ទះជាមួយអ្នកមើលថែ មិនឲ្យទៅហាង ព្រោះកន្លែងព្រីនខ្នាតធំ សម្បូរសារធាតុគីមីច្រើន និងមានជីដូនទៅមើលម្ដងម្កាល ចំណែកអ្នកស្រី និងស្វាមីមិនសូវមើលថែកូនដិតដល់ ព្រោះរវល់រកលុយមកផ្គត់ផ្គង់ គ្រួសារ។ ពេលចូលដល់វ័យចេះនិយាយកូននិយាយបានមួយម៉ាត់ៗដូចក្មេងដទៃដែរ ប៉ុន្តែដោយសាររពឹស ហើយអ្នកមើលគេរវល់ធ្វើការផ្ទះ គាត់បានឲ្យក្មេងមើលទូរស័ព្ទ ចាប់តាំងពីនោះមកកូនមិននិយាយ ចង់និយាយបាននិយាយ មិនចង់មិននិយាយ ហៅមិនឆ្លើយ មិនងាក ឆាប់ខឹង ឆេវឆាវ ទោះជាក្មេងមិនសូវឈឺផ្ដេសផ្ដាស ញាំបានគេងបាន ថ្លោសក៏ដោយ។ អ្នករស់នៅរាជធានីភ្នំពេញរូបនេះបន្តទៀតថា ទម្រាំដឹងថា កូនមានជំងឺបែបនេះ កូនចូលដល់អាយុ ២ ខួបកន្លះ ស្របពេលផ្អើលរឿងក្មេងកើតអូទីស្សឹមច្រើន ហើយអ្នកនាងក៏ព្យាយាមរកកន្លែង ឬពេទ្យតាមគេប្រាប់ ដើម្បីព្យាបាលកូនឲ្យទាន់ពេលវេលា។ ពេលទៅពេទ្យផ្នែកក្មេងកើតអូទីស្សឹម គេព្យាយាមធ្វើតេស្តថា ក្មេងអូទីស្សឹមកម្រិតណា ហើយគេផ្ដល់ជាយោបល់ ថាយកគាត់ទៅដាក់សាលា កុំទុកគាត់នៅផ្ទះទៀត ដើម្បីឲ្យកូនបានទៅជួបសង្គមខាងក្រៅ។

អត្ថបទពាក់ព័ន្ធ៖ បើកូនកើតអូទីស្សឹម គួរយកទៅព្យាបាលនៅពេទ្យណា?

អូទីស្សឹម

ប៉ុន្តែផលវិបាក គឺសាលាខ្លះថ្លៃមែនតែមិនទទួលក្មេងមានជំងឺនេះទេ ព្រោះពិបាកនិយាយស្តាប់គ្នាបាន ពេលចង់បៅក៏មិនចេះនិយាយប្រាប់ ចង់ជុះក៏មិនប្រាប់។ តែដោយសារការព្យាយាមស្វែងរកសាលាណាដែលគេទទួលក្មេងអូទីស្សឹម ទើបជួបសាលាមួយ ហើយតាំងពីពេលនោះមកស្ត្រីវ័យ ៣០ ស្ដើងរូបនេះ ព្យាយាមមើលថែកូនផ្ទាល់ លេងជាមួយ បង្រៀនកូននិយាយ ព្រមទាំងនៅសាលាគ្រូមានតិចនិកបង្ហាត់ច្រើនទៀត កូនក៏ចាប់ផ្ដើមវិវត្តមកសភាពដូចក្មេងដទៃបានច្រើន។ មកទល់ពេលនេះ កូនអ្នកនាង រចនា មានអាយុជិត ៤ ឆ្នាំ ហើយចេះច្រើនខុសពីមុនឆ្ងាយ ៧០ ភាគរយ ដោយអាចនិយាយប្រាស្រ័យទាក់ទងជាមួយមនុស្សជុំវិញខ្លួនបាន ដឹងខុសដឹងត្រូវ ចេះសុំពេលចង់បានអ្វីមួយ ស្គាល់អ្នកជុំវិញខ្លួនទាំងអស់ ដែលឫកពាប្រសើរខុសពីពេលមុនឆ្ងាយណាស់។ សូម្បី ទូរស័ព្ទក៏លែងយំទារលេង ដោយផ្ដាច់ការញៀនទូរស័ព្ទបានទាំងស្រុង។ ពេលឃើញសភាពកូនត្រលប់មកប្រក្រតីម៉ាក់ៗរូបនេះ ពិតជារំភើបខ្លាំងព្រោះអាចកែខៃកូនបានទាន់ពេល ហើយអ្នកនាងក៏សូមផ្ដាំដល់ម៉ាក់ៗដទៃកុំឲ្យប្រហែស ព្រោះអាចស្គាយក្រោយទៅថ្ងៃមុខ។

២- នាំកូនចេញពីកន្លែងធ្វើឲ្យមានបញ្ហា

ចំណែកម៉ាក់ៗ បាន សុផានី វិញបានចែករំលែករឿងដែលនាំឲ្យកូនកើតជំងឺអូទីស្សឹមនេះថា ដោយសារតែគ្រួសារមានបញ្ហាច្រើន បូករួមម៉ាក់ប៉ាឈ្លោះប្រកែកគ្នានៅចំពោះមុខកូន ជាពិសេសវ៉ៃធ្វើបាប ហើយអ្នកមើលថែសម្លុតគំរាមកំហែងទៀត ធ្វើឲ្យកូនលែងនិយាយស្ដី គិតតែឈ្ងោកមុខរហូត។ អ្នករស់នៅភ្នំពេញរូបនេះថាទម្រាំដឹងខ្លួនកូនអាយុ ៤ ឆ្នាំបាត់ហើយ នៅពេលទៅរកគ្រូពេទ្យ ស្ទើរតែហួសពេល ហើយគ្រូពេទ្យបានឲ្យដឹងថាបើបន្តទុកយូរបន្តិចទៀត ភាគរយវិវត្តមកជាក្មេងប្រក្រតីក៏កាន់តែតិច។

បន្ទាប់ពីស្ដាប់ការរៀបរាប់របស់គ្រូពេទ្យ និងណែនាំឲ្យគ្រួសារមានការផ្លាស់ប្ដូរទម្លាប់មួយចំនួន ធ្វើឲ្យស្ត្រីវ័យ ២៨ ឆ្នាំរូបនោះសម្រេចចិត្តដូរកន្លែងរស់នៅ ដោយយកកូនទៅនៅអង់គ្លេស ហើយកាត់ផ្ដាច់ក្មេងពីពិភពអ៊ីនធឺណិត។ នៅទីនោះពេទ្យបានឲ្យយើងនិយាយជាមួយកូនឲ្យបានច្រើន និងបង្រៀនអ្វីដែលនៅជុំវិញខ្លួន បើទោះជាដំបូងៗមិនសូវបានផលក៏ត្រូវតែខិតខំដែរ រហូតដល់ កន្លះឆ្នាំកូនចាប់ផ្ដើមស្គាល់អ្វីៗ ហើយនៅសាលាគ្រូបង្រៀនមានជំនាញខ្ពស់ បូករួមនិងសកម្មភាពដែលមាននៅក្នុងសាលា ធ្វើឲ្យកូនប្រុសអ្នកនាងចាប់ផ្ដើមចេះសើច ងើបមុខឡើង និងហ៊ានលេងជាមួយមិត្តរួមថ្នាក់ និងឥឡូវអាចចូលរៀនថ្នាក់ធម្មតាបានហើយ។ បន្ថែមពីនោះ តាំងពីទៅរស់នៅបរទេសមួយរយៈ ស្វាមីអ្នកនាងក៏ផ្លាស់ប្ដូរឥរិយាបថមួយចំនួន ហើយឧស្សាហ៍ឡើងចុះមើលកូន ទើបជួយឲ្យផ្លូវចិត្តក្មេងចាប់ផ្ដើមមានលំនឹងឡើងវិញ។ អតីតបុគ្គលិក ផ្នែកអចលទ្រព្យរូបនេះ បានបន្តទៀតថា ប្រសិនបើមិនជ្រើសរើសនាំកូនចាកចេញពីកន្លែង និងអ្នកធ្លាប់ធ្វើឲ្យឈឺចិត្ត កូនប្រហែលជាមិនអាចនិយាយស្ដីបានទៀតឡើយ ហើយគ្រួសារក៏នឹងបែកបាក់គ្នាផងក៏មិនដឹង ព្រោះត្រូវឈ្លោះប្រកែកគ្នា រឿងបំពេញតួនាទីមើលថែទាំកូន។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

ត្រួតពិនិត្យដោយ

វេជ្ជ. ចាន់ ស៊ីណេត

ឯកទេសសម្ភព និងរោគស្ត្រី · មន្ទីរពេទ្យបង្អែកមិត្តភាពកម្ពុជា-ចិន សែនសុខ

អត្ថបទដោយ Try Ravi · កែ 26/11/2019

ម៉ាក់ៗមានកូនកើតអូទីស្សឹម ចែករំលែកវិធីជួយឲ្យកូនប្រសើរឡើង

១- ទៅ​រក​គ្រូពេទ្យ និង​គ្រូ​បង្រៀន​ជំនាញ

២- នាំ​កូន​ចេញ​ពី​កន្លែង​ធ្វើឲ្យ​មាន​បញ្ហា

១- ទៅរកគ្រូពេទ្យ និងគ្រូបង្រៀនជំនាញ

២- នាំកូនចេញពីកន្លែងធ្វើឲ្យមានបញ្ហា