ម្តាយដែលបំបៅកូនដោយទឹកដោះ មានការប្រុងប្រយ័ត្នខ្លាំងទៅលើរបបចំណីអាហារ ការប្រើថ្នាំ ឬក៏ចាក់ថ្នាំជាដើម មិនអ៊ីចឹងទេកូននឹងស្រូបយកសារធាតុទាំងនោះតាមរយៈទឹកដោះ។ ហេតុនេះហើយទើបម៉ាក់ៗឆ្ងល់ច្រើន អំពីការចាក់វ៉ាក់សាំងកូវីដ-១៩ តើម្តាយដែលបំបៅដោះកូនអាចចាក់វ៉ាក់សាំងកូវីដ-១៩ បានអត់? ក្រោយចាក់រួច តើគួរបំបៅដោះកូនទេ? បើបំបៅដោះអាចនឹងមានផលប៉ះពាល់ដល់កូនទេ?
ការចាក់វ៉ាក់សាំងជាមធ្យោបាយតែមួយគត់ដែលអាចបង្ការការឆ្លងជំងឺកូវីដ-១៩ ទោះមិនបាន ១០០% ក៏ការឆ្លងនោះមិនបង្កគ្រោះថ្នាក់ធ្ងន់ធ្ងរដល់ជីវិតដែរ។ ពាក់ព័ន្ធនឹងចម្ងល់ខាងលើ អង្គការសុខភាពពិភពលោក (WHO) ផ្ដល់ជាអនុសាសន៍ថា ប្រសិនបើស្ត្រីដែលកំពុងបំបៅកូន គឺជាបុគ្គលិកសុខាភិបាល ឬស្ថិតនៅក្នុងក្រុមអាទិភាព ដើម្បីទទួលបានការចាក់វ៉ាក់សាំងជំងឺកូវីដ-១៩ នោះគួរផ្ដល់ការចាក់វ៉ាក់សាំងជំងឺកូវីដ-១៩។
ការបំបៅកូនផ្ដល់ប្រយោជន៍ផ្នែកសុខភាពច្រើនដល់ស្ត្រី និងកូនដែលកំពុងទទួលបានការបំបៅដោះ។ អង្គការសុខភាពពិភពលោកមិនណែនាំឱ្យផ្ដាច់ការបំបៅដោះកូនក្រោយការចាក់វ៉ាក់សាំងកូវីដ-១៩ នោះឡើយ ពោលគឺម៉ាក់ៗអាចបំបៅដោះកូនបានធម្មតា។
ក្នុងបទសម្ភាសនាពេលកន្លងមក លោកជំទាវ ឱ វណ្ណឌីន ប្រធានគណៈកម្មការចំពោះកិច្ចចាក់វា៉ក់សាំងកូវីដ-១៩ និងជាអ្នកនាំពាក្យក្រសួងសុខាភិបាលបានលើកឡើងថា ការចាក់វ៉ាក់សាំងកូវីដ-១៩ អំឡុងពេលមានផ្ទៃពោះមិនទាន់មានការណែនាំណាមួយឲ្យចាក់នោះទេ ដោយឡែកស្ត្រីដែលបំបៅកូនអាចមកទទួលការចាក់វ៉ាក់សាំងបង្ការជំងឺកូវីដ-១៩ បាន និងអាចបំបៅដោះកូនបានធម្មតា។
[embed-health-tool-bmi]
