មកដឹងពីជំងឺមហារីទាំង ៥ ឧស្សាហ៍កើតឡើងបំផុតលើមនុស្សស្រី

មហារីកជាជំងឺកាចសាហាវ គួរណាស់តែគ្នាយើងស្រីៗស្វែងយល់ព័ត៌មានពីជំងឺ និងរោគសញ្ញាឲ្យបានច្បាស់ ព្រោះមហារីក ជាជំងឺកាចសាហាវ កើតឡើងនៅលើរាងកាយយើងស្ងាត់ៗ ទម្រាំតែដឹង អាចហួសពេលព្យាបាល។

ជំងឺមហារីកលើមនុស្សស្រីទាំង ៥មុខ

១. ជំងឺមហារីកសុដន់៖ ជំងឺមហារីកសុដន់ អាចកើតឡើងលើមនុស្សស្រីគ្រប់វ័យ ប៉ុន្តែបើអាយុកាន់តែខ្ពស់ ហានិភ័យកើតមហារីកសុដន់ក៏កាន់តែខ្ពស់ដូចគ្នា។ ហានិភ័យប្រឈមកើតមហារីកសុដន់មានច្រើនដូចជា ភេទស្រី អាយុ ប្រវត្តិគ្រួសារ កត្តាហ្សែន ធាត់លើសទម្ងន់ អស់រដូវ ឬមិនធ្លាប់មានរដូវ។ រោគសញ្ញាស្រីគ្នាយើងគួរកត់សម្គាល់រួមមាន៖

ឈឺក្នុងក្លៀក ឬសុដន់ មិនមែនបណ្ដាលពីការមកវដ្តរដូវ
មានទ្រុឌ ឬស្បែកសុដន់ឡើងក្រហម ដូចផ្លែក្រូច
រមាស់ចុងសុដន់ម្ខាង
មានខ្ទុះចេញពីចុងសុដន់ អាចមានទាំងឈាមមកជាមួយ
ចុងសុដន់លិបចូលក្នុង
សុដន់ម្ខាងធំជាងម្ខាងទៀត
ឡើងប្រេះស្រកា ឬរបកស្បែកសុដន់ ស្បែកចុងសុដន់។

២. ជំងឺមហារីកមាត់ស្បូន៖ ជំងឺមហារីកមាត់ស្បូន ឧស្សាហ៍ជួបប្រទះបំផុតលើស្រ្ដីពាសពេញពិភពលោក។ មហារីកមាត់ស្បូន បង្កឡើងនៅក្នុងមាត់ស្បូន ស្ថិតនៅផ្នែកក្រោមស្បូន ចាប់ផ្តើមរីកលូតលាស់មិនអាចគ្រប់គ្រងបាន។ កោសិកាថ្មី កកើតឡើងឆាប់រហ័ស បង្កើតជាដុំសាច់នៅក្នុងកស្បូន។ កត្តាប្រឈមនៃជំងឺមហារីកស្បូនមាន ឆ្លងមេរោគ HPV ជក់បារី ប្រព័ន្ធភាពស៊ាំធ្លាក់ចុះ ឆ្លងមេរោគប្រមេះ ញ៉ាំផ្លែឈើ បន្លែតិចតួច និង ធាត់លើសទម្ងន់។ ស្រីៗគួរតាមដានមើលរោគសញ្ញាដូចជា៖

ឈឺចាប់ពេលរួមភេទ
ឈឺពោះផ្នែកខាងក្រោម ឬឈឺត្រគាក
ធ្លាក់សខុសប្រក្រតី មានឈាមលាយឡំជាមួយ
ធ្លាក់ឈាមតាមទ្វារមាស មានលក្ខណៈមិនប្រក្រតី ធ្លាក់ឈាមចន្លោះពេលមានរដូវ មករដូវមានរយៈពេលយូរ
មានឈាមក្រោយពេលរួមភេទ អំឡុងពេលរួមភេទ ឬក្រោយពេលអស់រដូវ មានឈាមបន្ទាប់ពីបន្ទោបង់ និងក្រោយពិនិត្យអាងត្រគាក។

៣. ជំងឺមហារីកពោះវៀនធំ៖ មហារីកពោះវៀនធំគឺជាមហារីកកើតឡើងលើសរីរាង្គពោះវៀនធំដែលជាផ្នែកចុងក្រោយនៃផ្លូវរំលាយអាហាររបស់មនុស្ស។ កត្តាប្រឈមកើតជំងឺមហារីកពោះវៀនធំមាន អាយុច្រើន មានសាច់ដក់ក្នុងប្រហោងពោះវៀន មានរបបអាហារមានជាតិសរសៃតិច ជក់បារី និងផឹកស្រាច្រើន អង្គុយធ្វើការច្រើនមិនសូវបញ្ចេញកម្លាំងកាយ។ រោគសញ្ញាគួរតាមដានមាន៖

ចលនាពោះវៀនធំមានការប្រែប្រួលដូចជាទល់លាមក ឬរាកខុសប្រក្រតីជាច្រើនសប្ដាហ៍
មានការហូរឈាមតាមរន្ធគូថ
ឈឺពោះចុក និងឆ្អល់ណែនជាប្រចាំ
មានអារម្មណ៍ថាពោះវៀនមានស្ទះអ្វីមួយ
នឿយហត់ និងអស់កម្លាំង
ស្រកទម្ងន់ជាដើម

៤. ជំងឺមហារីកស្រទាប់ស្បូន៖ មហារីកស្រទាប់ស្បូន ជាមហារីកដែលកើតដំបូងនៅក្នុងស្បូន។ ជំងឺនេះចាប់ផ្ដើមដំបូងនៅក្នុងស្រទាប់កោសិការបស់ស្រទាប់ស្បូន ពេលខ្លះគេក៏អាចហៅវាថាមហារីកស្បូនផងដែរ។ កត្ដាប្រឈមធ្វើឲ្យកើតជំងឺមហារីកស្រទាប់ស្បូនមានដូចជា អាយុ ចំណីអាហារ និងលំហាត់ប្រាណ ជំងឺទឹកនោមផ្អែម ប្រវត្តិគ្រួសារដូចជាមានសាច់ញាតិកើតមហារីកស្រទាប់ស្បូន ឬមហារីកពោះវៀនធំជាដើម។ រោគសញ្ញាទូទៅរបស់មហារីកស្រទាប់ស្បូនមាន៖

ហូរឈាមតាមទ្វារមាសក្រោយអស់រដូវ
មានធ្លាក់ឈាមចន្លោះវដ្តរដូវ
ធ្លាក់ស ឬឈាមខុសធម្មតាតាមទ្វារមាស
ឈឺត្រគាក

៥. ជំងឺមហារីកក្រពេញអូវែ៖ មហារីក្រពេញអូវែ ជាដុំមហារីកវិវត្តនៅក្នុងក្រពេញអូវែ ដែលជាកន្លែងផលិតស៊ុត (មេជីវិតញី) និងអ័រម៉ូនស្រ្តី ដូចជា អ័រម៉ូនអឺស្រ្តូសែន និងប្រ្តូហ្គេសេ្តរ៉ូន។ មហារីកក្រពេញអូវែ ភាគច្រើនកើតចំពោះស្រីៗវ័យកណ្តាល ខណៈករណីស្រីៗស្លាប់ដោយសារកើតមហារីកក្រពេញអូវែ ភាគច្រើនលើស្រីៗមានវ័យលើសពី ៥៥ ឆ្នាំ។ កត្តាប្រឈមជំងឺមហារីកក្រពេញអូវែមាន មានជំងឺមហារីកសុដន់ មានកូនតិច ប្រើប្រាស់ថ្នាំអ័រម៉ូនយូរឆ្នាំ និងកត្តាអាយុ។ រោគសញ្ញាយើងគួរតាមដានមានដូចជា៖

ហើមពោះ និងយារប៉ោង
ឆាប់ឆ្អែតពេលញ៉ាំអាហារ
ស្រកទម្ងន់
មានអារម្មណ៍មិនស្រួលនៅតំបន់អាងត្រគាក
ផ្លាស់ប្តូរការបន្ទោបង់
បត់ជើងតូចញឹកញាប់
រដូវមិនទៀង
ចង្អោរ ក្អួត មិនរំលាយអាហារ មិនចង់ញុំអាហារ ហើមពោះ
ឈឺឆ្អឹងខ្នងដោយគ្មានមូលហេតុ៕

ត្រួតពិនិត្យដោយ

វេជ្ជ. ចាន់ ស៊ីណេត

ឯកទេសសម្ភព និងរោគស្ត្រី · មន្ទីរពេទ្យបង្អែកមិត្តភាពកម្ពុជា-ចិន សែនសុខ

អត្ថបទដោយ នាង សុខុមដាលីញ៉ា · កែ 08/07/2021

មកដឹងពីជំងឺមហារីទាំង ៥ ឧស្សាហ៍កើតឡើងបំផុតលើមនុស្សស្រី

ជំងឺ​មហារីក​លើ​មនុស្ស​ស្រី​ទាំង ៥មុខ

ជំងឺមហារីកលើមនុស្សស្រីទាំង ៥មុខ