អាលែកហ្ស៊ីនឹងគ្រឿងស្រវឹង ឬជាតិអាល់កុលគឺ ជាករណីកម្រកើតមានណាស់ តែប្រតិកម្មនេះអាចធ្វើឲ្យមានគ្រោះថ្នាក់ធ្ងន់ធ្ងរ ហើយមនុស្សមួយចំនួនក៏មានបញ្ហាអាលែកហ្ស៊ីទៅនឹងសារធាតុផ្សំនៅក្នុងគ្រឿងស្រវឹងទាំងនោះដែរ។ អ្នកមានបញ្ហាអាលែកហ្ស៊ីនឹងគ្រឿងស្រវឹងត្រូវចៀសវាងផឹកគ្រឿងស្រវឹង ឬផលិតផលមានផ្សំពីជាតិអាល់កុល។
១. រោគសញ្ញាអាលែកហ្ស៊ីនឹងគ្រឿងស្រវឹង ឬជាតិអាល់កុល
ប្រសិនជាគ្នាយើងមានបញ្ហាអាលែកហ្ស៊ីនឹងគ្រឿងស្រវឹង សូម្បីតែបរិមាណតិចតួចដែលយើងផឹកក៏ធ្វើឲ្យមានចេញរោគសញ្ញាដែរ។ ក្នុងករណីខ្លះ អាចបង្កទៅជាអាលែកហ្ស៊ីកម្រិតធ្ងន់ធ្ងរ(anaphylaxis)ទៀតផង ដែលអាចនាំឲ្យមានការគំរាមកំហែងដល់អាយុជីវិតផងដែរ។
រោគសញ្ញាប្រតិកម្មអាលែកហ្ស៊ីនឹងគ្រឿងស្រវឹង ឬជាតិអាល់កុលមានដូចជា៖
- រមាស់មាត់ ភ្នែក ឬច្រមុះ
- ឡើងកន្ទាលត្រអាក ត្រអក ឬរមាស់នៅលើស្បែក
- ហើមមុខ បំពង់ក ឬកន្លែងផ្សេងទៀតលើដងខ្លួន
- តឹងច្រមុះ ដកដង្ហើមឮដូចហួច ឬពិបាកដកដង្ហើម
- ឈឺចាប់ខុសធម្មតា ចង្អោរ ក្អួត ឬរាក
- វិលមុខ ធេងធោង ឬសន្លប់
បើឃើញមានចេញរោគសញ្ញាទាំងនេះមិនត្រូវទុកយូរនោះទេ ត្រូវស្វែងរកការព្យាបាលឲ្យបានត្រឹមត្រូវ។ បើយើងមិនស្វែងរកការព្យាបាលទេ នឹងអាចធ្វើឲ្យរោគសញ្ញាកាន់តែអាក្រក់ឡើង ហើយមានករណីកម្រខ្លះអាចឈានដល់បាត់បង់ជីវិតផង។
២. មូលហេតុបង្កអាលែកហ្ស៊ីនឹងគ្រឿងស្រវឹង ឬជាតិអាល់កុល
ប្រសិនជាយើងមានបញ្ហាអាលែកហ្ស៊ីនឹងគ្រឿងស្រវឹង ប្រព័ន្ធភាពស៊ាំរបស់យើងគឺមានប្រតិកម្មខ្លាំងជ្រុលទៅនឹងធាតុបង្កឲ្យមានអាលែកហ្ស៊ី (អាលែកហ្ស៊ែន)។ បើយើងមានបញ្ហាអាលែកហ្ស៊ីនឹងគ្រឿងស្រវឹង ប្រព័ន្ធភាពស៊ាំយើងចាត់ទុកអាល់កុលជាធាតុបង្កគ្រោះថ្នាក់។ ប្រព័ន្ធភាពស៊ាំនឹងផលិតអង់ទីករមានឈ្មោះថា IgE ដែលអង់ទីករទាំងនេះភ្ញោចឲ្យមានប្រតិកម្មខ្លាំងនៅក្នុងរាងកាយ។
ដូចនេះហើយ បើគ្នាយើងមានប្រតិកម្មនឹងគ្រឿងស្រវឹង យើងត្រូវចៀសវាងផឹកគ្រឿងស្រវឹង ឬផលិតផលណាដែលមានគ្រឿងផ្សំមានជាតិអាល់កុល។ អាហារមួយចំនួន ក៏មានប្រើអាល់កុលជាគ្រឿងផ្សំដែរ។ ដូចនេះយើងត្រូវអានស្លាកសញ្ញាឲ្យបានច្បាស់លាស់មុនទទួលទាន ឬបើទៅញ៉ាំនៅហាងត្រូវសួរនាំឲ្យបានដឹងថាតើអាហារដែលយើងហៅ មានផ្សំគ្រឿងនឹងជាតិអាល់កុលឬយ៉ាងណា។
[embed-health-tool-bmr]
