ចូលចិត្តព័ត៌មាន “Hello គ្រូពេទ្យ” សូមចូលរួមស្ទង់មតិនៅទីនេះ។ មតិអ្នកទាំងអស់គ្នា ពិតជាមានតម្លៃសម្រាប់ “Hello គ្រូពេទ្យ” អាចកែលម្អព័ត៌មានឲ្យកាន់តែប្រសើរ!
ស្ត្រីដែលបង្កកំណើតកូនក្រៅស្បូនប្រឈមនឹងគ្រោះថ្នាក់ខ្លាំង ប្រសិនបើមិនអាចជួយបានទាន់ពេលវេលា បណ្ដាលឲ្យបែកឈាមពេញពោះ។ តើហេតុអ្វីបានជាដៃស្បូនមិនអាចទ្រទ្រង់ការលូតលាស់របស់គភ៌បាន?
សាស្ត្រាចារ្យវេជ្ជបណ្ឌិត កែវ មួយស្រូយ ឯកទេសសម្ភព និងរោគស្ត្រីថាកូនក្រៅស្បូនជាកូនដែលមិននៅក្នុងស្បូន ដែលវាទុំលើដៃស្បូនអាចខាងឆ្វេង ឬស្ដាំ ហើយដៃស្បូនមានសភាពទន់ៗ តូចមែនទែនប្រហាក់ប្រហែលសរសៃធូប និងកន្លែងខ្លះប៉ុនជើងធូបតែប៉ុណ្ណោះ មិនអាចរីករួមដូចតួស្បូនបានឡើយ។
អនុប្រធានមជ្ឈមណ្ឌលជាតិគាំពារមាតា និងទារកបានបន្តទៀតថា ព្រោះតែដៃស្បូនមានសាច់ដុំបន្តិចបន្តួច និងវាមានចលនាតែនាំគ្រាប់ពូជពីក្រពេញទៅក្នុងស្បូន ដើម្បីឲ្យគ្រាប់ពូជបង្កកំណើត ហើយការកបង្កកំណើតនោះ ១/៣ នៅដៃស្បូននៅខាងក្រៅ។ បន្ទាប់ពីបង្កកំណើតហើយបានត្រឡប់ចូលទៅក្នុងស្បូនវិញ ហើយដៃស្បូនជាអ្នកបឺតចូលទៅ។ លោកបន្ថែមទៀតថា បើមានឧបសគ្គណាមួយ គ្រាប់ពូជដែលបង្កកំណើតហើយនោះ មិនអាចរត់ចូលទៅក្នុងស្បូនទាន់ក្នុងអំឡុងថ្ងៃទី ៥ គឺនៅជាប់ត្រង់នោះ ដែលហៅថាកូនក្រៅស្បូន។
ចំពោះមូលហេតុដែលដៃស្បូនមិនអាចទ្រទ្រង់ការរីកធំធាត់របស់គភ៌បាន ព្រោះក្នុងមួយខែគភ៌វិវត្តន៍បានទំហំ ១ សង់ទីម៉ែត្រ តែដៃស្បូនមានរូបរាងប៉ុនធូប ឬទំហំស្មើនឹងកន្លះសង់ទីម៉ែត្រ។ នៅពេលគភ៌ធំ ដៃស្បូននឹងរីកប៉ោងរហូតប្រេះ ហើយយ៉ាងយូរលើសពីមួយខែបន្តិចបណ្ដាលឲ្យបែកសរសៃឈាម បូករួមទាំងដៃស្បូនសម្បូរសរសៃឈាមទៀតនោះ ឈាមនឹងហូរពេញពោះ។
ក្រោយពេលបែកហូរឈាមពេញពោះស្ត្រីនឹងមានអារម្មណ៍ថាឈឺអួលៗ និងសភាពស្លេកទៅៗព្រោះបាត់បង់ឈាមនោះឯង។ ការបែកឈាមតាមសរសៃឈាមដៃស្បូនរហូតដក់ក្នុងពោះ អាចបណ្ដាលឲ្យគ្រោះថ្នាក់ដល់ជីវិត។ ប្រសិនបើការហូរឈាមលើសពី ១ លីត្រស្រ្តីអាចមានសញ្ញាចង់សន្លប់ ដោយសារការខ្វះឈាម ហើយបើហូរអស់ ៣ លីត្រជាងពីក្នុងខ្លួនអាចស្លាប់បាន បើសង្គ្រោះមិនទាន់ពេលវេលា។
[embed-health-tool-due-date]
