អំឡុងពេលមានផ្ទៃពោះ រាងកាយរបស់ស្រីៗយើងមានការផ្លាស់ប្ដូរគួរឲ្យកត់សម្គាល់។ ពិតណាស់ ដើម្បីធានាថាម៉ាក់ៗ និងទារកក្នុងផ្ទៃមានសុខភាពល្អ ម៉ាក់ៗតែងតែគិតគូរដល់ការធ្វើលំហាត់ប្រាណជាប្រចាំ។ យ៉ាងណាមិញ ការរត់ហាត់ប្រាណអាចជាវិធីសាស្ត្រដ៏មានប្រសិទ្ធភាព ដើម្បីឲ្យរាងកាយមានភាពសកម្ម និងមានសុខភាពល្អ។ ទោះបីជាការធ្វើលំហាត់ប្រាណកម្របណ្ដាលឲ្យមានការរលូតកូនក៏ពិតមែន ប៉ុន្តែនៅក្នុងករណីខ្លះ វាក៏អាចបង្កើនហានិភ័យនៃការរលូតកូនផងដែរ។
អត្ថប្រយោជន៍នៃលំហាត់ប្រាណ
ការធ្វើលំហាត់ប្រាណ រួមទាំងការរត់ អាចធ្វើឲ្យចរន្តឈាមពាសពេញរាងកាយមានភាពប្រសើរឡើង។ បន្ថែមពីនេះ វាក៏អាចធ្វើឲ្យរាងកាយ និងបេះដូងរបស់ម៉ាក់ៗមានសុខភាពល្អ ព្រមទាំងអាចជួយកាត់បន្ថយស្រ្តេស និងការថប់បារម្ភ ដែលអាចប៉ះពាល់ដល់កូនក្នុងផ្ទៃថែមទៀតផង។ ចំពោះម៉ាក់ៗដែលមិនសូវសកម្ម ក៏អាចសម្រាលកូនដែលមានសុខភាពល្អដូចគ្នា ប៉ុន្តែបើចង់ទទួលបានសុខភាពល្អទាំងម្ដាយ និងកូន ការធ្វើលំហាត់ប្រាណគឺជារឿងដែលមិនគួរមើលរំលងឡើយ។
ការផ្លាស់ប្ដូរ ក្នុងអំឡុងពេលពពោះ
ស្រីៗយើងអាចទទួលបានបទពិសោធន៍ពពោះផ្សេងៗគ្នា ហើយម៉ាក់ៗភាគច្រើននៅតែបន្តការធ្វើលំហាត់ប្រាណ ដូចជាការរត់ជាដើម។ ប៉ុន្តែ ប្រសិនបើយើងមិនធ្លាប់រត់មុនពេលមានផ្ទៃពោះទេនោះ ម៉ាក់ៗមិនគប្បីធ្វើលំហាត់ប្រាណនេះឡើយ។ ម្យ៉ាងវិញទៀត បើសិនជាយើងតែងតែរត់ជាប្រចាំ ម៉ាក់ៗក៏ត្រូវទទួលបានការអនុញ្ញាតជាមុនពីគ្រូពេទ្យសិនដែរ។
ហានិភ័យនៃការរលូតកូន
យោងតាមការស្រាវជ្រាវមួយបានបង្ហាញថា ម៉ាក់ៗដែលធ្វើលំហាត់ប្រាណប្រភេទធ្ងន់ ដូចជាការរត់រយៈពេល៧ម៉ោង ឬច្រើនជាងនេះក្នុងមួយសប្ដាហ៍ អាចបង្កើនហានិភ័យនៃការរលូតកូនខ្ពស់បំផុតនៅសប្ដាហ៍ទី២២ដំបូងនៃការពពោះ ពីព្រោះតែជំហាននីមួយនៃការរត់រុញច្រានស្បូនទៅវិញទៅមកដែលបណ្ដាលឲ្យមានការរលូតកូន។
ចូរប្រុងប្រយ័ត្នចំពោះសុខភាពរាងកាយរបស់យើងនៅអំឡុងពេលពពោះ និងជាពិសេសនៅពេលដែលម៉ាក់ៗធ្វើលំហាត់ប្រាណ។ ក្នុងករណីដែលយើងមានសម្ពាធឈាមខ្ពស់ ជំងឺទឹកនោមផ្អែមពេលពពោះ ឬធ្លាប់រលូតកូនពីមុនមក ចូរកុំអនុវត្តន៍ការរត់ឲ្យសោះនៅអំឡុងពេលមានគភ៌។ ម្យ៉ាងវិញទៀត ម៉ាក់ៗដែលមានកូនភ្លោះ ក៏មិនគប្បីធ្វើលំហាត់ប្រាណដោយការរត់ដូចគ្នា។ ប្រសិនបើម៉ាក់ៗមានធ្លាក់ឈាមពីទ្វារមាស ឬឈឺពោះខ្លាំង សូមទាក់ទង ឬទៅពិគ្រោះយោបល់ជាមួយនឹងគ្រូពេទ្យភ្លាមៗ ពីព្រោះវាអាចជាសញ្ញានៃការរងរបួស ដែលអាចបណ្ដាលឲ្យមានការរលូតកូន។
[embed-health-tool-due-date]
