សប្តាហ៍ទី ១៦៖ នៅក្នុងពោះសោះ អាអូនចេះលេងទឹកមុខម៉ាអេម
ការលូតលាស់គភ៌
ពរពោះឈានដល់សប្តាហ៍ទី ១៦ហើយ គភ៌មានទំហំប៉ុនផ្លែប៊ឺរ ទម្ងន់ប្រហែល ១០០ក្រាម និងប្រវែង ១២ សង់ទីម៉ែត្រ។ ឆ្អឹងខ្នង និងសាច់ដុំខ្នងលូតលាស់ល្អអាចឲ្យបេប៊ីក្នុងផ្ទៃងើបក្បាលត្រង់បាន។ មានន័យថា អាអូនអាចនឹងបញ្ចេញទឹកមុខខ្លះៗហើយដូចជាព្រិចភ្នែក ជ្រួញចិញ្ចើម និងញញឹមជាដើម។
បើសិនជាយើងអាចមើលទម្លុះស្បូនបាន នោះយើងនឹងឃើញថាស្បែកអាអូនមានសភាពថ្លាឆ្វង់ ឃើញសរសៃឈាមតូចៗនៅតាមស្រទាប់ស្បែក ដោយសារអាអូនមិនទាន់មានខ្លាញ់នៅតាមស្បែក។ ត្រចៀកកូនយើងមានពេញលេញហើយ ដូចនេះគេអាចឮសំឡេងរបស់ម៉ាក់។
ការនិយាយទៅកាន់បេប៊ី ឬច្រៀងឲ្យស្តាប់ ជាវិធីដ៏ល្អសម្រាប់ភ្ជាប់ទំនាក់ទំនងរវាងយើងទៅកូន។ អាអូនអាចមានអារម្មណ៍ល្អ រីករាយ ដែលបានឮសំឡេងទោះគេមិនទាន់យល់អ្វីដែលនិយាយក៏ដោយ។
បម្រែបម្រួលរាងកាយ
១- រាងកាយយើងប្រែប្រួលអីខ្លះ?
ក្នុងសប្តាហ៍ទី ១៦ នេះ យើងអាចនឹងមានអារម្មណ៍ថាពោះអ្នកចេះតែកូរ ពិសេសស្រីៗយើងដែលពរពោះលើកដំបូងអាចច្រឡំគ្នាថាជាការកូរពោះ ឬដើរខ្យល់ តែការពិតនោះវាជាការធាក់របស់កូនទៅវិញទេ។ ពោះកាន់តែធំជាងមុនអាចធ្វើឲ្យយើងពិបាកស្លៀកពាក់ ដូច្នេះគួររើសយកខោអាវដែលរលុងៗ ពាក់ទៅស្រួលខ្លួន និងមិនរមាស់។
យើងគួរបារម្ភពីអី?
ចាប់អាម្មណ៍ទេ ដង្ហើមយើងអាចនឹងញាប់ជាងមុន តែកុំភ័យអី! ជារឿងធម្មតាទេ ការដកដង្ហើមញាប់ជាងមុនកើតមានលើស្រ្តីមានផ្ទៃពោះជាច្រើន វាច្រើនកើតមាននៅក្នុងត្រីមាសទី ២ នៃគភ៌។ មូលហេតុបណ្តាលមកពីពពួកអ័រម៉ូនពេលមានផ្ទៃពោះនេះឯង។ ពួកអ័រម៉ូនទាំងនេះទៅភ្ញោចខួរក្បាលឲ្យយើងដកដង្ហើមយកអុកស៊ីសែនឲ្យច្រើនជាងមុនដើម្បីឲ្យកូន។ មូលហេតុមួយទៀតដោយសារអាអូនអាចនឹងលូតលាស់ធំជាងមុន ហើយរុញសង្កត់លើសាច់ដុំសន្ទះទ្រូងដែលខណ្ឌចែកប្រអប់ទ្រូង និងពោះ។ ត្រូវចាំថា ពេលគភ៌កាន់តែធំ ការដកដង្ហើមកាន់តែពិបាកជាងមុន។
ការជួបជាមួយគ្រូពេទ្យ
២- គួរប្រាប់អីខ្លះទៅពេទ្យ?
មានសង្កេតទេថា យើងញ៉ាំរបស់ផ្អែមច្រើន ហើយភ័យខ្លាចកើនជាតិស្ករក្នុងទឹកនោមច្រើនជាងធម្មតា។ យើងគួរប្រាប់បញ្ហានេះឲ្យពេទ្យដឹង ពិសេសបើសិនជាយើងមានប្រវត្តិគ្រួសារកើតជំងឺទឹកនោមផ្អែម។
ខ្លួនប្រាណយើងត្រូវការជាតិស្ករដើម្បីបម្លែងទៅជាថាមពល ហើយអ័រម៉ូនអាំងស៊ុយលីនជាអ្នកសម្រប តម្រូវនិងទាញយកចូលទៅក្នុងកោសិកាដើម្បីប្រើប្រាស់។ អំឡុងពេលមានផ្ទៃពោះ មានអ័រម៉ូនប្រឆាំងនឹងអាំងស៊ុយលីនដើម្បីទាញយកជាតិស្ករទៅឲ្យទារកក្នុងពោះដែរ។ ដូចនេះពេលខ្លះយើងឃើញមានជាតិស្ករនៅក្នុងទឹកនោម។ តែកុំបារម្ភអី វាមានបណ្តោះអាសន្នប៉ុណ្ណោះ ការធ្វើតេស្តលើកក្រោយអាចនឹងធម្មតាវិញហើយ។
ត្រូវដឹងពីតេស្តអីខ្លះ?
ក្នុងអំឡុងពេលនេះ មានការធ្វើតេស្តជាប្រចាំមួយចំនួនត្រូវតាមដានដើម្បីឲ្យប្រាកដថាយើងមានទម្ងន់សមសម្រប និងមានសុខភាពល្អ៖
– ថ្លឺងទម្ងន់
– វាស់កម្ពស់ស្បូន
– វាស់សម្ពាធឈាម
– វាស់ចង្វាក់បេះដូងទារក
– វាស់ទំហំស្បូនពីខាងក្រៅ
– តេស្តរកមើលហើមដៃជើង
– តេស្តទឹកនោម (តេស្តជាតិស្ករ និងប្រូតេអ៊ីន)។
សុខភាព និងសុវត្ថិភាព
៣- ត្រូវដឹងអីខ្លះ?
ទាំងនេះជាកង្វល់ពីសុខភាព និងសុវត្ថិភាពរបស់យើង និងកូន៖
ការហែលទឹក៖ វិធីដ៏ល្អដើម្បីឲ្យរាងកាយនៅសកម្ម និងធ្វើចលនាសាច់ដុំអាងត្រគាក វាមានសុវត្ថិភាពល្អណាស់ មិនប៉ះពាល់ដល់អាអូនទេលើកលែងតែគ្រូពេទ្យហាមឃាត់។ យើងអាចចាប់ផ្តើមដោយការហែលយ៊ឺតៗ ហើយបង្កើនកម្រិតពេលខ្លួនយើងអាចទៅរួច។ យ៉ាងណាក៏ដោយ យើងគួរប្រុងប្រយ័ត្នពេលទៅហែលក្នុងអាងហែលទឹករួម ដែលមានមនុស្សច្រើនពីកន្លែងផ្សេងៗគ្នា ព្រោះប្រព័ន្ធការពារយើងខ្សោយជាងមុនធ្វើឲ្យងាយឆ្លងរោគ។
ជំងឺអុតស្វាយ៖ គ្រោះថ្នាក់បំផុត! មិនត្រូវនៅក្បែរអ្នកមានជំងឺនេះទេ ប្រព័ន្ធការពារយើងមិនខ្លាំងដូចកាលពីមុននោះទេ មិនអាចប្រឆាំងនឹងមេរោគជំងឺអុតស្វាយបានឡើយ។ ជំងឺអុតស្វាយបង្កឡើងដោយវីរុសដែលអាចប៉ះពាល់ដល់ការលូតលាស់របស់បេប៊ី ដូចជាបញ្ហាពីកំណើតមួយចំនួន មានដូចជា ក្បាលតូចជាងធម្មតា ដៃជើងមិនគ្រប់។ គួរលាងសម្អាតដៃឲ្យបានញឹកញាប់ និងទៀងទាត់។
យើងនឹងជួបគ្នាបន្ថែមពីការវិវត្តគភ៌ក្នុងសប្តាហ៍ទី ១៧ ទៀត។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
Poppy seed to pumpkin: How big is your baby? http://www.babycenter.com/slideshow-baby-size. Accessed June 2, 2016.
Pregnancy calendar week 16. http://kidshealth.org/parent/pregnancy_center/pregnancy_calendar/week16.html. Accessed June 2, 2016.
16 weeks pregnant. http://www.whattoexpect.com/pregnancy/week-by-week/week-16.aspx. Accessed June 2, 2016.
Your pregnancy: 16 weeks. http://www.babycenter.com/6_your-pregnancy-16-weeks_1106.bc . Accessed June 2, 2016.
Shortness of breath during pregnancy. http://www.whattoexpect.com/pregnancy/symptoms-and-solutions/short-breath.aspx. Accessed June 2, 2016.
កំណែប្រែបច្ចុប្បន្ន
25/02/2019
អត្ថបទដោយ Chamnan Amrith
ត្រួតពិនិត្យដោយ វេជ្ជ. ចាន់ ស៊ីណេត
បច្ចុប្បន្នភាពដោយ៖ Ficheroulle Anne-Charlotte
ត្រួតពិនិត្យដោយ
វេជ្ជ. ចាន់ ស៊ីណេត
ឯកទេសសម្ភព និងរោគស្ត្រី · មន្ទីរពេទ្យបង្អែកមិត្តភាពកម្ពុជា-ចិន សែនសុខ
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម