អ្នកមានជំងឺរលាកសន្លាក់ឆ្អឹង ទាំងនេះជាអាហារគួរញ៉ាំ និងគួរចៀសវាង

ជំងឺរលាកសន្លាក់ឆ្អឹងភាគច្រើនកើតនៅជង្គង់ ដៃ ត្រគាក ឬឆ្អឹងខ្នង ហើយមនុស្សមួយចំនួនជឿថាការផ្លាស់ប្ដូររបបអាហារអាចជួយសម្រាលដល់រោគសញ្ញាជំងឺរលាកសន្លាក់ឆ្អឹងរួមមានការឈឺចាប់ គាំងសន្លាក់ និងហើមបាន។ អត្ថបទនេះនឹងបង្ហាញពីអាហារគួរញ៉ាំ និងអាហារគួរចៀសវាងចំពោះគ្នាយើងដែលមានជំងឺនេះ។

អាហារគួរញ៉ាំ

អាហារមួយចំនួនគឺអាចជួយឲ្យឆ្អឹង សាច់ដុំ និងសន្លាក់ឆ្អឹងមានភាពរឹងមាំ និងជួយរាងកាយយើងប្រឆាំងនឹងការរលាក និងជំងឺផ្សេងៗ។ សម្រាប់គ្នាយើងដែលមានជំងឺរលាកសន្លាក់ឆ្អឹងគួរបន្ថែមអាហារប៉ុន្មានប្រភេទនេះដើម្បីជួយបន្ថយរោគសញ្ញា។

១. សាច់ត្រី

យើងគួរញ៉ាំត្រីដែលមានអាស៊ីតខ្លាញ់អូមេហ្គា៣ច្រើន ព្រោះខ្លាញ់នេះអាចប្រឆាំងនឹងការរលាកបាន និងមានប្រយោជន៍ដល់អ្នកមានជំងឺរលាកសន្លាក់ឆ្អឹង។ យកល្អគួរញ៉ាំសាច់ត្រីឲ្យបានយ៉ាងតិចម្ដងក្នុងមួយសប្ដាហ៍។ ប្រភេទត្រីនេះមានដូចជាត្រីសាឌីន ត្រីសាបាក (Mackerel) ត្រីសាល់ម៉ុន និងត្រីធូណា។ ក្រៅពីត្រី អាហារដែលមានអាស៊ីតខ្លាញ់អូមេហ្គា៣រួមមានគ្រាប់ជីរ និងគ្រាប់ walnut ជាដើម។

២. ប្រេង

ប្រេងមួយចំនួនអាចកាត់បន្ថយការរលាកបានដូចជាប្រភេទប្រេងអូលីវដែលមានផ្ទុកសារធាតុ oleocanthal ច្រើន។ ក្រៅពីប្រេងអូលីវ ផ្លែបឺរ និងប្រេង safflower ក៏ជាជម្រើសល្អ និងអាចបញ្ចុះកូលេស្តេរ៉ូលដែរ។

៣. ផលិតផលធ្វើពីទឹកដោះគោ

ទឹកដោះគោ យ៉ាអួ និងឈីសសំបូរទៅដោយកាល់ស្យូម និងវីតាមីន D។ សារធាតុចិញ្ចឹមទាំងពីរនេះជួយឲ្យឆ្អឹងរឹងមាំដែលអាចបន្ថយការឈឺចាប់បាន។ ផលិតផលធ្វើពីទឹកដោះគោក៏មានប្រូតេអ៊ីនដែលអាចជួយបង្កើនសាច់ដុំដែរ។ យើងអាចជ្រើសរើសយកទឹកដោះគោមានខ្លាញ់តិចប្រសិនជាយើងកំពុងសម្រកទម្ងន់។

៤. បន្លែស្លឹកបៃតង

បន្លែស្លឹកបៃតងគឺមានវីតាមីន D សារធាតុប្រឆាំងអុកស៊ីតកម្ម និងសារធាតុប្រឆាំងនឹងស្ត្រេស។ វីតាមីន D សំខាន់សម្រាប់រាងកាយក្នុងការស្រូបយកកាល់ស្យូម និងជួយពង្រឹងប្រព័ន្ធភាពស៊ាំក្នុងការប្រឆាំងនឹងជំងឺផ្សេងៗ។ បន្លែស្លឹកបៃតងមានស្ពៃពួយឡេងជាដើម។

color: #000000;”>៥. ផ្កាខាត់ណាខៀវ

ផ្កាខាត់ណាខៀវមានសារធាតុ sulforaphane ដែលអ្នកវិទ្យាសាស្ត្រជឿថាអាចពន្យឺតការវិវត្តនៃជំងឺរលាកសន្លាក់ឆ្អឹង។ បន្លែនេះក៏សំបូរដោយវីតាមីន K វីតាមីន Cនិងកាល់ស្យូម។

៦. តែបៃតង

អ្នកជំនាញជឿថាសារធាតុប្រឆាំងអុកស៊ីតកម្ម polyphenol អាចបន្ថយការរលាក និងកម្រិតការខូចខាតនៃឆ្អឹងខ្ចី។ តែបៃតងមានផ្ទុកសារធាតុនេះក្នុងកម្រិតច្រើន។

៧. ខ្ទឹមស

អ្នកវិទ្យាសាស្ត្រជឿថាសារធាតុ diallyl disulfide ដែលមានក្នុងខ្ទឹមសអាចប្រឆាំងនឹងអង់ស៊ីមក្នុងរាងកាយដែលបង្កការខូចខាតដល់ឆ្អឹងខ្ចីបាន។

៨. គ្រាប់ធញ្ញជាតិ

គ្រាប់ធញ្ញជាតិល្អសម្រាប់បេះដូង និងមានផ្ទុកជាតិកាល់ស្យូម ម៉ាញ៉េស្យូម ស័ង្កសី វីតាមីន E និងជាតិសរសៃច្រើន។ ក្រៅពីនេះនៅមានអាស៊ីត alpha-linolenic (ALA) ដែលពង្រឹងប្រព័ន្ធភាពស៊ាំផងដែរ។

អាហារគួរចៀសវាង

នៅពេលយើងមានជំងឺរលាកសន្លាក់ឆ្អឹង រាងកាយរបស់យើងគឺស្ថិតក្នុងស្ថានភាពដែលមានការរលាក។ ដូចយើងដឹងហើយថាអាហារមួយចំនួនមានសារធាតុប្រឆាំងការរលាកដែលអាចកាត់បន្ថយរោគសញ្ញាបាន តែក៏មានអាហារមួយចំនួនទៀតគឺមានផ្ទុកសារធាតុដែលអាចបង្កការរលាកបាន។ ដូចនេះយកល្អគួរចៀសវាងអាហារទាំងនេះ។

១. ស្ករ

ប្រភេទស្ករកែច្នៃអាចជំរុញឲ្យមានការបញ្ចេញ cytokine ដែលអាចបង្កការរលាកក្នុងរាងកាយបាន។ ស្ករដែលបន្ថែមទៅក្នុងភេសជ្ជៈមានជាតិផ្អែមដូចជាសូដា តែផ្អែម កាហ្វេដែលបន្ថែមរសជាតិ និងទឹកផ្លែឈើមួយចំនួនអាចធ្វើឲ្យស្ថានភាពរលាកកាន់តែអាក្រក់។

២. ខ្លាញ់ឆ្អែត

អាហារដែលមានខ្លាញ់ឆ្អែតខ្ពស់ដូចជាភីហ្សា និងសាច់ក្រហមអាចបង្កការរលាកនៅក្នុងជាលិកាខ្លាញ់ ហើយក៏មានចំណែកទៅលើហានិភ័យជំងឺធាត់ ជំងឺបេះដូង និងលក្ខខណ្ឌផ្សេងៗដែលធ្វើឲ្យការរលាកសន្លាក់កាន់តែធ្ងន់ធ្ងរ។

៣. កាបូអ៊ីដ្រាតកែច្នៃ

កាបូអ៊ីដ្រាតកែច្នៃមានដូចជានំប៉័ងចំណិត បាយស និងដំឡូងបារាំងបំពងសុទ្ធតែជំរុញការផលិតអុកស៊ីតកម្មនៃ AGE (advanced glycation end) ដែលអាចជំរុញឲ្យមានការរលាកក្នុងរាងកាយបាន។

អត្ថបទពាក់ព័ន្ធ៖

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

ត្រួតពិនិត្យដោយ

Editor HK

អត្ថបទដោយ ថាត់ រ័ត្នមូនីតា · កែ 20/05/2020

អ្នកមានជំងឺរលាកសន្លាក់ឆ្អឹង ទាំងនេះជាអាហារគួរញ៉ាំ និងគួរ​ចៀសវាង

អាហារ​គួរ​ញ៉ាំ

អាហារ​គួរ​ចៀសវាង

អ្នកមានជំងឺរលាកសន្លាក់ឆ្អឹង ទាំងនេះជាអាហារគួរញ៉ាំ និងគួរចៀសវាង

អាហារគួរញ៉ាំ

អាហារគួរចៀសវាង