ក្មេងតូចៗ វ័យជាមធ្យមចាប់ពីអាយុ៤ ទៅ៥ឆ្នាំឡើងទៅ មានរូបរាងធាត់ខ្លាំង ប៉ាម៉ាក់ មិនគួរប្រហែសទេ ព្រោះថាពួកគេអាចមានបញ្ហាសុខភាពដូចជា ជាតិកូឡេស្តេរ៉ូល និងសម្ពាធឈាមឡើងខ្ពស់ បញ្ហាពិបាកដកដង្ហើម និងឈឺសន្លាក់ឆ្អឹង។
បញ្ហាខាងលើនេះ បានលើកឡើងដោយ លោកវេជ្ជបណ្ឌិតអាមេរិក ឯកទេសផ្នែកជំងឺកុមារ Richard Seidman ដោយផ្អែកលើទិន្នន័យស្រាវជ្រាវថ្មីៗនេះ។ លោកវេជ្ជបណ្ឌិតបានលើកឡើងបន្ថែមថា ទម្លាប់រស់នៅជាកត្តាមួយសំខាន់បង្កបញ្ហានេះឡើង ដូចជា ប៉ាម៉ាក់ពុំសូវនាំកូនៗឱ្យបញ្ចេញសកម្មភាពរាងកាយជាមួយសកម្មភាពខាងក្រៅផ្ទះ ទម្លាប់ឱ្យពួកគេនៅជាមួយគ្រឿងអេឡិចត្រូនិក (SmartPhone ឬTablet ទូរទស្សន៍…) យូរម៉ោង និងផ្តោតឱ្យកូនក្មេងរីករាយតែនឹងរឿងញ៉ាំចំណីអាហារតែមួយមុខ។ល។
យ៉ាងណាមិញ វេជ្ជបណ្ឌិតជំនាញបាននិយាយថា ការកែទម្លាប់ប្រចាំថ្ងៃមួយចំនួន ដែលឪពុកម្តាយអាចនាំឱ្យក្មេងៗចៀសឆ្ងាយពីបញ្ហាដោយសាររោគធាត់ខាងលើនេះបាន ដូចជា៖
- តាមដាន នូវអ្វីៗដែលកូនៗញ៉ាំជាប្រចាំថ្ងៃ ពិសេសអាហារទាំងបីពេល គួរមានជីវជាតិគ្រប់គ្រាន់សម្រាប់ពួកគេ ហើយពិសេសអាហារជាតិស្ករ និងភេសជ្ជៈផ្អែមៗ គួរកម្រិតមិនឱ្យពួកគេទម្លាប់ញ៉ាំ។
- ជម្រុញឱ្យក្មេងៗ ចេះញ៉ាំ បន្លែ ផ្លែឈើ និងអាហារមានប្រយោជន៍សម្រាប់សុខភាព។
- កម្រិតប្រភេទអាហារ Fast Food សម្រាប់គ្រួសារ មិនគួរញ៉ាំញឹកញាប់ ក្នុង១សប្តាហ៍។
- កាត់បន្ថយម៉ោង មើលអេក្រង់ឧបករណ៍អេឡិចត្រូនិច ទៅចំណាយពេលលើសកម្មភាពខាងក្រៅផ្ទះ ដូចជាការចេញដើរហាត់ប្រាណ ឬការលេងកីឡា តម្រូវឱ្យបញ្ចេញសកម្មភាពរាងកាយឱ្យបានយ៉ាងតិច មួយម៉ោងក្នុង១ថ្ងៃ។
អត្ថបទពាក់ព័ន្ធ៖
- ក្មេងតូចលើសជាតិកូលេស្តេរ៉ូលដូចមនុស្សធំអត់? ត្រូវការពារម៉េចខ្លះ?
- កូនធាត់ ឬអត់ អាចមើលដឹងនៅពេលគេអាយុប៉ុណ្ណេះ
គួររំលឹកដែរ បញ្ហាកូនក្មេងលើសគីឡូ ឬជំងឺធាត់ កំពុងបង្កជាបញ្ហាជាច្រើននៅតាមបណ្តាប្រទេសមួយចំនួន តួយ៉ាងនៅសហរដ្ឋអាមេរិក កុមារអាយុពី៤ទៅ៥ឆ្នាំ មាន១០% កើតបញ្ហានេះ ដែលជាចំនួនកើនឡើងខ្លាំងក្នុងរយៈពេលប៉ុន្មានឆ្នាំចុងក្រោយនេះ នេះដោយផ្អែកតាមរបាយការណ៍ នៃនាយកដ្ឋានសុខភាពរដ្ឋញ៉ូវយក សហរដ្ឋអាមេរិក៕
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ។
[embed-health-tool-bmi]
