មនុស្សច្រើនជាង១០ភាគរយ នៃមនុស្សពេញវ័យនៅទូទាំងពិភពលោកបានរងគ្រោះដោយសារបញ្ហាក្អករយៈពេលវែង ដោយមិនដឹងពីមូលហេតុ។ ថ្មីៗនេះអ្នកស្រាវជ្រាវនៅសាកលវិទ្យាល័យ Manchester ប្រទេសអង់គ្លេសបានធ្វើតេស្តព្យាបាលអ្នកមានជំងឺក្អកចំនួន២៥៣នាក់ មានអាយុគិតជាមធ្យម១៤,៥ឆ្នាំ មកពីអង់គ្លេស និងសហរដ្ឋអាមេរិក។
ការសិក្សានេះ គឺធ្វើឡើងដោយចែកអ្នកជំងឺជាពីរក្រុម ដោយមួយក្រុមប្រើប្រាស់ថ្នាំ Placebo (ថ្នាំដែលគេយកមកសិក្សាធ្វើតេស្តលើមនុស្សដែលគ្មានសកម្មភាពព្យាបាល) និងមួយក្រុមទៀតប្រើប្រាស់ថ្នាំថ្មីនេះដែលមានឈ្មោះថា Gefapixant (MK – 7264) រយៈពេល ១២ សប្ដាហ៍ ក្នុងកម្រិត ៧,៥ មិល្លីក្រាម ២០ មិល្លីក្រាម និង ៥០ មិល្លីក្រាម។
អត្ថបទពាក់ព័ន្ធ៖
- មកដឹងហឺតមួយប្រភេទទៀត ហៅថាក្អកហឺត
- វិធីការពារកូនតូចៗពីជំងឺរលាកទងសួត និងរលាកបំពង់ក
លទ្ធផលបង្ហាញឲ្យឃើញថា ថ្នាំ Gefapixant (MK – 7264) ពិតជាអាចជួយកាត់បន្ថយរោគសញ្ញាក្អកពិតមែន។ នៅមុនពេលសិក្សា អ្នកជំងឺទាំងនោះក្អក ពី ២៤ ទៅ ២៩ ដងក្នុងមួយម៉ោង ប៉ុន្តែក្រោយពេលប្រើថ្នាំនេះ អ្នកជំងឺទាំងនោះបានកាត់បន្ថយការក្អកមកត្រឹម ១១ដងក្នុងមួយម៉ោងប៉ុណ្ណោះ។
យោងតាមសាស្ត្រាចារ្យ Jacky Smith អ្នកដឹកនាំគម្រោងនេះ បាននិយាយថា ការសិក្សាគឺសំដៅទៅលើអ្នកជំងឺដែលរងផលប៉ះពាល់ដោយបញ្ហាក្អក ហើយគ្រូពេទ្យនៅពេលបច្ចុប្បន្នមិនអាចជួយបាន។ ការសិក្សាដំបូងនេះ បានបង្ហាញថា ការព្យាបាលដោយថ្នាំGefapixant (MK – 7264) គឺមានសុវត្ថិភាព និងមានប្រសិទ្ធភាព ក្នុងការប្រើប្រាស់រយៈពេលវែង។
អត្ថបទពាក់ព័ន្ធ៖
- ផ្ដាសាយ និងគ្រុនក្ដៅ មានលក្ខណៈសម្គាល់ខុសគ្នាម្ដេចខ្លះ?
- លក្ខណៈសម្គាល់ខុសគ្នា រវាងគ្រុនឈាម និងរលាកបំពង់ក
ប៉ុន្តែបើយោងតាមលោកស្រីវេជ្ជបណ្ឌិត Gabrielle Macaulay ដែលធ្លាប់ព្យបាលអ្នកជំងឺក្អក ជាច្រើននាក់មកហើយនោះ បាននិយាយថា ជាការពិតដែលថ្នាំនេះ អាចជួយដល់អ្នករងផលប៉ះពាល់ដោយរោគសញ្ញាក្អក ក៏ប៉ុន្តែលោកស្រីក៏បានព្រមានដែរថាថ្នាំនេះអាចនឹងបង្កគ្រោះថ្នាក់ ប្រសិនបើវាត្រូវបានឲ្យអ្នកជំងឺប្រើ ជំនួសឲ្យថ្នាំដែលសមស្របនឹងស្ថានភាពជំងឺផ្សេងៗដែលបង្កឲ្យកើតជាអាការៈក្អក។
ជាធម្មតាប្រសិនបើនរណាម្នាក់ក្អកយូរជាង ៣សប្ដាហ៍ គួរតែទៅជួបពេទ្យដើម្បីពិនិត្យមើល នេះបើតាមការលើកឡើងរបស់អ្នកជំនាញ។ គួរបញ្ជាក់ដែរថា អាការៈក្អកអាចជារោគសញ្ញាបង្ហាញពីបញ្ហាសុខភាពជាច្រើនយ៉ាង រួមទាំង ជំងឺស្ទះសួតរ៉ាំរ៉ៃ (Chronic obstructive Pulmonary disease) ឬ ក៏អាចជាជំងឺមហារីកទៀតផង។ បើតាមការស្រាវជ្រាវនៅចក្រភពអង់គ្លេស ជំងឺមហារីកសួត បានឆក់យកជីវិតមនុស្ស ៣៥ ៣០០ នាក់ជារៀងរាល់ឆ្នាំ ក៏ព្រោះតែការធ្វើរោគវិនិច្ឆ័យរកឃើញយឺតពេល។
អត្ថបទគួរអាន៖
- ៨ ចំណុច កាត់បន្ថយការកើតជំងឺមហារីកដ៏កាចសាហាវ
- វិធីការពារកូនតូចៗពីជំងឺរលាកទងសួត និងរលាកបំពង់ក
- ម៉ាក់ប៉ាត្រូវដឹងរឿងទាំងនេះ បើកូនមានជំងឺរលាកទងសួត
- ហេតុអីក្មេងៗឧស្សាហ៍រលាកបំពង់ក?
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-bmi]
