ការឡើងទម្ងន់ខ្លាំង បណ្ដាលមកពីកត្តាជាច្រើន ប៉ុន្ដែកត្តារួមមួយ ដែលស្រីៗភាគច្រើន ធ្លាប់ជួបនោះ គឺស្ត្រេស ហើយវាក៏ជាចម្ងល់មួយដែរ ព្រោះពេលកំពុងស្ត្រេស ពិបាកចិត្ត ហេតុអ្វីបានទៅជាឡើងទម្ងន់ជាងមុនដូច្នេះ?
វេជ្ជបណ្ឌិត Fatima Cody Stanford មកពីសាលាវេជ្ជសាស្ត្រ Harvard របស់អាមេរិក បញ្ជាក់ថា “ស្ត្រេស ជំរុញការកើនឡើងអ័រម៉ូនស្ត្រេស (Cortisol) នៅក្នុងឈាម“។ អ័រម៉ូន Cortisol ផលិតឡើងដោយក្រពេញ Andrenal ដែលជំរុញមេតាប៉ូលិសរបស់យើង។ វាក៏ជួយរក្សាកម្រិតជាតិស្ករក្នុងឈាម និងការចងចាំផងដែរ។ នៅពេលកម្រិតអ័រម៉ូន Cortisol កើនឡើងខ្លាំង វាបង្កឲ្យមានការរលាក និងជំរុញឲ្យរាងកាយយើង រក្សាទុកជាតិខ្លាញ់យ៉ាងច្រើន នៅជុំវិញពោះ។ ស្ត្រេស ធ្វើឲ្យយើងគេងមិនលក់ផងដែរ ហើយវាជំរុញឲ្យយើងញ៉ាំអាហារពេលយប់ ដែលនេះខុសទម្លាប់ប្រក្រតីរបស់រាងកាយ។
កំពុងមានអារម្មណ៍ស្ត្រេស?
និយាយរឿងស្ត្រេស មនុស្សភាគច្រើន សុទ្ធតែធ្លាប់ជួយបអារម្មណ៍ស្រដៀងគ្នាមួយនេះ ប៉ុន្ដែស្រីៗ ទំនងមានអារម្មណ៍ស្ត្រេសខ្លាំងជាងប្រុស។ តាមការស្ទង់មតិមួយ នៅឆ្នាំ២០១៤ ដោយសមាគមចិត្តសាស្ត្រអាមេរិក រកឃើញថា ស្រីៗ មានកម្រិតស្ត្រេសជាមធ្យម ៥,២/១០ពិន្ទុ ចំណែកប្រុសៗ មានត្រឹមតែ ៤,៥ប៉ុណ្ណោះ។ ជាងនេះទៅទៀត ស្រីៗ និយាយថា កម្រិតស្ត្រេសរបស់ពួកគេ កំពុងកើនឡើង មានរហូតដល់ ៣២% ខណៈប្រុសៗ មានត្រឹម ២៥%។
ការគ្រប់គ្រងស្ត្រេស អាចជួយរក្សាធម្ងន់បាន
ស្ត្រេស ជាផ្នែកមួយ នៅក្នុងជីវិតរបស់យើង ដែលមិនអាចចៀសរួចនោះទេ ប៉ុន្ដែបើយើងមានវិធីគ្រប់គ្រងវាបានល្អ វាអាចជួយយើងមិនឲ្យឡើងទម្ងន់ ជាពិសេសខ្លាញ់ត្រង់ក្បាលពោះ។ ខាងក្រោមនេះ ជាវិធី ៥យ៉ាង ដែលគ្នាយើង អាចយកទៅអនុវត្តបាន៖
១. កម្ចាត់អារម្មណ៍តានតឹង
ការហាត់ប្រាណ ជារឿងសំខាន់មួយ ជួយគ្រប់គ្រងបញ្ហាស្ត្រេស ព្រោះការបង្កើនសកម្មភាពរាងកាយ ជួយកាត់បន្ថយអ័រម៉ូនស្ត្រេស (Cortisol)។
២. កំណត់ការគេងឲ្យគ្រប់គ្រាន់
គេងមិនគ្រប់គ្រាន់ អាចបង្កើនបរិមាណអ័រម៉ូនស្ត្រេស នៅក្នុងរាងកាយរបស់យើង ដូច្នេះត្រូវធានាថា យើងគេងបានគ្រប់គ្រាន់ ដើម្បីគ្រប់គ្រងស្ត្រេសប្រកបដោយប្រសិទ្ធភាព។ ចៀសវាងការសម្លឹងអេក្រង់ទូរសព្ទ ឬទូរទស្សន៍ ១ម៉ោង មុនចូលគេង ព្រោះពន្លឺទូរសព្ទ អាចប៉ះពាល់ការគេង។
៣. កែប្រែការគិតមួយចំនួន
បរិមាណស្ត្រេស ដែលមានក្នុងអារម្មណ៍របស់យើង វាអាស្រ័យលើស្ថានភាព និងការគិតរបស់យើងទៅលើស្ថានភាពនោះ។ ប៉ុន្ដែ មនុស្សមានសមត្ថភាពក្នុងគ្រប់គ្រងស្ត្រេស ផ្អែកលើបុគ្គលិកលក្ខណៈ និងបទពិសោធន៍ជីវិត។ ដូច្នេះ ការកែប្រែរបៀបដែលយើងគិតអំពីបញ្ហាប្រឈមនានា អាចជួយកាត់បន្ថយស្ត្រេសបាន។
៤. រៀបចំផែនការគាំទ្រ
ប្រសិនបើយើងស្ថិតក្នុងស្ថានភាពមានបញ្ហាស្ត្រេសខ្លាំង យើងចាំបាច់ត្រូវរៀបចំផែនការគាំទ្រ។ ឧទាហរណ៍ ប្រសិនបើយើងជួបបញ្ហាស្ត្រេសខ្លាំង ឬប្រឈមថ្ងៃផុតកំណត់ការងារ ស្វែងរកការគាំទ្រ ឬជំនួយបន្ថែម ដើម្បីជួយកុំឲ្យស្ត្រេសខ្លាំង។
៥. ជជែកជាមួយពេទ្យ
ប្រសិនយើងមានបញ្ហា មិនអាចគ្រប់គ្រងស្ត្រេស ឬអារម្មណ៍ឃ្លានញ៉ាំបានទេ យើងគួរជួបពិគ្រោះយោបល់ជាមួយពេទ្យ។ ការធ្វើសមាធិ ក៏អាចជួយយើងបានមួយចំនួនដែរ ប៉ុន្ដែវិធីនេះ ត្រូវការរយៈពេលវែង។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
