មធ្យោបាយពន្យារកំណើតសម័យទំនើបមានច្រើនប្រភេទណាស់ ដែលអាចពន្យារកំណើតបានរយៈពេលខ្លី វែង ឬអស់មួយជីវិត។
ការចងបំពង់មេជីវិតឈ្មោល និងការចងដៃស្បូន ជាវិធីបញ្ឈប់កំណើតអស់មួយជីវិត តម្រូវឲ្យទាំងបុរសទាំងស្រ្តីដែលជ្រើសរើសវិធីទាំង២នេះ ពិចារណាឲ្យបានល្អិតល្អន់ មុនសម្រេចថា ចងបំពង់មេជីវិត។ នេះបើតាមការបញ្ជាក់របស់លោកវេជ្ជបណ្ឌិត ចាន់ ស៊ីណេត ឯកទេសជំងឺទូទៅ។
“ការចងបំពង់មេជីវិតឈ្មោល និងចងដៃស្បូន មិនអាចចងហើយដកវិញបានទេ ឬក៏ចងហើយដកវិញ អាចមានកូនដូចវិធីពន្យារកំណើតផ្សេងទៀតបានទេ ឲ្យតែសម្រេចថាចងហើយ គឺបញ្ឈប់កំណើតពេញមួយជីវិតតែម្តង’។ លោកវេជ្ជបណ្ឌិត រៀបរាប់។
ដោយហេតុថា ការចងដៃស្បូន និងការចងបំពង់មេជីវិតឈ្មោល ជាវិធីបញ្ឈប់កំណើតអស់ជីវិត ទើបគ្រូពេទ្យណែនាំចំពោះតែប្តីប្រពន្ធ ដែលមានលក្ខខណ្ឌខាងក្រោមនេះប៉ុណ្ណោះ។
– អាយុច្រើន និងមានកូនច្រើន
– មានជំងឺនៅតំបន់ដៃស្បូន ឬពងស្វាស
– ស្ទះ ឬត្បៀត ដៃស្បូន ឬបំពង់មេជីវិត
– ធ្លាប់សម្រាលដោយវះកាត់ ២ ឬ៣ដងរួចមកហើយ
– មានគ្រួសារមួយពេញលេញ សម្រេចចិត្តឈប់យកកូនបន្តទៀត។
អត្ថបទពាក់ព័ន្ធ៖ ពិតអត់ ប្រើថ្នាំពន្យារកំណើត អាចឲ្យស្រីៗធ្វើទុក្ខ ស្គមរីងរៃ ឬធាត់ជ្រុល?
លោកវេជ្ជបណ្ឌិត ចាន់ ស៊ីណេត បានបន្ថែមទៀតថា វិធីពន្យារកំណើតការចងបំពង់មេជីវិតឈ្មោល និងការចងដៃស្បូនមិនលើកទឹកចិត្តឲ្យបុរស និងស្រីដែលមានអាយុតិច ជ្រើសរើសឡើយ តែបើអ្នកទាំងពីរចង់ពន្យារកំណើត គួរតែជ្រើសរើសវិធីពន្យារកំណើតផ្សេងទៀត មានដូចជា ប្រើស្រោមអនាម័យ លេបថ្នាំពន្យារកំណើត ចាក់ថ្នាំពន្យារកំណើត ដាក់កងក្រោមស្បែក ឬដាក់កងក្នុងស្បូនវិញ ទើបជាជម្រើសល្អ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-ovulation]
