ដឹងអត់! ពេលឈប់រួមភេទរាងកាយយើងនឹងជួយបញ្ហា ៥ យ៉ាងនេះ

មនុស្សយើងជាច្រើនបាត់បង់ចំណង់ផ្លូវភេទដោយសារមូលហេតុផ្សេងៗគ្នា។ ការបែកបាក់គ្នា បញ្ហាសុខភាព ឬភាពតានតឹងក្នុងជីវិត និងការងារជាដើម សុទ្ធតែអាចធ្វើឲ្យយើងលែងមានអារម្មណ៍ចង់រួមភេទ។ នៅពេលយើងមានការនឿយហត់ពីការងារ ឬនៅពេលយើងមានអារម្មណ៍ប្រែប្រួល នោះចំណង់ផ្លូវភេទនឹងអាចធ្លាក់ចុះបាន។ ការដែលមិនរួមភេទគឺអាចធ្វើឲ្យជីវិតយើងបាត់បង់នូវផលប្រយោជន៍ជាច្រើន។ ខាងក្រោមនេះជាការជះឥទ្ធិពលដល់សុខភាពផ្លូវកាយ និងផ្លូវចិត្តលើអ្នកដែលមិនមានការរួមភេទ។ ផលប៉ះពាល់ដល់សុខភាពទាំងនោះគឺគ្រប់គ្រាន់ក្នុងការលើកទឹកចិត្តយើងឲ្យមានចំណង់ក្នុងការរួមភេទសារជាថ្មី។

១- អ័រម៉ូនអង់ដូភីនធ្លាក់ចុះ

អារម្មណ៍ស្រើបស្រាល និងការឈានដល់ចំណុចកំពូលនៃការរួមភេទ គឺកើតឡើងដោយសារមានការបញ្ចេញអ័រម៉ូនអង់ដូភីន (endorphins) ដែលជាអ័រម៉ូនមួយមានតួនាទីធ្វើឲ្យយើងមានអារម្មណ៍ល្អ។ អង់ដូភីន ត្រូវបានគេស្គាល់ថាជាអ័រម៉ូនមានប្រសិទ្ធភាពក្នុងការបំបាត់ការឈឺចាប់ ក៏ដូចជាបង្កើនអារម្មណ៍ល្អ។ ពេលយើងឈប់រួមភេទ គឺប្រៀបបាននឹងឈប់ហាត់បា្រណអញ្ចឹង។ ពេលយើងឈប់រួមភេទ នោះអ័រម៉ូនមួយនេះនឹងមិនចេញមកច្រើនដូចមុនទៀតនោះទេ។ ប្រសិនបើយើងចង់បានអ័រម៉ូននេះមកវិញ នោះយើងគួរតែចាប់ផ្ដើមរឿងលើគ្រែឡើងវិញ។

អត្ថបទពាក់ព័ន្ធ៖

៥ យ៉ាងនេះ ចៀសបានចៀសទៅ បើចង់ឲ្យប្រតិបត្តិការក្ដៅសាច់ឡើងដល់កំពូល

បើសង្ស័យថាខ្លួនកំពុងញៀនរួមភេទមិនដឹងខ្លួន ចម្លើយមានក្នុងអត្ថបទនេះ

នេះជាមូលហេតុ និងវិធីព្យាបាលបញ្ហាញៀនរួមភេទ

៧ ចំណុចជួយឲ្យសិចរោលរាលដល់កំពូល

២- ស្ត្រេសច្រើន

មានការសិក្សាលើកម្រិតស្ត្រេសប្រចាំថ្ងៃនៅលើនិស្សិតស្រីៗ ជាមួយនឹងសកម្មភាពផ្លូវភេទរបស់ពួកគេក្នុងរយៈពេលប៉ុន្មានខែ មុនពេលគេប្រលង។ ការសិក្សាពិតជាបានបង្ហាញថា ការរួមភេទគឺពិតជាកត្តាមួយជួយកាត់បន្ថយស្ត្រេសបានមែន។ ប៉ុន្តែទោះជាយ៉ាងណាក្ដី ក៏ទំនាក់ទំនងរវាងការថយចុះនៃសកម្មភាពផ្លូវភេទ និងបញ្ហាស្ត្រេសកើនឡើងនៅតែជាក្ដីបារម្ភរបស់យើងគ្រប់គ្នា។ បញ្ហាស្ត្រេស ជាមួយបញ្ហាសិចបង្កើតបានជាវដ្ដមួយដែលនៅពេលយើងស្ត្រេសកាន់តែខ្លាំង នោះយើងនឹងលែងខ្វាយខ្វល់ជាមួយរឿងផ្លូវភេទទៀតហើយ ហើយវានឹងធ្វើឲ្យយើងស្ត្រេសកាន់តែខ្លាំង។

៣- ធ្វើឲ្យចំណងស្នេហាមិនចុះសម្រុង

ការរួមភេទគឺរឿងមិនអាចខ្វះបានក្នុងជីវិតរស់នៅជាមួយដៃគូ។ រឿងលើគ្រែនេះដើរតួដូចជាកាវស្អិត ដើម្បីភ្ជាប់ដៃគូទាំងពីរឲ្យផ្អែមល្ហែមជាមួយគ្នា។ នៅពេលដៃគូរពីរនាក់មិនសូវរួមភេទជាមួយគ្នា នោះអារម្មណ៍នៃចំណងស្នេហារបស់អ្នកទាំងពីរក៏នឹងចាប់ផ្ដើមធ្លាក់ចុះ។ ចំណុចសំខាន់ក្នុងរឿងមួយនេះគឺមានក្នុងអ័រម៉ូនមួយមានឈ្មោះថា អុកស៊ីតូស៊ីន (oxytocin) ដែលជាទូទៅគេហៅវាជាអ័រម៉ូននៃក្ដីស្រលាញ់។ អុកស៊ីតូស៊ីនបញ្ចេញនៅពេលយើងដល់ចំណុចកំពូលនៃការរួមភេទ។ អ័រម៉ូននេះបង្កើតអារម្មណ៍ជឿទុកចិត្ដ និងស្និទ្ធស្នាលរវាងដៃគូ ដែលធ្វើឲ្យយើងទាំងពីរមើលឃើញគ្នាក្នុងចំណុចល្អទៅវិញទៅមក។

៤- គិតអវិជ្ជមានលើខ្លួនឯង និងបំផ្លាញការជឿទុកចិត្ដលើខ្លួនឯង

ការបញ្ឈប់ខ្លួនឯងអំពីសកម្មភាពផ្លូវភេទ អាចធ្វើឲ្យប៉ះពាល់ដល់ការគិតមកលើខ្លួន។ ទោះបីជាការមិនរួមភេទ មិនបានធ្វើឲ្យប៉ះពាល់ដល់ដងខ្លួន ឬបណ្ដាលឲ្យកើតជំងឺណាមួយក្ដី ប៉ុន្តែវាធ្វើឲ្យប៉ះពាល់យ៉ាងធ្ងន់ធ្ងរមកលើការគិតវិជ្ជមានមកលើខ្លួនឯង ក៏ដូចជាបាត់បង់ភាពជឿជាក់លើខ្លួនឯង។ បម្រែបម្រួលអារម្មណ៍កើតឡើងដោយសារបញ្ហាមួយនេះ អាចបណ្ដាលឲ្យក្លាយទៅជាជំងឺថប់បារម្ភ ដែលជំងឺមួយនេះអាចនឹងប៉ះពាល់ដល់ទំនាក់ទំនងយើងទាំងពីរ ក៏ដូចជាមួយអ្នកដទៃដូចគ្នា។

៥- លិង្គមិនឡើងរឹង

សម្រាប់មនុស្សប្រុស នៅពេលមិនសូវបានរួមភេទ គឺអាចបណ្ដាលឲ្យកើតជំងឺផ្លូវភេទម្យ៉ាង គឺលិង្គមិនឡើងរឹង។ ការសិក្សាមួយបានរកឃើញថា មនុស្សប្រុសបានរួមភេទម្ដងក្នុងមួយសប្ដាហ៍ គឺមិនងាយកើតជំងឺលិង្គមិនរឹងតិចជាងអ្នកមិនសូវបានរួមភេទរហូតដល់៥០ភាគរយឯណោះ។ លិង្គមិនរឹងអាចធ្វើឲ្យប៉ះពាល់យ៉ាងធ្ងន់ធ្ងរដល់ទំនាក់ទំនងរបស់ដៃគូ។ បញ្ហានេះអាចធ្វើឲ្យមនុស្សប្រុសយើងមិនសូវបានរួមភេទ ហើយអាចគេចវេសចេញពីសកម្មភាពស្និទ្ធស្នាលទាំងឡាយ។

ត្រួតពិនិត្យដោយ

វេជ្ជ. ចាន់ ស៊ីណេត

ឯកទេសសម្ភព និងរោគស្ត្រី · មន្ទីរពេទ្យបង្អែកមិត្តភាពកម្ពុជា-ចិន សែនសុខ

អត្ថបទដោយ ណៃ ទូច · កែ 10/07/2020

ដឹងអត់! ពេល​ឈប់រួមភេទរាងកាយយើងនឹងជួយ​បញ្ហា​ ៥ យ៉ាងនេះ