៣យ៉ាង ស្រីៗការពារខ្លួនពីជំងឺមហារីកមាត់ស្បូន

ជំងឺ​មហារីក​មាត់​ស្បូន គឺជា​ជំងឺ​ដ៏​កាច​សាហាវ​មួយ ​បើ​កើតហើយ​ពិបាក​នឹង​ព្យាបាលណាស់។ ដូចនេះហើយលោកស្រី​វេជ្ជបណ្ឌិត ពឹង ជុតិមា នាយិកាសេវាកម្ម​​គ្លីនិក រ៉ាក់ ក៏បាន​ណែនាំ​តែ​វិធី​ការពារ​ខ្លួន ៣ យ៉ាង​​ជួយ​យើង​ឲ្យ​ចៀស​ផុត​ពី​ការ​កើត​ជំងឺ​មហារីក​ប្រភេទ​នេះ​បាន។

១- តម​មិន​រួម​ភេទ​រហូត​ដល់​មាន​ដៃគូ​ជាក់លាក់

ស្រី​ៗ​ដែល​នៅ​លីវ​ត្រូវ​តម​ការ​រួមភេទ​មុន​ពេល​រៀបការ​ ដោយមិន​គួរ​ប្រឡូក​ក្នុង​ការ​រួមភេទ​មាន​ដៃគូ​ច្រើន​ឡើយ ព្រោះ​វា​អាច​នាំឲ្យ​ឆ្លង​មេរោគ​បាន ដូចនេះ​ហើយ​បាន​ជា​ពេទ្យ​ណែនាំ​មិន​ឲ្យ​រួមភេទ តែ​បើ​តម​មិន​បាន​នៅ​មាន​ជម្រើស ២ ផ្សេង​គ្នា​ទៀត។

២- ប្រើ​ស្រោម​អនាម័យ

ស្រីៗ​មាន​ដៃគូ​ គួរតែ​​ប្រើ​ស្រោម​អនាម័យគ្រប់​ពេល​រួម​ភេទ​​ ព្រោះ​វា​អាច​ជួយ​ការ​ចម្លង​មេរោគ​អេដស៍ កាមរោគ និង​មេរោគ​ដែល​បង្ក​ឲ្យ​ទៅ​ជា​ជំងឺ​មហារីក​មាត់ស្បូន​។

៣- ចាក់​វ៉ាក់សាំង​មហារីក​មាត់​ស្បូន

ទោះ​ជា​យើង​បាន​ឆ្លងកាត់​ការ​រួម​ភេទ​ហើយ​ក៏​ដោយ ក៏​នៅតែ​អាច​ចាក់​វ៉ាក់សាំង​មហារីក​មាត់ស្បូន​បាន​ដែរ។ តែ​សម្រាប់​អ្នក​ធ្លាប់​រួម​ភេទ មុន​ចាក់​វ៉ាក់សាំង​គ្រូពេទ្យ​ត្រូវ​ធ្វើ​តេស្ដ​រក​កោសិកា​មហារីកនៅមាត់ស្បូន​ជាមុន​សិន ប្រសិនបើ​មិន​ឃើញ​មាន​ការ​វិវត្តនោះ​ទេ អាច​ចាក់​បាន។ សម្រាប់​ស្រីៗ​​មិន​ទាន់​រួមភេទ​ឆ្លងកាត់​ការ​រួម​ភេទ ពោល​តាំងពី​ក្មេង​អាយុ ៩ ឆ្នាំ​ឡើង​អាច​ចាក់​បាន។

អត្ថបទពាក់ព័ន្ធ៖

• តេស្តរកមើលមហារីកមាត់ស្បូន ស្រីៗគួរស្វែងយល់
• ស្រីៗប៉ុន្មានក្រុមនេះ អាចប្រឈមខ្ពស់ជំងឺមហារីកមាត់ស្បូន តម្រូវឲ្យធ្វើតេស្ត១ឆ្នាំម្តង

ក្នុង​ករណី​មាន​សំណួរ ឬ​មន្ទិល​​សង្ស័យ​ជុំវិញ​សុខភាព​អ្នក​ ជម្រើស​ល្អ​បំផុត ​​សូម​ពិគ្រោះ​​ និង​ប្រឹក្សា​យោបល​ផ្ទាល់​ជាមួយ​គ្រូពេទ្យ​ជំនាញ។ ​Hello Health Group មិនចេញវេជ្ជបញ្ជា មិន​ធ្វើរោគវិនិច្ឆ័យ ឬព្យាបាលជូនទេ៕