បើរវល់ ហើយចង់រក្សាអត្ថបទទុកអានពេលក្រោយច្រើនប៉ុណ្ណាក៏បាន គ្រាន់តែ Login ហើយចូលទៅកាន់ សុខភាពខ្ញុំ ឥឡូវនេះ!

មាតិកា

រង្វាស់សុខភាព

ចែករំលែក

ប៉ុន្មានចំណុចនេះហើយ ជាមូលហេតុនាំឲ្យស្រីៗងាយរលាកផ្លូវបង្ហួរនោម

ជំងឺរលាកបំពង់បង្ហួរនោមគឺជាការរលាកទាំងតម្រងនោម ប្លោកនោម និងរន្ធបង្ហួរនោម។ មុខងាររបស់តម្រងនោម និងប្លោកនោមគឺសម្រាប់ផ្ទុកកាកសំណល់ និងសម្អាតកាកសំណល់ចេញពីក្នុងខ្លួនយើង។ កាកសំណល់នេះនឹងចេញពីក្នុងខ្លួនយើង ក្នុងទម្រង់ជាទឹកនោមដែលបញ្ចេញមកតាមរន្ធបង្ហួរនោម។

១- ជំងឺរលាកផ្លូវបង្ហួរនោមលើមនុស្សស្រី

មនុស្សស្រីយើងងាយនឹងកើតជំងឺរលាកផ្លូវបង្ហួរទឹកនោមច្រើនជាងមនុស្សប្រុស។ អ្នកវិទ្យាសាស្រ្តមួយចំនួនបានបញ្ជាក់ផងដែរថា មនុស្សស្រីមានអត្រាប្រឈមនឹងជំងឺមួយនេះច្រើនជាងមនុស្សប្រុស។ លើសពីនេះទៀតនោះការឆ្លងរោគនៅលើមនុស្សស្រីអាចកើតឡើងម្ដងហើយម្ដងទៀតក្នុងមួយឆ្នាំ។

ការឆ្លងរោគភាគច្រើនបង្ករឡើងដោយពពួកមេរោគចូលទៅក្នុងបំពង់បង្ហួរនោម។ មានករណីឆ្លងមេរោគមួយចំនួនគឺមិនចាំបាច់ត្រូវការព្យាបាលទេ ហើយអាចជាទៅវិញដោយខ្លួនឯង។ រោគសញ្ញាដែលអាចលេចឡើងមានដូចជា៖

ឈឺចាប់ពេលបត់ជើងតូច
នោមញឹកជាងធម្មតា
ពិបាកនោម នោមមិនចេញទោះបីជាមានអារម្មណ៍កំពុងតែចង់នោមក្ដី
មានលេចទឹកនោមដោយមិនដឹងខ្លួន
ទឹកនោមប្រែជាខាប់ ខ្មៅ មានធំក្លិន ឬមានឈាម

២- តើមូលហេតុរបស់ជំងឺរលាកផ្លូវបង្ហួរនោមរបស់មនុស្សស្រីមានអ្វីខ្លះ?

ស្រិៗយើងប្រហែលជាធ្លាប់ឮអំពីការណែនាំឲ្យមនុស្សស្រីលាងសម្អាតតំបន់សម្ងាត់របស់ខ្លួនពីមុខទៅក្រោយហើយ។ ការនិយាយបែបនេះគឺដើម្បីការពារមនុស្សស្រីយើងមិនឲ្យកើតជំងឺរលាកផ្លូវបង្ហួរនោម។ ការណែនាំនេះកាន់តែមានហេតុផលសមរម្យនៅពេលដែលយើងក្រឡេកទៅមើលទីតាំងរបស់រន្ធបង្ហួរនោម ទ្វារមាស និងរន្ធគូទ។ រន្ធបង្ហួរនោម គឺជាបំពង់មួយដែលដឹកទឹកនោមចេញពីក្នុងខ្លួន ហើយវាស្ថិតនៅក្បែរទ្វារមាស និងរន្ធគូថ។ ការសម្អាតពីខាងមុខទៅក្រោយអាចការពារបាក់តេរី និងមេរោគពីក្នុងទ្វារមាស និងក្នុងរន្ធគូទធ្វើឲ្យរលាករន្ធបង្ហួរនោមបាន។ ពេលរលាករន្ធបង្ហួរនោមអាចរាលដាលទៅប្លោកនោម និងអាចឆ្លងទៅកាន់សរីរាង្គដទៃផ្សេងទៀតបាន។ រន្ធបង្ហួរនោមនៅលើមនុស្សស្រីគឺខ្លីជាងមនុស្សប្រុស ហើយបាក់តេរី និងមេរោគអាចធ្វើដំណើរទៅកាន់កន្លែងផ្សេងបានកាន់តែលឿន។

រលាកទ្វារមាស

ក្រៅពីបាក់តេរីមានក្នុងរន្ធគូទ នៅមានសកម្មភាពមួយចំនួនផ្សេងទៀតក៏អាចនាំមេរោគចូលក្នុងរន្ធបង្ហួរទឹកនោមបានដូចគ្នា។

៣- ការរួមភេទ

ពិតមែនហើយ ការរួមភេទគឺអាចបណ្ដាលឲ្យកើតជំងឺរលាកផ្លូវទឹកនោមបាន។ ជាការពិត ដោយសារតែសកម្មភាពផ្លូវភេទអាចនាំបាក់តេរីពីក្នុងទ្វារមាស ឬរន្ធគូទចូលទៅក្នុងរន្ធនោមបាន។ វិធីការពារជំងឺរលាកផ្លូវនោមពេលរួមភេទ គឺយើងអាចនោមក្រោយពេលរួមភេទក្នុងរយៈពេល ៣០នាទី អាចជួយកាត់បន្ថយអត្រាឆ្លងជំងឺនេះបាន។

៤- ទល់លាមក និងរាករូស

ពេលយើងទល់លាមកធ្វើឲ្យប្លោកនោមពិបាកបញ្ចេញទឹកនោមមកក្រៅឲ្យអស់ណាស់។ ដូចនេះទឹកនោម និងបាក់តេរីនឹងជាប់នៅក្នុងខ្លួន ហើយបាក់តេរីនោះ នឹងចាប់ផ្ដើមរីកលូតលាស់បង្ករជាជំងឺបាន។

ការរាករូសក៏ធ្វើឲ្យស្រីៗប្រឈមមុខជាមួយជំងឺរលាកផ្លូវទឹកនោមដូចគ្នា។ រាកគឺលាមករាវ ដែលវាអាចជ្រាបទៅគ្រប់ទីកន្លែង ដែលបញ្ហានេះនឹងធ្វើឲ្យបាក់តេរីអាចចូលទៅក្នុងរន្ធបង្ហួរនោមបានកាន់តែស្រួល។ តើធ្វើដូចម្ដេចទើបការពារបាន?ចម្លើ់យគឺយើងត្រូវសម្អាតតំបន់ទាំងនោះពីខាងមុខទៅក្រោយ។

៥- ជំងឺទឹកនោមផ្អែមមិនបានព្យាបាលត្រឹមត្រូវ

ពេលដែលជាតិស្ករក្នុងឈាមកើនឡើង ជាតិស្ករដែលលើសនឹងច្រោះចូលក្នុងទឹកនោម ហើយវានឹងបង្កើតជាបរិស្ថានមួយសមស្របសម្រាប់ឲ្យបាក់តេរីរីកលូតលាស់។ ប៉ុន្តែវាកើតឡើងនៅពេលយើងកើតជំងឺទឹកនោមផ្អែមតែប៉ុណ្ណោះ។ ការញ៉ាំអាហារមានជាតិផ្អែម មិនធ្វើឲ្យយើងកើតជំងឺរលាកផ្លូវទឹកនោមនោះទេ។

ចង់គណនា BMR ចុចទីនេះ !

ចង់ពិនិត្យជំងឺមហារីកសុដន់ ចុចទីនេះ !

ចង់ពិនិត្យជំងឺមហារីកមាត់ស្បូន ចុចទីនេះ !

៦- ទប់ទឹកនោមយូរពេក

ប្រសិនបើយើងចង់នោម គឺត្រូវទៅនោមភ្លាមទៅ។ ទប់ទឹកនោមយូរពេក នឹងធ្វើឲ្យបាក់តេរីបន្តនៅក្នុងខ្លួនយើងកាន់តែយូរ ហើយយើងនឹងប្រឈមមុខជាមួយជំងឺ។

៧- កង្វះជាតិទឹក

ការញ៉ាំទឹកផ្ដល់អត្ថប្រយោជន៍ដល់សុខភាព និងថែមទាំងអាចជួយការពារយើងពីជំងឺរលាកផ្លូវទឹកនោមបានថែមទៀតផង។ ពេលញ៉ាំទឹកកាន់តែច្រើន យើងនឹងមានទឹកនោមច្រើនដូចគ្នា ដែលនេះនឹងជួយលាងបាក់តេរីចេញពីក្នុងខ្លួនបានកាន់តែច្រើន។

៨- វិធីពន្យារកំណើត

ប្រសិនបើយើងប្ដូរទៅប្រើថ្នាំគ្រាប់ពន្យារកំណើត ជាលទ្ធផលគឺមានបម្រែបម្រួលអ័រម៉ូន ដែលអាចបណ្ដាលឲ្យមានបម្រែបម្រួលបាក់តេរីល្អក្នុងទ្វារមាស រហូតអាចធ្វើឲ្យស្រីៗយើងកើតជំងឺរលាកផ្លូវទឹកនោម។ បើយើងប្រើវីធីពន្យារកំណើត diaphragms និងប្រើថ្នាំសម្លាប់ស្ពែម ក៏ធ្វើឲ្យអត្រាកើតជំងឺនេះកើនឡើងដូចគ្នា នេះបើយោងតាមការលើកឡើងរបស់អ្នកជំនាញ។

អត្ថបទគួរអាន៖

៩- ផលិតផលប្រើប្រាស់របស់មនុស្សស្រី

មិនប្ដូរសំឡីអនាម័យអាចធ្វើឲ្យកើតជំងឺរលាកផ្លូវទឹកនោមបានកាន់តែច្រើន។ បាក់តេរីអាចលូតលាស់ក្នុងផលិតផលទាំងនោះបានយ៉ាងលឿន។ ខោក្នុងក៏អាចជាមូលហេតុធ្វើឲ្យកើតជំងឺរលាកផ្លូវទឹកនោមបានដូចគ្នា។ សារធាតុរឹបសម្រាប់ផលិតខោក្នុង ដែលស្ដើងអាចអនុញ្ញាតឲ្យមេរោគឆ្លងចូលបានយ៉ាងងាយ។ ស្លៀកខោក្នុងផលិតពីកប្បាសគឺជាជម្រើសល្អ ដើម្បីកាត់បន្ថយជាតិសំណើម ដែលជាមជ្ឈដ្ឋានមួយសម្រាប់ឲ្យបាក់តេរីរីកលូតលាស់។

ត្រួតពិនិត្យដោយ

វេជ្ជ. ចាន់ ស៊ីណេត

ឯកទេសសម្ភព និងរោគស្ត្រី · មន្ទីរពេទ្យបង្អែកមិត្តភាពកម្ពុជា-ចិន សែនសុខ

អត្ថបទដោយ ណៃ ទូច · កែ 05/11/2024

ប៉ុន្មានចំណុចនេះហើយ ជាមូលហេតុនាំឲ្យ​ស្រីៗងាយរលាកផ្លូវបង្ហួរ​នោម